Los Hechos 20

Kuaꞌan ra Pablo chí Macedonia xiꞌin Grecia

1Sindiꞌi tá xi̱kuiin kuachi ñuu Éfeso ikán, ta saa ka̱na ra Pablo ndiꞌi na kándixa Jesús, xáꞌa ra ndee xiꞌin na. Saa nu̱mi ra na ta ndi̱kaꞌan ndioxi ra xiꞌin na, saa ke̱e ra kuaꞌan ra chí estado Macedonia. 2Ndiꞌi kúu ñuu ya ñúꞌu estado Macedonia ikán ndi̱xika ra ndi̱kaꞌan ni ra xiꞌin na kuaꞌan ichí Jesús, saa ndi̱xaꞌa ni ra ndee xiꞌin na. Saa ke̱e ra ndi̱kiꞌin ra kuaꞌan ra chí Grecia. 3Uni yoo ndi̱xiyo ra ikán, saa ti̱ndaa kivi kee ra xiꞌin itun barco kuꞌun chí estado Siria. Ta saa ku̱ndaa ini ra ya chi̱taꞌan tuꞌun nda judío ndá kuꞌva tiin nda ra. Xaꞌa ya ikán kua köo ndi̱xaꞌan ra xiꞌin barco, vaꞌa ka ndi̱ko koo ra chí ñuꞌú kuaꞌan tuku ra chí estado Macedonia. 4Ta nda kuaꞌan xiꞌin ra Pablo ku ra Sópater, ra ke̱e ñuu Berea, inka ra Aristarco xiꞌin ra Segundo nda ke̱e ñuu Tesalónica ku uvi saa nda ikán, ta inka ra Gayo ke̱e ñuu Derbe xiꞌin ra Timoteo, ta ra Tíquico tin ra Trófimo ku nda ke̱e chí estado Asia. Ndiꞌi nda ikán ku nda kuaꞌan xiꞌin ra Pablo ndi̱xaa nda xiꞌin ra nda estado Asia ikán. 5Saa ndi̱kunuu nda kuaꞌan nda, ndi̱xaa nda ñuu Troas. Ikán ndátun nda xaa nde ndikitaꞌan nde xiꞌin nda. 6Sindiꞌi tá ndi̱ꞌi viko ya xíxí na judío xita vaꞌa ya köo uxan iya xiꞌin, saa ka̱na koo nde ñuu Filipos. Ta nda̱a nde sata barco tun kuaꞌan ñuu Troas. Tixin uꞌun kivi saa ndi̱xaa nde ndi̱kitaꞌan nde xiꞌin nda ñuu ikán. Ñaa ndi̱ndoo nde ndi̱xiyo nde xiꞌin nda uxa kivi.

Ndái ra Pablo na veꞌe ñuꞌu ñuu Troas

7Tá ti̱ndaa kivi núnu̱ú xaꞌa semana saa ndi̱kitaꞌan ndiꞌi nde ndíkun Jesús ya taꞌvi nde xita vaꞌa kuxi nde xiꞌin taꞌan nde xiꞌin ra Pablo, saa káꞌan ndoso ra tuꞌun Ndioxi xiꞌin naꞌa, síin kivi saa íyo ra ñuu na, ta tuvi xitaan keta ra kuꞌun ra inka ñaꞌñu, káchi ra. Yakan ndíꞌi ni ini ra nda sava ñǔu ta káꞌan ka ra xiꞌin na. 8Ndi̱kitaꞌan nde ndóo nde piso ni̱nù ta yáꞌa ni kuaꞌa ñu̱ꞌu̱ túun ikán. 9Saa índuꞌu iin ra kuâán, ra nani Eutico yati ventana. Ñaa ku̱naꞌa va káꞌan ra Pablo, ta saa ki̱ꞌin maꞌna ra ndi̱naa ini ra kíxi ra, ñaa ndi̱kava ra nda piso uni ni̱nu̱. Saa nu̱u na ndi̱xaꞌan na nda̱niꞌi ñaꞌa na, ta xa ndi̱xiꞌi va ra. 10Saa nu̱u ra Pablo ndi̱xaa ra ndi̱kunuu ndee ra nuu ra, númi ñaꞌa ra. Ñaa káꞌan ra xiꞌin na, káchi ra saa:

―Kündiꞌi ini ndo chi táku va ra ―káchi ra xiꞌin na.

11Saa nda̱a tuku ra kuaꞌan ra piso ni̱nù, ikán ta̱ꞌvi ra xita vaꞌa xi̱xi nde xiꞌin ra. Tá ndi̱ꞌi ikán ta xa̱á tuku ra káꞌan ra. Káꞌan ra saa nda ndi̱tuvi. Ñaa ke̱ta ra kuaꞌan ra. 12Ta inka ra ndi̱xiꞌi ikán ta ndi̱taku ra, ndi̱kiꞌin na ra kuaꞌan xiꞌin na veꞌe ra, saa kúsini ka vi na xaꞌa ya ndi̱taku ra.

