Los Hechos 28

Ya ndo̱ꞌo ra Pablo ñuꞌú íchi nani Malta

1Saa ndi̱xaa vaꞌa ndiꞌi nde nuu ñuꞌú íchi ikán ta ku̱ndaa ini nde náni ya Malta. 2Ta yáꞌa ni vaꞌa ndi̱kuiso na ñuu ikán ndeꞌe, saa ndi̱kaꞌmi na ñu̱ꞌu̱ ndisaa nde chi vixin ni, ta kúun síin savi. 3Ta saa ndi̱xaꞌan ra Pablo ti̱in ra iin numi titun táan ra nuu ñu̱ꞌu̱. Tá ka̱ni ñu̱ꞌu̱ sata nu ta ke̱ta iin ko̱ó kueꞌe tíin ri ndaꞌa ra. 4Saa tá xi̱ni sava mií na ñuu ikán ya tíin ri ndaꞌa ra, ñaa xa̱á na káꞌan na xiꞌin taꞌan na, káchi na saa:

―Süvi ra vaꞌa ku ra yóꞌó, ra xáꞌni ndìì ku ra, vani ndi̱kaku ra ini nduta ñûꞌu ta köo táxi ndioxi yo kutaku ra ―káchi na.

5Saa ki̱si ra ndaꞌa ra nuu ñu̱ꞌu̱ ta ndi̱kava ri, ta köo ya ndi̱ndoꞌo ra. 6Ñaa ndátun ndiꞌi na ndóo ikán nañu ndaꞌa ra, án xa iin kuu soꞌva ndi̱kava ra kuvi ra, káꞌán na. Saa ku̱naꞌa va ndátun na kuvi ra, ta köo ndi̱xiꞌi ra. Tá xi̱ni na köo ya ndi̱ndoꞌo ra saa xa̱á ndíkani ini na, káchi na saa:

―Iin ndioxi va ku ra, yakan vaꞌa köo ya ndi̱ndoꞌo ra ―káchi na.

7Yati nuu ndi̱xaa nde ndóo nde ikán íyo kuaꞌa ni ñuꞌú iin mií ra taa ra ndee ni mi ñuu ikán Publio nani ra. Ta vaꞌa ni ndi̱kuiso ra ikán ndeꞌe, saa xi̱ndoo nde veꞌe ra uni kivi. 8Ta ndee ka vi ndóꞌo iva ra índuꞌu ra nuu xito, ndítuvi ya xiꞌin ra tin táta ra ni̱í. Saa ndi̱xaꞌan ra Pablo nuu índuꞌu ra, tá si̱ndiꞌi ra ndi̱kaꞌan ra xaꞌa ra xiꞌin Ndioxi ta chi̱nuu ndaꞌa ra xiní ra, ñaa ndu̱vaꞌa ra. 9Tá xi̱ni na ndu̱vaꞌa iva ra ikán, saa xa̱á xáa kuaꞌa na kúꞌvi ndóo mi ñuu ikán nuu ra, saa síndaꞌa ndiꞌi ra na. 10Xaꞌa ya ikán kua ndu̱mani ni nde nuu na. Saa tá ku̱yati kana koo nde kuꞌun nde, ta si̱niꞌi na ñaꞌa nuu nde kuꞌun xiꞌin nde kuniñuꞌu nde ichí.

