Maatiyoosi 23
23
Yesuusi akka kolissampaya seera isho Feresaata qootishe
Maari 12:38-39; Luqa 11:43-46; 20:45-46
1Sekkammaayye Yesuusi samayta isho tamaarewwaadi'i kide, 2“Kollissampaya a seera isho Feresaata pora Muuse oppa'e kollissa qaa'en. 3Semmalla wa ishootta ishina kiinaane piisa koda; ka tooytaada ma xoori ishootta wa haasawannaane kooni in caaneey; ishina wa ishootta koonaane in kodan. 4Ishootta haadeeta ulsa ka orra miiddinitto ollopa hiddini ka xashshitta qara nama qapni, umma haadese quda qupittan teriisa ka qappatta nefo in heenan. 5Kodaaysho a koonaan, piisa akka orra ishootta akko mallaaw kooni; ishootta quraamaaysho a qaaleta Waaqa a miintoppa hiddannaane pappaldisanni. Ka ohawwaasso mina kayla dedderaysanni#Maati 6:1; dikoota 15:38; ooreta 6:8 . 6Ishootta tika sankultatiiyyi pora ulfeena'ew jaalanni ka tikkasene a orra Yihuta a qinseeta kela fuula tura kutiittaaw faani; 7ka urmaladdaappaayyeew, akka orra ishootta kaareta oorsho ka ‘Kollissampayaay’ kido jaalanni. 8Ishina xoori kollissampaytaayshin qoota takkaaw kode malla, ishina nefo ka hella toola takka kodditen malla, orra ‘Kollissampayaay’ ishina in kiinin ka ishina in haleenin. 9Ishina qoota moonte appa takka pattaaw qaptan malla, piita qaraayye nama takka nefo ‘aappo’ in kidan ka in halan. 10Ookittaayshin a kutta qoota Kiristoosi patta kodde malla; orra ‘Ookka kukutta’ Ishina in kiinin ka ishina in haleenin. 11Ishin oppaayye nama ishin piisa qara qapo, a orxaytaashin koddo#Maati 20:26-27; Maari 9:35; 10:43-44; Luqa 22:26. 12Nama mattaadi opeela kuttinno piisa, xata shakkada; nama mattaadi xata shakkinno piisa ka opeela kuttada. #Luqa 14:11; 18:14
13Pappahanassampayaay, Feresaateeyye isho kollissampaya a seeratiiyyi, oo ishin kido! Ishina akkima nama mankisteeta moonta oppopa in kallini'i, orra tura xarra dufnittan, umma ishina mattaayshina mankisteetase a moonta oppopa a kalli a kittan ka orra kulla heeno nefo dawrinittan.
14[“Pappahanassampayaay, Feresaateeyye ka kollissampaya a seeratiiyyi, oo ishin kido! Ishina qinseetaayshin a derannittan minan wa hiyyeettewwa a aappadaasso qara le'ene ishin tikumannaane dammittaneey; a kuttati ishina qara faratamta.]
15Pappahanassampayaay, Feresaateeyye isho kollissampaya a seeratiiyyi, oo ishin kido! Ishina nama takka amanteetaayshin oppopa kalissa'e piitadda isho pakatewwa qara pora tittiitaawnittan ka oto nama takka amanteetaayshin oppopa kalissan kammaayye, akka ishin qaropa harka lakki apittase libbini in kinnini opopa kalta harmisado koonittan.
