YAKOBO 4

Bitěmire kuba mwira we'butala

1Emalwa ne'mbangano bya bìri mwa kachi-kachi kenyu, ngai yi bìtengire? Bìtengire mwa myasi ye'buhuma-huma era yénjire yálwisanya mwa michima yenyu. 2Mwénjire mwáhonda mubóne kandu karebe, si mutábona'ko. Mwénjire mwêta, na kufa mufula, si mutánabona cha mwáhonda. Bushi no'ku, mwénjire mwálwa na kubangana. Muténjire mwábona cha mwáhonda bushi muténjire mwéma chi era mwa Ongo. 3Mango mwéma, muténjire mwábona kandu, bushi mwénjire mwéma bulio, mwákuhonda kusimisa ebuhuma-huma bwenyu.

4Emu barenzi mwa myasi ya Ongo! Mùteshi kwa ekuba mwira we'butala kùli kuchiira murenda wa Ongo? Bushi, emundu ola ulí mwira we'butala, aményaa kwa àchiirire murenda wa Ongo. 5Mùtachichingaa mbu kwa buha kwe'Maanjiko Mabuya-buya matúla màtechire mbu: «Ongo énde áfa mufula busese bushi ne'Muchima Mubuya-buya ola ábikire mwa ndanda senyu.» 6Si Ongo átuiririre mabuya manene, bushi eMaanjiko Mabuya-buya matúla màtechire mbu: «Ongo énde álwisa ebandu be'rume, si ebarembu énde ábairira emabuya.»#4:6 Somaa Mianyi 3:34. 7Bushi no'ku, mundaa mwáchirembeka era muhondo sa Ongo, na kunde mwálwisa Wamusimu, mwa bacha angénde áhaira bure nenyu. 8Mundaa mwáchifunda ofu na Ongo, nai angáchifunda ofu nenyu. Mu bakosi be'mabi, mundaa mwákomya emino senyu, nenyu mu bandu be'michima ebiri, mundaa mwákomya emichima yenyu. 9Mubáa mwa businane, mulíraa na kuchǎnya! Emasheka menyu mabíndukaa kuba malira! Ne'lumoo lwenyu, lubíndukaa kuba businane! 10Mundaa mwáchandaasa era muhondo sa Enawetu, nai angáberusa.

Uténdaa wáchinjibusa munyakenyu

11Banyaketu, muténdaa mwâmaanana bulio. Bushi ola wáteta bulio era luulu sa munyakabo nesi ámuchinjibusa eri àtechire bulio era luulu se'Mwaso*, na kutonganya'o. Mwa kuira bacha, eri wáchinjibusa eMwaso*, wa kuira ngo'kwa àtechire. 12Ongo yeine oshâo, iwábikaa eMwaso*. Kanji yeine oshâo i'unête ebuashi bwe'kuchinjibusa. Kanji yeine i'ùnête ebuashi bwe'kununula ne'kwîta. Rero, woyo ùli nde kwa kuchinjibusa mulikenyu?

Ekuchitonga kutakomire

13Rero, munyûmvirisaa mu mwénjire mwáteta mbu: «Lwarero nesi mishangya, tungáya mu musi murebe, tungámala'mu mwaka wa mutenga twáchimbula na kubona mutoloke.» 14Si mùteshi kute ekalamo kenyu kangába mishangya! Bushi mùli nga mùsi ola ùseneke'ko ku bihangi bieke, chasinda ánairima. 15Mwabo mungénjire mwáteta mbu: «Enawetu ákasima, tungába'o, na kuira chechine nesi chechira.» 16Si rero, mwénjire mwáchihuta ala kabali, na kúchitonga. Ekúchitonga kwa kuli ngo'ku, kutakomire. 17Rero akaba emundu èshi kuira emabuya, si àtaira'mo, aola aményaa kwa aírire bibi.

Currently Selected:

YAKOBO 4: tbt

Highlight

Copy

Compare