Ndi̱xaa ra Pablo ñuu Roma

11Saa ku̱u ndi̱xinu uni yoo xi̱ndoo nde ikán, ñaa nda̱a nde sata barco itun ndi̱ndoo xi̱ndichi yo̱ó vixin. Nu ke̱e chí ñuu Alejandría ku nu ta íyo kivi nu náni nu Cástor tin Pólux, chi ndóso uvi naꞌna ndioxi na griego sata nu. 12Ñaa ndi̱xaa nde xiꞌin nu ñuu Siracusa, ta ikán ndi̱ndoo nde xi̱ndoo nde uni kivi. 13Sindiꞌi ikán saa ka̱na koo nde kuaꞌan nde yuꞌu nduta ñûꞌu, saa ndixaa nde ñuu Regio. Inka kivi xa̱á xíka loꞌo tachi ki̱xi chí sur, sundi tachi vaꞌa kua chi chi̱ndee ya barco nde ndi̱xaa kama nu. Kivi uvi ndi̱xaa nde inka ñuu náni Puteoli. 14Ñuu ikán ndi̱taꞌan nde sava na ndíkun Jesús, saa ndi̱xikan na ya mani nuu nde ndi̱ndoo nde ndi̱xiyo nde xiꞌin na uxa kivi. Sindiꞌi ikán saa ke̱e nde kuaꞌan nde ñuu Roma. 15Ta xa kúndaa ini na ndíkun Jesús ndóo ñuu Roma xaꞌa nde ya kuaꞌan nde, saa ka̱na koo na kuaꞌan xáꞌá na ndi̱kuiso na ndeꞌe ichí. Ndi̱xaa na nda ñuu náni Foro de Apio ta inka na ndi̱kitaꞌan xiꞌin nde nuu náni Tres Tabernas, ndi̱xaa na ndi̱kuiso na ndeꞌe. Tá xi̱ni ra Pablo na ikán ta vaꞌa ni ku̱ni ra, saa ta̱xi ra tixaꞌvi ndaꞌa Ndioxi. 16Tá ndi̱xaa nde ñuu Roma ta ta̱xi ra xáꞌnda chiñu nuu nda lapa ndiꞌi nda preso ndaꞌa ra kaꞌnu nuu ndiꞌi nda lapa ñuu Roma. Sundi ra Pablo ta ta̱xi na chiñu ñuu Roma ichí ndaꞌa ra koo ra inka ñaꞌñu nuu koo iin ra lapa kundaa ñaꞌa ra.

Káꞌan ndoso ra Pablo xaꞌa Jesús ñuu Roma.

17Saa tá ndi̱xinu uni kivi ndi̱xaa nde ndóo nde ñuu Roma ta saa ka̱na ra nda naꞌnu nuu na judío ndóo mií ñuu ikán ya kuꞌun na nuu ra. Tá ndi̱xaa na saa xaá ra káꞌan ra xiꞌin na, káchi ra saa:

―Na taꞌan yo, ná kundaa ini ndo saa chi yeꞌe ta ni köo ya ndi̱kan i xiꞌin na judío taꞌan yo, ta ni xaꞌa kuꞌva íyo na köo ñaꞌa ndi̱kaꞌan i, ta ti̱in na yeꞌe ñuu Jerusalén, ndi̱taxi na kuachi xaꞌa i ndaꞌa na Roma. 18Saa xa̱a nani na chiñu nuu na Roma kuachi xiꞌin i ta köo kuachi i káꞌan xaꞌa i kuvi i, káchi na. Ñaa ku̱ni na saña na yeꞌe. 19Ta köo ndi̱xiin na judío saña i, xaꞌa ya ikán kua ku̱ni i kixi i nuu ra rey César ra kaꞌnu ñuu yóꞌó ya xaa nani ra kuachi i. Sundi yeꞌe ta köo táxi i kuachi xaꞌa na ñuu yo na judío, ya ndíkuiin i xaꞌa va i kua vaxi i vitin. 20Xaꞌa ya ñaa kua ka̱na i ndóꞌo̱ ndi̱kitaꞌan yo yóꞌó, kaꞌan i xiꞌin ndo kundaa ini ndo ndá xaꞌa kua núꞌni i xiꞌin cadena yóꞌó. Xaꞌa ya ndíkun i ichí iin ta̱a ra xi̱ndatun ndiꞌi na taꞌan yo na Israel kixi sikaku yoo kua núꞌni i ―káchi ra Pablo xiꞌin na.

21Saa ndi̱kuiin na káꞌan na:

―Nda iin tutu ke̱e ñuu Judea täꞌan ndikiꞌin nde xaꞌa un, ni na taꞌan yo vaxi ñuu ikán ta köo na táxi kuachi xaꞌa un án ndá ka ya ná káꞌan na xaꞌa un. 22Ta ndeꞌe kúni nde kundaa ka ini nde ndá kuꞌva íyo ichí ya káꞌan un xaꞌa ñaa. Chi ndiꞌi ni kúu ñaꞌñu xíni soꞌo nde kánaꞌa na xaꞌa ichí ñaa ya kua ichí siki ―káchi nda naꞌnu nuu na judío xiꞌin ra Pablo.

