Los Hechos 19

Ndi̱xaa ra Pablo ñuu Éfeso.

1Tá íyo ra Apolos ñuu Corinto ta inka ra Pablo xíka chí ñuu ya ndóꞌni chí iku, iin saa ndi̱xaa ra nda ñuu Éfeso ya ndíkaa yuꞌu nduta ñûꞌu. Tá ndi̱xaa ra ñuu ikán ta ndi̱kitaꞌan ra xiꞌin sava nda kándixa Jesús. 2Saa ndi̱ndakan tuꞌun ra nda ikán, káchi ra saa:

―¿Án ndi̱kiꞌin ndo Tachi I̱í Ndioxi tá xa̱á kándixa ndo Jesús? ―káchi ra xiꞌin nda.

Saa ndi̱kuiin nda káꞌan nda:

―Ni köo xíni nde án íyo Tachi I̱í Ndioxi ―káchi nda xiꞌin ra.

3Saa ndi̱kaꞌan ra xiꞌin nda, káchi ra saa:

―¿Ta unku tixin chi̱chi ndo? ―káchi ra xiꞌin nda.

Saa ndi̱kuiin nda káꞌan nda xiꞌin ra:

―Tixin ichí ya si̱naꞌa ra Juan kua chi̱chi nde ―káchi nda xiꞌin ra.

4Saa ndi̱kaꞌan ra xiꞌin nda, káchi ra saa:

―Ya ndaa kua si̱kuchi ra Juan naꞌa, na ndi̱ko koo ini xaꞌa kuachi na. Saa ndi̱kaꞌan tu ra xiꞌin na ya xíniñuꞌu na kandixa na Jesús, ra kixi sata mií ra Juan tá sindiꞌi, ta ra ikán kúu Cristo, ra ti̱ꞌvi Ndioxi ki̱xi ―káchi ra Pablo xiꞌin nda.

5Tá xi̱ni soꞌo nda ya ndi̱kaꞌan ra, ta saa ndi̱kuchi nda tixin kivi Jesús. 6Ñaa chi̱nuu ndaꞌa ra Pablo xiní nda ikán. Tá i̱kan ra saa xiꞌin nda ta xa̱a Tachi I̱í Ndioxi íyo ya xiꞌin nda. Saa xa̱á nda káꞌan nda inka nuu tuꞌun. Ta káꞌan tu nda tuꞌun yuꞌu Ndioxi va. 7Iin kuꞌva uxi uvi ku taa nda ndo̱ꞌo saa.

8Ta xáꞌan ra Pablo veꞌe ñuꞌu sinagoga ñuu Éfeso káꞌan ndoso ra tuꞌun Ndioxi xiꞌin na. Ta ndinuꞌu ni ini ra ndítuꞌun ra xiꞌin na ndíkani ra nuu na síxinu ra ini na ya ná kundaa ini na ndá kuꞌva kaꞌnda chiñu Ndioxi nuu na. Saa i̱kan ra xiꞌin na tixin uni yoo. 9Ta sava na köo ndi̱xiin kandixa ya káꞌan ra xaꞌa Jesús. Ñaa xa̱á na távi chiꞌña na ichí Jesús nuu ndiꞌi na ñúꞌu ini veꞌe ñuꞌu sinagoga ikán. Saa si̱ndoo ra na ta ndi̱kundaka ra na kándixa Jesús kuaꞌan na xiꞌin ra nda veꞌe escuela iin ra náni Tirano, ta ikán sínaꞌa ra na ndiꞌi saa kivi. 10Uvi kuiya i̱kan ra saa, ndi̱xika ra si̱naꞌa ra ndiꞌi mií na ndóo estado Asia ikán, xi̱ni soꞌo na judío tin na griego tuꞌun ya ndi̱kaꞌan ra xaꞌa Tata yo Jesús.

11Ta ta̱xi Ndioxi ndee ra ndaꞌa ra Pablo íkan ra kuaꞌa ni yatuꞌun Ndioxi. 12Sava na ndíso na taꞌan na, na kúꞌvi kuaꞌan na nuu ra Pablo, saa ndíso na toto án paíto na kuaꞌan xiꞌin na nuu ra saa chínuu na ya sata na kúꞌvi ta ndúvaꞌa na ikán. Nda na kúu mií tachi nduvaꞌa ta kée ya na, ndikun ndúvaꞌa na.

13Saa íyo sava nda judío, xíka nda táva nda tachi nduvaꞌa naꞌa. Ñaa xi̱ni soꞌo nda xaꞌa ya íkan ra Pablo, saa xa̱á kúni nda ikan nda tá íkan ra. Kúni nda tava nda tachi nduvaꞌa xiꞌin kivi Jesús, káchi nda saa:

―Xiꞌin ndee Jesús, ra káꞌan ndoso ra Pablo xaꞌa xáꞌnda chiñu nde nuu ndo, saña ndo na yóꞌó ―káchi nda ikán xiꞌin tachi nduvaꞌa.