Ke̱e ra Pablo ñuu Troas ta ndi̱kiꞌin ra kuaꞌan ra ñuu Mileto

13Saa ka̱na koo nde ndi̱kunuu nde kuaꞌan nde xiꞌin barco, ndi̱xaa nde ñuu Asón. Ikán xi̱ndoo nde xi̱ndatun nde ra Pablo, chi xa saa íyo ya ndi̱tuꞌun nde. Saa xíka xaꞌa ra ndi̱xaa ra ndi̱kitaꞌan ra xiꞌin nde. 14Tá ndi̱xaa ra ndi̱kitaꞌan ra xiꞌin nde ñuu Asón, saa nda̱a nde barco tun kuaꞌan ñuu Mitilene. 15Saa ka̱na koo nde kuaꞌan nde ta ndi̱tuvi inka kivi ndi̱yaꞌa nde yati xíin ñuꞌú íchi ya ndíkaa maꞌñu nduta ñûꞌu ya náni Quío. Saa nda̱a nde barco kuaꞌan nde ñuꞌú íchi ya ndíkaa maꞌñu nduta ñûꞌu ya nani Samos ndi̱xaa nde nuu núu na barco ya káꞌan na xiꞌin Trogilio ñaa ndi̱kundee nde ikán, ta inka kivi ndixaa nde ñuu Mileto. 16Iin ndiyaꞌa xaa nde kuaꞌan nde nda ñuu Mileto chi köo ndi̱xiin ra Pablo ndoo nde ñuu Éfeso, chi ndíꞌi ni ini ra kuꞌun ra ñuu Jerusalén chi kúni ra koo ra ñuu ikán tá täꞌan ka tindaa viko ya Pentecostés, tá tu ná xaa kama ra.

Ndái ra Pablo na xikuaꞌa ñuu Mileto

17Saa tá ndi̱xaa nde xiꞌin ra Pablo ñuu Mileto ta ti̱ꞌvi ra chiñu kuaꞌan nuu na xikuaꞌa veꞌe ñuꞌu ñuu Éfeso ya ná kixi na ñuu Mileto. 18Saa ndi̱xaa na ñuu ikán, ñaa xa̱á ra Pablo káꞌan ra xiꞌin na, káchi ra saa:

―Na taꞌan yo, xíni mií ndo ndá kuꞌva i̱kan i tá ndi̱xiyo xiꞌin ndo tá kivi ki̱xi núnu̱ú i ñuu ndo estado Asia yóꞌó iin saa nda kivi vitin. 19Xi̱ni mií ndo xa̱a chiñu ni i ndiꞌi saa kivi ta nda loꞌo ñaꞌa köo ndidúku i nuu ndo ya chindee ndo yeꞌe. Ta xa̱ku ni i, chi kuaꞌa ni tindoꞌo ki̱xi nuu i, saa chi ku̱ni na judío kaꞌni na yeꞌe. 20Vani ki̱xi ni tindoꞌo nuu i ta köo ndi̱xikuiin i kaꞌan ndoso i tuꞌun Ndioxi ni ya sinaꞌa i tuꞌun ra nuu chútu ndaa naꞌa án tá veꞌe tá veꞌe. 21Ndi̱kaꞌan ndoso i tuꞌun ra xiꞌin na kúu judío tin na köo kúu judío, ya xíniñuꞌu na ndiko koo ini na xaꞌa kuachi na nuu Ndioxi, saa xáa na kundaa ni ini na kuni na Tata yo Jesucristo. 22Ta vitin kuꞌun ndaku i ñuu Jerusalén, saa chi saa íyo ya kúni Tachi I̱í Ndioxi. Ta köo xíni i unkua kundoꞌo i ñuu ikán. 23Sundi ndiꞌi saa ñuu nuu xa ndi̱xaꞌan i ta káꞌan Tachi I̱í Ndioxi xiꞌin i ndoꞌo ni i ta kuꞌun i veꞌe kàà, káchi ya xiꞌin i. 24Ta nda iin ñaꞌa küvi kasi nuu i xaꞌa chiñu ya íkan i, ni köo ndíꞌi ini i, tá tu kuvi i xaꞌa ra, ta vaꞌa kuvi va i xaꞌa ra. Chi ya ndee ni ndíꞌi ini i xaꞌa kua sixinu i chiñu nuu ra ya ta̱xi ra ndaꞌa i xaa súvi i nuu ra ya ndikuiin i kaꞌan ndoso i tuꞌun vaꞌa xaꞌa ra xiꞌin naꞌa ya ná kundaa ini na ndá kuꞌva kúꞌvi ni ini Ndioxi xíni ra na.

