Los Hechos 21

Kuaꞌan ra Pablo ñuu Jerusalén

1Sindiꞌi nda̱i nde na xikuaꞌa ikán, saa ke̱e nde kuaꞌan ndaku nde xiꞌin barco nda Cos ya ndíkaa ñuꞌú íchi ini nduta ñûꞌu. Ta inka kivi ke̱e nde kuaꞌan nde inka ñuꞌú íchi ya ndíkaa maꞌñu nduta ñûꞌu náni Rodas. Ta ikán ke̱e nde kuaꞌan nde nda ñuu Pátara. 2Ñuu Pátara ikán ndi̱taꞌan nde inka barco tun yáꞌa estado Fenicia, saa nda̱a nde sata nu ikán kuaꞌan nde. 3Tá yáꞌa nde kuaꞌan nde nuu nduta ñûꞌu ta xi̱ni nde Chipre ya ndíkaa ñuꞌú íchi maꞌñu nduta ñûꞌu chí ñaꞌñu ítin nde. Ñaa kuaꞌan ka nde nda estado Siria. Ndi̱xaa nde ñuu Tiro ya ndíkun ndaa estado Siria. Ñuu ikán xíniñuꞌu nu sindoo nu ñaꞌa ndíso nu kuaꞌan nu. 4Tá ndi̱kiꞌvi nde ñuu ikán ndi̱kitaꞌan nde xiꞌin sava na ndíkun ichí Jesús. Saa ndi̱ndoo nde xiꞌin na uxa kivi. Ta xiꞌin yuꞌu Tachi I̱í Ndioxi ndi̱kaꞌan na xiꞌin ra Pablo ya kundoꞌo ni ra, káchi na. Yakan káꞌan na xiꞌin ra ya ná küꞌun ra ñuu Jerusalén. 5Tá ndi̱xinu uxa kivi, ta ka̱na koo nde kuaꞌan nde. Kuaꞌan nda ná síꞌi nda xiꞌin nda, ndáka ná seꞌe vali ná kuaꞌan xiꞌin ná. Tá ndi̱xaa nde nuu yoti yuꞌu nduta ñûꞌu ikán, saa si̱kusiti ndiꞌi nde káꞌan nde xiꞌin Ndioxi. 6Ñaa nu̱mi taꞌan nde tin nda̱i taꞌan nde, saa nda̱a tuku nde sata barco kuaꞌan nde. Ta ndi̱ko koo na ikán kuanuꞌu na veꞌe na.

7Ta ñaa ka̱na koo nde ñuu Tiro saa ndi̱xaa nde ñuu Tolemaida, ikán ku nuu ndi̱ꞌi ya ndi̱xika nde nuu nduta ñûꞌu. Tá ndi̱xaa nde ñuu ikán, ta ndi̱xaꞌan nde xíto nde na ndíkun Jesús. Ñaa ndi̱ndoo nde xi̱ndoo nde xiꞌin na iin kivi. 8Tá ndi̱tuvi inka kivi, saa ka̱na koo nde kuaꞌan nde, ndi̱xaa nde ñuu Cesarea. Ikán ndi̱xaꞌan nde ndóo nde veꞌe ra Felipe, ra káꞌan ndoso tuꞌun vaꞌa xaꞌa Jesús ndá kuꞌva kuꞌun na ichí Ndioxi ku ra. Ta xa yachi ta̱xi na ndíkun Jesús ndóo ñuu Jerusalén ichí ndaꞌa ra xiꞌin iñu ka nda taa, ya kundiso chiñu nda xiꞌin ná ndi̱ndoo ndaa. 9Ta íyo kumi seꞌe siꞌí ra ná kuâán taki, ta kumi saa ná ikán káꞌan ndoso tuꞌun yuꞌu Ndioxi. 10Xa kuaꞌa loꞌo kivi ndóo nde veꞌe ra ikán, saa ndi̱xaa iin ra káꞌan ndoso tuꞌun yuꞌu Ndioxi ra náni ra Agabo, ra ke̱e estado Judea. 11Ndi̱xaa ra xíto ra ndeꞌe. Tá ndi̱xaa ra, ta ti̱in ra cinturón ra Pablo, ka̱va nuu ra sukun ndaꞌa ra tin sukun xaꞌa ra, saa xa̱á ra káꞌan ra:

―Soꞌva káchi Tachi I̱í Ndioxi xaꞌa ra xíin iín toko ya yóꞌó, tá kuꞌva i̱kan i xiꞌin cinturón ra, saa ikan na judío xiꞌin ra tá ná xaa ra ñuu Jerusalén. Katun na ndaꞌa ra tin xaꞌa ra, saa ndi̱taxi na ra ndaꞌa naꞌa na köo kúu judío, káchi Tachi I̱í Ndioxi ―káchi ra Agabo ikán xiꞌin nde.