14Saa ndi̱xiyo tu uxa nda seꞌe iin ra judío ra xáꞌnda chiñu nuu nda sutu, ra náni Esceva. Saa i̱kan uxa saa nda. 15Saa kúu nda ikán káꞌan nda xiꞌin tachi nduvaꞌa ya kúu mií iin ra taa. Ñaa ndi̱kuiin ya káchi ya saa:

―Xíni i unku Jesús, ta xíni tu i unku ra Pablo va, sundi ndóꞌo̱, ta köo xíni nde ndóꞌo̱ ―káchi tachi nduvaꞌa xiꞌin nda.

16Ñaa nda̱va ra kúu mií tachi nduvaꞌa ikán sata uxa saa nda, ta ku̱chiñu ra xiꞌin nda xa̱á ra ndinuni loꞌo xáa nduvaꞌa ra xiꞌin nda. Iin ti̱kueꞌe yaa nda, ta iin ndi̱taꞌnda yaa toto nda, mi chala mií ku nda ka̱na koo nda kuaꞌan nda. 17Saa ku̱ndaa ini ndiꞌi na ndóo ñuu Éfeso ikán. Ku̱ndaa ini na judío xiꞌin na griego xaꞌa ya ndo̱ꞌo nda ikán. Ñaa xa̱á íꞌvi ni na, saa xa̱á toꞌo ni na kivi Tata yo Jesús.

18Ta kuaꞌa ni na xa̱á kándixa Jesús, ta ndi̱xaa na náꞌma na xaꞌa kuachi na, ya väꞌa i̱kan na yachi. 19Ta kuaꞌa ni tu na xa̱a tasi ta ndíso ndiꞌi na tutu ikán ndi̱xaa xiꞌin na, ta nuu ndiꞌi na saa xa̱ꞌmi na ya. Ta̱va na kuenta ndisaa xuꞌun ku tutu ikán, ta kuaꞌa ni xuꞌun ñúꞌu ya: uvi xiko uxi mil kàà vaꞌa, ya plata, kua ndáa yaꞌvi ya. 20Ndiꞌi saa kivi xáꞌnu ka tuꞌun Ndioxi ndúndee ni ya ini na, saa ndúkuaꞌa ni ka na kándixa Tata yo Jesús.

21Ta saa ndi̱kani ini ra Pablo kuꞌun ra estado Macedonia xiꞌin estado Acaya. Tá ndiꞌi ikán ta ndiko koo ra kuꞌun ra chí ñuu Jerusalén, ta ikán kee ra kuꞌun ra nda ñuu Roma, káꞌán ra. 22Ñaa ti̱ꞌvi ra uvi nda chíndee taꞌan xiꞌin ra kuaꞌan nda estado Macedonia: ra Timoteo xiꞌin ra Erasto ku nda. Ta ndi̱ndoo mií ra soo uvi ndaa ka kivi estado Asia nuu ndíkaa ñuu Éfeso.

Ndi̱katin na ñuu Éfeso síkuaꞌa na kuachi xiꞌin ra Pablo

23Suvi kivi ikán tá íyo ra Pablo ñuu Éfeso, saa ka̱ku iin kuachi chee ni xiꞌin ra xaꞌa tuꞌun Jesús. 24Iin ra náni Demetrio ku ra i̱kan saa, chi kúu mií ra chiñu síkuaꞌa ra ñaꞌa vali xiꞌin kàà ya plata. Síkuaꞌa ra naꞌna vali veꞌe ñuꞌu yá Diana. Ta vaꞌa ni kée ra ikán xiꞌin chiñu ra, táva ni ya xuꞌun nuu ra. 25Xaꞌa ya ikán kua si̱kitaꞌan ndiꞌi ra na xáa chiñu nuu ra tin ndiꞌi ka na xáa chiñu xiꞌin chiñu ikán, ka̱na ra na káꞌan ra xiꞌin na, káchi ra saa:

―Na taꞌan yo, xa xíni mií ndo chiñu yóꞌó kua chíndee ni yoo yakan vaꞌa ni kée yo. 26Ta xi̱ni soꞌo mií ndo saa xíto ndo unkua íkan ra káꞌan na xiꞌin Pablo. Xíka ra síndaꞌvi ra naꞌa, káꞌan ra xiꞌin na süvi ndioxi ku naꞌna ya síkuaꞌa ndaꞌa yo, káchi ra. Ta xa kuaꞌa ni na sáka ra xiní xaꞌa ya káꞌan ra. Süvi iindaa ñuu Éfeso yóꞌó ndi̱kan ra saa ndiꞌi ni kúu ñuu estado Asia yóꞌó xíka ra íkan ra saa. 27Süvi iindaa chiñu yo ìyo ndiꞌi xaꞌa, nda veꞌe ñuꞌu siꞌí yo ìyo ndiꞌi xaꞌa, ta ni köo ka na kaꞌan xaꞌa yá xaa toꞌo ñaꞌa na. Ta ìyo ni ndiꞌi xaꞌa ya toꞌo kúu mií yá nuu ndiꞌi na káñuꞌu ñaꞌa estado Asia yóꞌó xiꞌin ndiꞌi na ndóo ndiꞌi saa ñuu ivi ―káchi ra Demetrio xiꞌin na ikán.

