YAKOBO 5

Emwamo kwa baare

1Rero mwabo mu baare mǔmvirisaa! Mulíraa na kuchǎnya, bushi ne'buanya bwa bungábaikira. 2Ebuare bwenyu bwabólire ne'njimba senyu salírwe ne'kaembe. 3Ehoro ne'buteya bwenyu byàhukire luhwarenge, no'lu luhwarenge bu bukánaba bubei bwe'i myasi. Kanji bu bukánasingonola emibiri yenyu ngo'kwa muliro énde ánasingonola. Mwachíbikirire emwandu mwe'sine suku se'businda bwe'butala. 4Mulólaa, mwanányire kufua ebakosi ba bábakoreraa mwa mahwa menyu. Rero kulira ku bálira, emilakango ya'bu bakosi yanáikire mwa matwi ma Enawetu Ongo iwábumbaa byoshi. 5Mwabáa mùli mwa muako na kunde mwáchimoeresa mwa kalamo kenyu kwa butala. Mwabáa mwénjire mwáchifesa nga nyama sa sálinjira elusuku lwe'kukeribwa. 6Mwàchinjibusaa na kwîta ebandu ba bàtungenene, chiro bákanaroka.

Ekuata ebushibirisi mwa malibuko

7Rero banyaketu, mundaa mwáata ebushibirisi kuikira mango Enawetu akáfuluka. Mulólaa kute kwa muinzi énde álinjirira ashébule emyaka era yète mutoloke munene mwe'hwa lyai. Ende álinjirira kuikira mango emvula sibere-bere ne'sisinda-sinda sitówe. 8Nenyu, mundaa mwáata bushibirisi na kusesa emuchima, bushi Enawetu àli ofu kufuluka.

9Banyaketu, muténdaa mwásibukirana, Ongo angesha kubachinjibusa. Mulólaa, emuishi we'manja kwa chiso ku era àli!

10Banyaketu, mundaa mwákengera ebarebi* ba béndee báreba kwe'sina lya Enawetu. Mulólaa kwa béndee báata ebushibirisi mwa malibuko, nenyu mundaa mwêya'bo. 11Twénde twáteta mbu abu bandu báahanyirwe bushi bábaa béte bushibirisi. Mwômvire kute Yobu ábaa atúsa ebushibirisi, kanji mwìshi no'kwa Enawetu ámuiriraa kwa businda. Kubinali, Enawetu atúla wa bonjo bunene kanji atúla mubuya.

12Rero era muhondo sa byoshi banyaketu, muténdaa mwálaisa. Mùtalaisaa kwe'sina lye'nguba, nesi kwe'sina lye'butala, nesi kwe'sina lya kanji kandu koshi. Ekwêmerera kunábaa kwêmerera, ne'kunana kunábaa kunana, Ongo angesha kubàchinjibusa.

Ekwéma Ongo ne'bwemeresi

13Mwa kachi-kachi kenyu mùli mundu ola wálibuka? Émaa Ongo. Kuli ola ulí mwa lumoo? Émbaa nyimbo sa kutonga Ongo. 14Mwa kachi-kachi kenyu mùli mulwala? Ǎmáalaa ebangumwa be'luhu lwa Ongo, bamwěmere mwa kumwakaba emafuta kwe'sina lya Enawetu. 15Bákema ne'bwemeresi oyu mulwala angálama, bushi Enawetu angáhuba kumwěnamula. Na akaba abáa àkolire bibi, angábabalirwa. 16Rero, mundaa mwáchiaya kwa bibi byenyu, chira mundu era muhondo sa mulikabo, na kunde mwémerana chasiya mulámisibwe. Ememo me'mundu ola ùtungenene era muhondo sa Ongo, matúsa buashi bunene. 17Eliya ábaa mundu kuuma netu. Era kwéma Ongo na bushiru mbu emvula ìtatowaa. Emvula chiro íkatoa kwa chitaka ku myaka ehatu na myesi ndatu. 18Chasinda, era kuhuba kwéma, enguba yera kutosa emvula, ne'chitaka chera kwêsa emyaka.

19Banyaketu, akaba muuma mu mwabo aíre bure ne'myasi ye'kanangana, chasinda unji mundu ánahuba kumufulusa, 20muményaa kwa ola wàfulusise emukosi we'bibi kutenga mwa njira yai ibi, angába anúnwire ekalamo kwo'yu mundu mwa lufu, na Ongo angámubabalira ku mabi manene.

Currently Selected:

YAKOBO 5: tbt

Highlight

Copy

Compare