12Tá xi̱ni soꞌo nde ya ndi̱kaꞌan ra ikán, saa xa̱á ndiꞌi nde káꞌan nde xiꞌin ra ya ná küꞌun ra ñuu Jerusalén. 13Ta ndi̱kuiin ra, káchi ra saa:

―Küaku ndo chi nda yeꞌe kúchiꞌña ini íkan ndo. Tá ti̱in na yeꞌe ka̱tun na, ta vaꞌa ná tiin va na yeꞌe, chi yeꞌe ta xa íyo tuꞌva i kundoꞌo i xaꞌa Tata yo Jesús, vani kaꞌni na yeꞌe xaꞌa va ra ―káchi ra xiꞌin na.

14Saa köo ndi̱kuchiñu nde sixînu nde ini ra. Ñaa vaꞌa ka ndi̱kaꞌan nde xiꞌin ra, káchi nde saa:

―Siín ka mií Ndioxi ná ikan ya kúni mií ra ―káchi nde xiꞌin ra.

15Sindiꞌi kivi ikán saa xa̱a ndúvi nde ya xíniñuꞌu nde kuꞌun nde, saa ka̱na koo nde kuaꞌan nde ñuu Jerusalén. 16Saa kuaꞌan sava na ndíkun ichí Jesús ndóo ñuu Cesarea ikán xiꞌin nde. Kuaꞌan tu inka ra náni Mnasón xiꞌin nde, ta xa yachi vi ndi̱kundikun ra ikán ichí Ndioxi, ta ra ke̱e Chipre ku ra, ta veꞌe ra ikán kua koo nde tá ná xaa nde ñuu Jerusalén.

Ti̱in na ra Pablo veꞌe ñuꞌu kaꞌnu ñuu Jerusalén

17Saa ke̱e nde kuaꞌan nde ndi̱xaa nde ñuu Jerusalén, ta vaꞌa ni ndi̱kuiso na ndíkun Jesús ndeꞌe, kúsini ni na xiꞌin nde. 18Saa inka kivi ke̱e ra Pablo kuaꞌan ra xiꞌin nde koto nde ra Jacobo saa ndóo ndiꞌi na xikuaꞌa, na ndíso chiñu xiꞌin na veꞌe ñuꞌu. 19Saa chi̱ndee ra Pablo ndiꞌi na ikán, ta ndi̱kaꞌan ra xiꞌin na xaꞌa iin iin ñaꞌa ya i̱kan Ndioxi xiꞌin ra tá ndi̱xaꞌa ra nuu na köo kúu judío. 20Tá xi̱ni soꞌo na ya ndi̱kaꞌan ra, ta xa̱a toꞌo na Ndioxi. Saa káꞌan na, káchi na saa:

―Ñani yo, xíni mií un kuaꞌa ni mil ku na judío ndi̱kundikun Jesús, ta ndíkundee na káꞌan na ya xíniñuꞌu na xaa súvi na ley ya ta̱a ra Moisés xinaꞌa. 21Ta xi̱ni soꞌo sava na ya sínaꞌa un na judío na ndóo tañu na köo kuu judío ya ná kändixa ka na ley ya ta̱a ra Moisés. Saa káꞌan un xiꞌin na ya köo xíniñuꞌu ka na ndikunuu tuni Ndioxi na ta ni ná xäa súvi ka na ley ya ta̱a ra Moisés, káchi un, che. 22Ta vitin ¿unkua ikan yo tá ná kuni soꞌo na xa̱a un? Ta iin ndi̱kitaꞌan ndiꞌi na. 23¿Án väꞌa soꞌva ikan un ná kundaa ini na ya küaꞌan un contra ley ra Moisés? Íyo kumi taa ta ki̱ndoo nda xaa súvi nda ya ndi̱kaꞌan nda xiꞌin Ndioxi. 24Ta vaꞌa kundaka un nda kuꞌun nda xiꞌin un yeꞌe veꞌe ñuꞌu nuu chaꞌvi un nuu nda ya ná ndixata lúu nda xiní nda nuu xáa súvi nda ya ki̱ndoo nda xiꞌin Ndioxi, ya ndu̱u i̱í nda nuu ra. Saa kundaa ini na süvi ya ndaa kua xi̱ni soꞌo na xaꞌa un, chi ni mií un ta xáa súvi ndiꞌi va un ya káꞌan ley ya ta̱a ra Moisés. 25Sundi na köo kúu judío ndíkun Jesús ta xa íyo vaꞌa va xaꞌa na, chi xa ta̱a nde tutu kuaꞌan ndaꞌa na nuu káꞌan nde xiꞌin ya ná kündiꞌi ini na xaꞌa ya xaa súvi na ya ta̱a ra Moisés. Sundi ya xíniñuꞌu na xaa súvi na kua yóꞌó káchi nde xiꞌin na: Ná küxi na ñaꞌa ya táxi naꞌa ndaꞌa naꞌna ya káꞌan na kúu ndioxi. Ni ni̱í kiti ná küxi na, ta ni kiti ndíxita na sukun ná küxi na. Ni iin taa ta küvi kiꞌvi ra xiꞌin ñaꞌa tá tu süvi yá síꞌi ra ku yá. Ta ni iin ñaꞌa küvi kiꞌvi yá xiꞌin iin taa tá tu süvi i̱í yá ku ra, káchi nde xiꞌin tutu kuaꞌan ndaꞌa na ikán ―káchi na xikuaꞌa ikán xiꞌin ra Pablo.

Tíin na ra Pablo veꞌe ñuꞌu kaꞌnu kuaꞌan ra veꞌe kàà

26Ñaa ndi̱tuvi inka kivi, saa ndi̱xaꞌan ra xiꞌin nda ikán ya xaa súvi nda ya káꞌan ley ra Moisés ya kindoo i̱í nda nuu Ndioxi. Tá ndi̱ꞌi i̱kan nda saa, ñaa ndi̱xaꞌan ra xiꞌin nda veꞌe ñuꞌu kaꞌnu ndítuꞌun ra xiꞌin sutu xaꞌa kivi ya xaa i̱í nda, ta saa soko nda kiti nuu Ndioxi xaꞌa ya si̱xinu nda ya ki̱ndoo nda xiꞌin ra.

27Tá xa kuaꞌan xínu uxa kivi ikán ta ndi̱xaa sava nda judío nda ki̱xi chí estado Asia, ta xi̱ni nda ra Pablo veꞌe ñuꞌu ikán. Saa xa̱á nda káꞌan nda xiꞌin na ndóo ikán sísaa ñaꞌa nda, 28ndee ka vi káꞌan nda, káchi nda saa:

―Na taꞌan yo na Israel, chindee taꞌan ndo xiꞌin nde ná tiin yo ra yóꞌó, chi ra yóꞌó ku ra xíka ndiꞌi saa ñaꞌñu táa sii ra naꞌa kánaꞌa na xaꞌa yo tin xaꞌa veꞌe ñuꞌu yo. Saa káꞌan tu ra xiꞌin na ya ná kändixa na ya ta̱a ra Moisés. Ta vitin xa̱a ra xáa kini ra veꞌe ñuꞌu yo chi ta̱an ra nda griego ini ya ―káchi nda ikán xaꞌa ra Pablo.

29Káꞌan na saa xaꞌa ra chi yachi xi̱ni na ra xiꞌin ra Trófimo ñuu Jerusalén, ta ra ikán ke̱e ra ñuu Éfeso, ta süvi ra judío ku ra, ta xi̱ndaka ñaꞌa ra Pablo ndi̱xaꞌan ra veꞌe ñuꞌu, káꞌán na.

