BAEBURANIYA 6

Ekasibu ke'kureka ebwemeresi

1Bushi no'ku, tuéndekeraa era muhondo, mwa kunde twáchikangirisa emyasi era bandu ba bera basene bàngachikangirisa. Tùteshibiraa oshâo kwa myasi ibere-bere era twáchikangirisaa era luulu sa Kirisito, nga kuno ekubindula emichima yenyu iténge mwa myanya ibi era yénde yáreta elufu, nesi emyasi era ìtechire era luulu se'kwêmerera Ongo, 2nesi era luulu se'myasi era yěrekere enjira soshi se'kubatisa ebandu,#6:2 Enjira soshi se'kubatisa ebandu: Esi njira se'kubatisa ebandu sìngaba nga kuno kwa Bayuta béndee bôwa emibiri yabo kwa kuchikomya*, nesi ebubatiso bwa Yowani éndee áira, nesi ebubatiso bwe'bakirisito. Somaa Mikolo ye'ndumwa 18:25, 19:3-6. nesi era luulu se'kwémera ebandu mwa kubabika kwe'mino,#6:2 Ekwemera emundu mwa kumubika kwe'mino, kwábaa kuteta kwa oyu mundu erésibwe lwêmbo lwe'Muchima Mubuya-buya, nesi ngahanyi, nesi alámisibwe. nesi era luulu se'kwômoka kwe'bafu, nesi era luulu se'buchinjibusi bwe'suku ne'mango. 3Rero Ongo ákasima tungére twénde twákangirisa emyasi ye'bandu ba bera basene.

4Kuli bandu ba bálomekerwe mira ne'bulangare bwa Ongo, na kutoma kwa lwêmbo lwa lwátenga kwa nguba, na kubona ebuashi bwe'Muchima Mubuya-buya. 5Kanji abu bandu bátomire no'kwa buloke bwe'chinwa cha Ongo ne'buashi bwe'butala bwa bukáika. 6Si chiro bacha, bárekire ebwemeresi. Abu bandu, ekufulusa'bo kutangachalikana kuikira echihangi báhuba kubinduka bátenga mwa myanya yabo ibi. Bushi beine bénde bába bamányikire eMwana wa Ongo ebwakabiri na kutuma ebandu bámukena.

7Echitaka cha chátowera kwe'mvula chira mango, na kukusisa ebainzi emyaka era ikomire, chénde chába cháahanyirwe na Ongo. 8Si akaba echi chitaka chìngamesa mihoi-hoi ne'chashingi, eri chitéte mufa asibya. Aola, chénde chába chìri ofu kutakirwa na Ongo, ne'businda bwachi kuli kwóchibwa.

9Banyaketu basiirwa, chiro angaba mbu twàtechire bacha, si tunêshi kanangana kwa mùkulikire enjira era ìkomire busese, ye'bununusi. 10Ongo énde áira bya bìtungenene. Àtangěbirira emulimo wenyu, ne'nzii era mwalósaa bushi ne'sina lyai, kukulikana no'kwa mwàasaa ebandu bai, no'kwa munáchiri mwáendekera kuasa'bo. 11Si kanji twáhonda chira muuma mu mwabo aéndekeraa kuata obu bushiru kuikira kwa businda, chasiya ei myasi mutúla muchinyiire ibérere kanangana. 12Rero mùtabaa ngalisi, si mundaa mwêya ba bêmerere, béte ne'bushibirisi. Abola bu bénde bábona bya Ongo álaanyaa.

Echiraane cha Ongo chìtangabinduka

13Mango Ongo êresaa Aburahamu echiraane, ákulikisaa'chi kwe'kulaisa. Rero, bushi kutáli unji mundu ola ulí mukulu-kulu kurenza Ongo, chasiya aláise era muhondo sai, Ongo era kwire álaisa kwe'sina lyai yeine. 14Era kuteta mbu: «Kanangana, nyikákuahanyira busese, ne'lubuto lwao, nyikáira'lo kuba lunene busese.»#6:14 Somaa Ndangiriso 22:17. 15Era nyuma se'kulinjirira na bushibirisi, Aburahamu era kwire ábona bya Ongo ámulaanyaa.

16Bushi mango ebandu bálaisa, bénde bálaisa kwe'sina lye'mundu ola ulí mukulu-kulu kurenza'bo. Mwa bacha, oku kulaisa kwabo kwanalosa ekanangana ke'bya báteta, kwanamala ne'bwaka mwa kachi-kachi kabo. 17Ongo ábaa áhonda alóse changanama ba bakábona bya álanyaa, kwa àtangabindula emwasi ola áfunjikaa chiro na hicha. Bushi no'ku, era kwire ákulikisa echiraane chai kwe'kulaisa. 18Kutúla myasi ebiri era ìtabinduka: echiraane, ne'kulaisa. Na kwa bya byèrekere ei myasi, chìtangaalikana mbu Ongo afúle bisha. Rero, echera chi chénde chátusesa emuchima busese. Bushi no'ku, twarékire byoshi na kusimika mwa munyiiro ola Ongo átulaanyise. 19Oyu munyiiro, àli nge'chuma cha chénde chátuma emashuwa másimika kwa meshi mango memángire, bushi iwénde wátuma ekalamo ketu kásimika na kusera. Kanji oyu munyiiro, áulukanyire mira mwa ngwaya#6:19 Echuma cha chàmaanyirwe anola, chitúla chuma chinene cha bénde báminyira kwa mashuwa mwa bureure. Mwa kuba emashuwa memángire, bénde báuma'chi era mubi, emashuwa mangesha kuliya-liya. era yáhumba mwa luhu lwa Ongo kwa nguba#6:19 Engwaya: Mwa luhu lwa Ongo mwéndee mwáhumba ngwaya era yábaa ìrikanyise eChisiki Chibuya-buya* ne'Chisiki Chibuya-buya Busese*. Somaa Balawi 16:2. , na êngirira mwa Chisiki Chibuya-buya* busese. 20Aola, u'Yesu engíriraa mubere-bere bushi ne'tu, chasiya énde átwaasa. Rero iwérire wába Mukulu-kulu wetu we'bakuhanyi* esuku ne'mango nga Merikiseteki.

Currently Selected:

BAEBURANIYA 6: tbt

Highlight

Copy

Compare