25’Ta vitin káꞌan i xiꞌin ndo chi xiꞌin ndóꞌo̱ kua ndi̱xiyo i saa ndi̱xika i ndi̱kaꞌan ndoso i xiꞌin ndo xaꞌa kuꞌva xáꞌnda chiñu Ndioxi, chi vitin ta küni ka ndo nuu i. 26Xaꞌa ya ikán kua káꞌan i xiꞌin ndo köo ndíso ka i kuachi xaꞌa ndo. 27Saa chi xa ndi̱kani ndiꞌi va i ya kúni Ndioxi nuu ndo ta nda iin ya köo ndi̱tiseꞌe i nuu ndo. 28Ta ndóꞌo̱ ku ndo ndi̱kaxin Tachi I̱í Ndioxi ya kundiso chiñu ndo xiꞌin na veꞌe ñuꞌu. Tá íkan nda ndáa levo sana nda, saa ikan ndo. Xaa kuenta ni ndo xiꞌin mií ndo tin xaa kuenta ni ndo xiꞌin na kuaꞌan ichí Jesús. Chi na ikán ku na sa̱ta ra xiꞌin ni̱í mií ra nduta ndi̱xita nuu cruzin. 29Chi xíni i, tá köo ka i íyo xiꞌin ndo ta kixi naꞌa sindaꞌvi na ndóꞌo̱. Tá íkan kiti ndivaꞌi xáa nduvaꞌa ni ri xiꞌin levo saa ikan na xiꞌin ndo, xaa nduvaꞌa ni na xiꞌin ndo. 30Nda na xíka veꞌe ñuꞌu mií ndo ta saa ikan na xiꞌin ndo. Vaxi kivi ta xáa na sinaꞌa na ya síki, saa taa sií na na ñúꞌu xiꞌin ndo ya ná kundikun ñaꞌa na. 31Yakan kua kuenta ni koo ndo, täxi ndo sindaꞌvi na ndóꞌo̱. Ndikaꞌán ini ndo, uni kuiya ndi̱xiyo i xiꞌin ndo ndi̱kani i nuu ndo, ndi̱kaꞌan i xiꞌin ndo nduvi niuun ya xíniñuꞌu ndo kuenta ni koo ndo. Nda xáku i ndi̱kaꞌan i xiꞌin ndo.

32’Ta vitin káꞌan ni i xaꞌa ndo xiꞌin Ndioxi ya ná kundaa ni ra ndóꞌo̱, saa ná kundaa ni tu tuꞌun va ra ndóꞌo̱, chi ya vaꞌa ni ku ya, saa kúu mií ya ndee ya taxi ya ndundee ka ini ndo saa taxi ra ndiꞌi ya vaꞌa ndaꞌa ndo, ya chi̱tuni ra taxi ra ndaꞌa na kúu ñuu ra, na i̱í. 33Tá ndi̱xiyo i xiꞌin ndo ta köo xuꞌun ni toto köo ndi̱nduku i nuu, nda iin ñaꞌa ndo köo ndi̱kutoo i. 34Xi̱ni mií ndo, ndi̱nuni xa̱a chiñu i xiꞌin ndaꞌa i, saa ndi̱niꞌi i ya xi̱taku i xiꞌin nda taꞌan i. 35Taꞌan ya xi̱ni ndo i̱kan i kua xíniñuꞌu ndo ikan ndo, ya kuchiñu ndo chindee ndo inka na köo kúndee ini xaa chiñu. Ndi̱kaꞌán ndo ya ndi̱kaꞌan Tata yo Jesús, káchi ra saa: “Vaꞌa ni ka kée na táxi ñaꞌa ndaꞌa inka na, süvi ka vi na ndíkiꞌin ya”, káchi Tata yo ―káchi ra Pablo xiꞌin na.

36Tá si̱ndiꞌi ra ndi̱kaꞌan ra xiꞌin na, saa si̱kusiti ra xiꞌin ndiꞌi na xikuaꞌa ikán, xa̱á ra káꞌan ra xiꞌin Ndioxi. 37Saa nu̱mi ñaꞌa na, chútu na nuu ra ta ndixa loꞌo xáku na xiꞌin ra. 38Kúsuchi ni ini na xiꞌin ra xaꞌa ya ndi̱kaꞌan ra xiꞌin na ya küni ka ñaꞌa na. Ta saa ndi̱kitaꞌan na kuaꞌan na ndaka na ndeꞌe nuu nda̱a nde barco kuaꞌan nde.

Currently Selected:

Los Hechos 20: xta

Highlight

Copy