30Ñaa iin ndi̱katin ndiꞌi na ñuu Jerusalén, sáa ka vi na ñaa ti̱in na ra Pablo yeꞌe veꞌe ñuꞌu. Saa ta̱va na ra ñúu ndai na ra kuaꞌan ra. Tá ke̱ta soꞌva ra i̱kan na, ta ndi̱kun ndi̱kasi na yeꞌe veꞌe ñuꞌu. 31Ra xa kaꞌni na ku ra ta ndi̱xaa tuꞌun nuu ra ndíso chiñu xiꞌin iin tiꞌvi nda lapa ya ndee ni kúu káni taꞌan ni na ñuu Jerusalén. 32Ñaa ndi̱kaya ra nda lapa xiꞌin nda naꞌnu nuu nda lapa. Ñaa ndi̱kundaka ra nda xínu nda kuaꞌan nda xiꞌin ra. Tá xi̱ni na xáa nduvaꞌa xiꞌin ra Pablo ya ndi̱xaa kuaꞌa ni nda lapa, ta saa xi̱kuiin na köo káni ka ñaꞌa na. 33Saa ku̱yati mií ra ndíso chiñu xiꞌin nda lapa ikán ta xa̱ꞌnda ra chiñu ya katun nda ndaꞌa ra Pablo xiꞌin uvi cadena. Ñaa ndi̱ndakan tuꞌun ñaꞌa ra, káchi ra saa:

―¿Unku yóꞌo̱, ta unkua i̱kan un kua yakan xáa nduvaꞌa ni na xiꞌin un? ―káchi ra xiꞌin ra Pablo.

34Täꞌan ka vi ndi̱kuiin ra Pablo kaꞌan ra ta iin ndi̱kuiso yaa na, xa síin ya káꞌan iin iin na, ta ni köo kúndaa ini ra unkua káꞌan vi na. Ñaa xa̱ꞌnda ra chiñu ya kundaka na ra Pablo kuꞌun ra ini cuartel nuu ndóo nda lapa ikán. 35Saa tá ndi̱xaa ra nuu escalera ikán ta vaꞌa ka nda̱niꞌi ni̱nù nda lapa ra kuaꞌan ra xiꞌin nda chi ndíkun naꞌa kuaꞌan na sata ra kúni na kaꞌni na ra. 36Ta iin ndáꞌi koꞌo na ndíkun na kuaꞌan na sata nda, iin ndá síso káꞌan na, káchi na saa:

―¡Kaꞌni ndo ra, ná kuvi ra! ―káchi na.

Ndíkani ra Pablo nuu na ya xáa chiñu ra nuu Ndioxi

37Tá chíkaa na ra Pablo ini cuartel ikán, saa ndi̱kaꞌan ra xiꞌin ra ndíso chiñu nuu nda lapa ikán, káchi ra saa:

―¿Án taxi un ná ndituꞌun loꞌo i xiꞌin un? ―káchi ra xiꞌin ra.

Saa ndi̱kuiin ra káꞌan ra:

―¿Án xíni un kaꞌan un tuꞌun griego? 38¿Án süvi yóꞌo̱ ku ra ke̱e ñuu Egipto ra ta̱va kumi mil taa nuu iku yuyu, ta nda xáꞌni ndìì ku nda ikán ―káchi ra xiꞌin ra Pablo.

39Saa ndi̱kuiin ra Pablo káꞌan ra:

―Yeꞌe judío va ku i, ta chí ñuu Tarso ke̱e i ya ndíkaa estado Cilicia, ndee ni ñuu ku mií ñuu i. Ta xíkan ni i ya mani nuu un taxi loꞌo un ná kaꞌan i xiꞌin na ñuu yóꞌó ―káchi ra.

40Saa ndi̱kuiin ra ikán káꞌan ra:

―Vaꞌa kaꞌan un xiꞌin va na ―káchi ra.

Saa ndi̱kundichi ra Pablo nuu escalera ikán, xíka ndaꞌa ra nuu na ya ná kutaxin yuꞌu na. Saa ku̱taxin yuꞌu na. Tá ku̱taxin yuꞌu na, ñaa xa̱á ra káꞌan ra xiꞌin na. Tuꞌun mií ra ya hebreo, káchi ra saa:

Currently Selected:

Los Hechos 21: xta

Highlight

Copy