23Ñaa ki̱ndoo na kivi ndá kivi kua ndi̱kaya na kuni soꞌo na kaꞌan ra. Ta kuaꞌa ka vi na ndi̱xaa nuu ra kivi ya ki̱ndoo na. Ñaa xa̱á ra ndítuꞌun ra xiꞌin na nuu ndíkuiin ra xaꞌa ichí ya xáꞌnda chiñu Ndioxi. Nda xitaan xa̱á ra káꞌan ra iin saa nda xikuaa. Síxinu ra ini na ya kundaa ini na xaꞌa Jesús, chi suvi xaꞌa ra kua ta̱a ra Moisés tin ya ta̱a nda ndi̱kaꞌan ndoso tuꞌun yuꞌu Ndioxi xinaꞌa. 24Sava na kándixa na ya ndaa kua káꞌan ra Pablo ta inka na köo xíin na kandixa na. 25Ta köo ndi̱xiyo yuꞌu sava na xiꞌin taꞌan na xaꞌa ya káꞌan ra Pablo, ñaa vaꞌa ka ka̱na koo na kuaꞌan na. Ta saa xa̱á ra Pablo káꞌan ra, káchi ra saa:

―Ya ndixa ni kua ndi̱kaꞌan Ndioxi xaꞌa ndo xinaꞌa xiꞌin xii sikua yo, chi xinaꞌa si̱kaꞌan Tachi I̱í Ndioxi ini ra Isaías ra ndi̱kaꞌan ndoso tuꞌun yuꞌu ra, ta̱a ra tuꞌun mií Ndioxi káchi ra saa:

26Kuáꞌan nuu na ñuu i kaꞌan un xiꞌin na, kachi un saa:

Vani xíni soꞌo ni na, ta köo kúndaa ini na xaꞌa ya xíni soꞌo na.

Vani xíto ni na, ta köo kúndaa ini na unkua xíto ni na.

27Nima na yóꞌó ta xa ku̱teꞌe yu̱ú ya.

Ndíkasi tuun na soꞌo na.

Saa ndíkasi na nduchi nuu na,

chi köo xíin na koto na.

Ni köo xíin na kuni soꞌo na.

Ya íkan na saa ta xïin na kundaa ini na ya ndaa,

Ni köo xíin na kixi na nuu i ya sindaꞌa i na, káchi ya ta̱a ra Isaías ―káchi ra Pablo xiꞌin na.

28Saa ndi̱kaꞌan ka ra Pablo xiꞌin na, káchi ra saa:

―Ta vaꞌa ná kundaa ini ndo vitin chi xaꞌa ya tuun ni nima ndo yakan kuꞌun i ndituꞌun i xiꞌin na köo kúu judío xaꞌa ya kúni Ndioxi sikaku ra na, chi na ikán ta kuni soꞌo va na ―káchi ra Pablo xiꞌin na.

29Tá xi̱ni soꞌo na judío ya ndi̱kaꞌan ra, ñaa ka̱na koo na ndee ni káni taꞌan na xiꞌin tuꞌun kuaꞌan na.

30Saa ndi̱xiyo ra Pablo uvi kuiya ñuu Roma, cha̱ꞌvi ra iin veꞌe nuu ndi̱xiyo ra. Ta ndiꞌi na xáꞌan veꞌe ra ndíkiꞌin vaꞌa ndiꞌi ra na. 31Nda iin naꞌa köo ndi̱keꞌe ra ya ndi̱kaꞌan ndoso ra xiꞌin na xaꞌa ichí nuu xáꞌnda chiñu Ndioxi. Saa sínaꞌa ra na xaꞌa Tata yo Jesucristo ta köo ya ndi̱kan na xiꞌin ra.

Currently Selected:

Los Hechos 28: xta

Highlight

Copy