16Ishina saarra a ildaan pateetiiyyi, oo ishin kido! Ishina ikiinittane ‘Nama oton tika qulqullootatinni xaxanniiyyi, we in qapto, ma oton warqeeta tika qulqullootatinni xaxanniiyyi, xaxaadi pooteeta in ettansho;’ 17Ishina ildaan pate eeppaaye; warqeese isho tikase a qulqulloota warqeese qulqullannitto oppaayye a xaame jaalli? 18Ka kiinittaneewwe, ‘Nama oton pora kalisootatinni xaxanniiyyi, we in qapto ma, oton kalisootase pora kalisoota qara kittonne xaxanniiyyi, xaxaadi pooteeta in ettansho.’ 19Ishina a ildaan pate, kalisoota isho porase kalisoota qulqullanno oppa a xaame jaalli? 20Semmalla nama porase a kalisootatin xaxanno, porase a kalisoota isho wa qara ca piisanne xaxanni. 21Nama tika qulqullootatin xaxanno, tikase a qulqulloota isho Waaqase tikase a qulqulloota kela kalo kulinni xaxanni. 22Nama a moontan xaxannoow, sufaanase a Waaqa isho isase sufaana qara kutiino kulinni xaxanni. #Issa 66:1; Maati 5:34
23Pappahanassampayaay, Feresaateeyye ka kollissampaya a seeratiiyyi, oo ishin kido! Ishina iffayyadda ka jalatawwa ka kontikoossadda isho kirdifaaya kuli qaraayye kuma kundatta daannittan, ma xoori seeroppaayye wa sene akata parpaaccisna'e, alle diinnittan. Ishootta nefo, mura dukaata ka diissata isho amanuma. Helani, allu a ataakane a diinnin mali sene kodeeta ishin parpaaccisini. #Lewi 27:30 24Ishina saarra ildaan pateetiiyyi, wa kuunyetopa ca'e tufannittan ka wa kaalopa ca loqnittan.
25Pappahanassampayaay, Feresaata isho kollissampaya a seeratiiyyi, oo ishin kido! Ishina qudandelaaw qorewwa isho kuppaayyadda jaqnittan ma, karan xata sara isho yootanne immakaatten. 26Atti feresitto ke a ildaan pate, paayyota qoreeta karan xata isho kuppaayya karan xata jaqe, sitiiyyi kuli qudandela paxaarnaadaneey.
27Pappahanassampayaay, Feresaata isho kollissampaya a seeratiiyyi, oo ishin kido! Ishina hawlalla a laka tulan aannatan daatame ka paxaara ma, xoori karan xata lafa orra le'e isho wa japjape piisan immakaade'e pahatan. #Maati 3:7; 12:34; Luqa 3:7 28Ishina asseewwe laka tulan fuula orra tura hanqeellaya pahatan ma, karan xata pappahanassa isho neequmtanne immakaatten.
29Pappahanassampayaay, Feresaata isho kollissampaya a seeratiiyyi, oo ishin kido! Ishina hawlalla xuumampaya'e qupnittan ka waakka hanqeellaya quda sirrittan; 30ka kiinittane, ‘Katin xelta a aappadaanno a xattatin kinna kiitiiyyi, ino aappadaanno olliiyyi xuumampaya lenni an heenne.’ 31Semmalla, akkima sanynyeeta orra a xuumampaya lesse kodditen, ishinaaw isi qara maakkummi. 32Oori, kodase a aappadaassin paayyen kela dikkishanka. 33Ishina maakaddaay ka nyalqa puutotati, Firteetase a apitta libbini in kinnin kela atta pahatan#Maati 3:7; 12:34; Luqa 3:7?
34“Semmalla tooy, xuumampaya ka ookka isho kollissampayaan ishin oppopa erka; akka ishoottoppa a demo lessan ka a demo fannistan ka a demo tikkasene xaayshin a qinseeta kela oppa karaftan ka katama takkane desa a pila opa kamma daantan. 35Seminan diikase a Apeeli a hanqeellittati paayyatte haka diika a Sakkariyaasi a inna a Paraakiyya, isase a tika qulqulloota isho a pora kalisootatiiyyi otanta kara ikasseneti'i, diika hanqeellaya a piita qara' tuqame piisa kapa'e, akka qatta'amtan. #uuma 4:8; otoo a 2ta 24:20-21 36Anti dukaatannen ishina' kiini, qitaatese piisa xeltose are kitto qara' kaya.”
Yesuusi akka Yursaalami malla pooye
Luqa 13:34-35
37Kammaddesa Yesuusi ikide, “Oo Yursaalami! oo Yursaalami! Ke a xuumampaya lennitto ka a ke karopa erkame dakaan dakkinitto ka lennitto, akka lukkalitteeta jiwjiwaadi xoolla kelopa oorsannitto mina'e, meeqaannen hellaatti ollopa oorsatta fade; atti xoori a heennaanne. 38Semmalla tin tikaayshin i'onta ka lulle hasta#Er 22:5. 39In ishina kiini, haka ‘A maxxa Poqallaatin deeno, a eeppisame’ kiitan kara'e, ana a akkitan.” #mas 118:26