28Tá xi̱ni soꞌo na ndóo ikán ya ndi̱kaꞌan ra, saa ndi̱saa ni na. Ñaa xa̱á ndáꞌi koꞌo na, káchi na saa:

―¡Iindaa siꞌí yo Diana kú ndioxi káñuꞌu yo ñuu Éfeso yóꞌó! ―káchi na.

29Ñaa iin ndi̱siso ndiꞌi na ñuu, ndá síso ndáꞌi na. Ta saa ti̱in na uvi nda taꞌan ra Pablo, ra náni Gayo xiꞌin ra Aristarco, nda ke̱e chí estado Macedonia. Tá ti̱in ñaꞌa na, saa ndi̱kundaka na nda kuaꞌan nda xiꞌin na nuu si̱kuaꞌa na ndíkitaꞌan kuaꞌa ni naꞌa, ya káꞌan na xiꞌin teatro. 30Saa kúni ra Pablo kiꞌvi ra ini nuu chútu na ikán kaꞌan ra xiꞌin na. Ta köo ndi̱xiin na ndíkun Jesús taxi na kiꞌvi ra. 31Nda sava mií na chiñu na xíni taꞌan ra xiꞌin ndóo mi estado Asia ikán, ta köo ndi̱xiin na kiꞌvi ra. Ti̱ꞌvi na tutu kuaꞌan ndaꞌa ra nuu xíkan na ya mani nuu ra ya ná kïꞌvi ra. 32Chi iin ndá síso yaa ndáꞌi na, xa síin ya káꞌan iin iin na, iin ndi̱saka soꞌva ini na, ta sava na ni köo xíni na ndá xaꞌa kua ndi̱xaa na. 33Ta saa ta̱va na judío iin ra náni Alejandro chi̱ndaꞌa na ra tañu na ikán ya kaꞌan ra xiꞌin ndiꞌi na, ñaa xa̱á íkan ra seña xiꞌin ndaꞌa ra nuu na ya ná kutaxin yuꞌu na, chi kúni ra ndikiꞌin ra tuꞌun na judío nuu na ñuu ikán. 34Saa tá ku̱ndaa ini ndiꞌi na ya kúu ra Alejandro ikán ra judío, ta köo ndi̱xiin ka na kuni soꞌo na ya káꞌan ra. Saa iin ndi̱kuiso tuku na xa̱á na ndáꞌi koꞌo na, saa i̱kan na iin kuꞌva uvi hora, káchi na saa:

―¡Siꞌí yo yá Diana kúu ndioxi káñuꞌu yo ñuu Éfeso yóꞌó! ―káchi na.

35Saa ndi̱kaꞌan ra secretario xiꞌin na ya kutaxin yuꞌu na. Tá ku̱taxin yuꞌu na, saa xa̱á ra káꞌan ra xiꞌin na, káchi ra saa:

―Na taꞌan yo ñuu Éfeso yoꞌo, köo naꞌa köo xíni, chi xa ndiꞌi va na inka ñuu xíni, siꞌí yo yá Diana ku yá ndáa ñuu yo ta saa tu naꞌna va yá chi nuu ndivi ke̱ta ya ndi̱kava nuu ñuꞌú. 36Ta nda iin na küvi ndikuaa ya káꞌan i xaꞌa xiꞌin ndo, chi ya ndaa kua káꞌan i xiꞌin ndo. Yakan vaꞌa ka kutaxin yuꞌu ndo ta nda iin ya ïkan ndo xaꞌa ya sáa ini ndo. 37Tá kúu vitin ndáka ndo nda yóꞌó xa̱a nda xiꞌin ndo, ta köo ya ndi̱kan nda xiꞌin veꞌe ñuꞌu siꞌí yo ni köo kánaꞌa nda xaꞌa yá. 38Tá tu ra Demetrio xiꞌin nda taꞌan ra kúni ra taxi ra kuachi xaꞌa nda, ta vaꞌa ná kuꞌun ra veꞌe chiñu taxi ra kuachi xaꞌa nda. Ikán íyo na chiñu xiꞌin na juez xaa nani na kuachi xiꞌin ra. 39Tá ndá inka kuachi kúni ndo taxi ndo xaꞌa nda, ta xíniñuꞌu kuꞌun ndo nuu na chiñu ya ná xaa nani na kuachi ndo xiꞌin ya ndaa. 40Ta vitin ìyo ni taxi na chiñu naꞌnu kuachi xaꞌa yo xaꞌa ya si̱kaku ndo kuachi yóꞌó. Tá ná ndakan tuꞌun na yoo ndá xaꞌa kua si̱kaku yo kuachi, ¿ta unkua kachi yo xiꞌin na?, küchiñu ndeꞌe ndikuiin nde xaꞌa ya ―káchi ra secretario ikán xiꞌin na.

41Tá si̱ndiꞌi ra ndi̱kaꞌan ra xiꞌin na, saa nda̱i ra na kuanuꞌu na veꞌe na.

Currently Selected:

Los Hechos 19: xta

Highlight

Copy