Maatiyoosi 22
22
Pahanasene a sankulta hemitta
Luqa 14:15-24
1Yesuusi ka oppa ooreew ka pahanaan ishootta haasawadeew ka kide, 2“Mankisteeta moonta nuqusa takka a innaadi heminaan ikka ishi sankulta kode pahata. 3Nuqusase ka akka orrase a halaade sankultase oppopa de'o'e, akka ishootta lelane'e; orxayaadi ishootta kamma erke. Orrase xoori, sankultase oppopa deena in heennaanne.
4“Nuqusase ka oppa ooreew ka orxayaadi a pila erkeew ka kide, ‘Aana ka orrase sankultiyyo halaame kida: Sankultiyyo a hemitta iharmisamte, xormadaayyo isho meertadaayyo iqalamen, we piisa ka qoobbaweneey, sankultiyyo a hemitta oppopa xooya.’ 5Ishootta xoori sede we kapa in dikne ma takka dulaadippopa sookade. Takka ka heraadi kamma aanade. 6A ata hase'ew orxayasene qaqqapen ka jeershen ka oppa qiden ka leyshen. 7Nuqusase ka miirode ka xelaadi a oranna erke ka akka orrose orxayaadi leyshe piran ka katamaddaasso apittan kupane kode. 8Ka sekkammaaye orxayaadi kide, ‘Sankultase a hemitta iharmisamte, ma xoori orra sankulseeti halaame sankultose mina in qanneey. 9Semmalla porra kapopa aana ka nama a akkitan piisa sankultose oppopa hala.’ 10Orxayasene ka porra kapopa aanen ka nama a akken ukkuttowwa isho hanqeellaya piisa ollopa halen. Tikase a damta ka orran immakaatte.
11“Nuqusase ka orrase halaame tooyya'e tikase a damta kelopa kulle ka tikase kelaayye nama takka a mehadda sarkeeta in kalsannin akke. 12Ka namaseti kide, ‘Innayti, a mehadda sarkeeta a kalsannin mali atta arepa kullite?’ Namase umma oppa in oorinne. 13Nuqusase ka orxayaadi kide, ‘Harka isho loqqa tupa hida ka tukkantase laka tula kitto oppopa kata. Eyyeeyye oori pooyta ka ilka ollin qomeeta patta koddita.’” #Maati 8:12; 25:30; Luqa 13:28
14Kammadesaaw Yesuusi ikide “Orra a halaame ileki; a reexame xoori shakkaytaaw.”
Kaassuma qoota kipira daassatati desa dehaade
Maari 12:13-17; Luqa 20:20-26
15Sekkammaaye Feresaata akka afa talafan Yesuusi qapto'e ante ka olli sulatte. 16Ka tamaarewwaasso isho kola Herodiisi Yesuusi kapopa erkite. Ishootta ka Yesuusi kaassaden ka kidene, “Kollissampayto, atti akkima dukollayta koddite ka qoota saanta Waaqati desa dukaatan kollinnitto in upna, umma nama fuureetan wa koonitta in caan, umma orra oli qaran a jaalinni a kittooy, 17intoonne ino leleey, maana ke pahata hela seerinno oppaayye nuqusase kutta a piita Roomiti kipira daassata ifaqqatamem, mon in faqqatamme?”
18Yesuusi xoori dikattaaysho a neeqa upnaade ka ishootta oorshe ka kide, “Ishina pappahanassampayaay, maana malla afa talafa ana qara faanittan? 19Me intoonnooy dakara pirreeta a kipira daannaan ana akkishaay.” Ikka dakattase a pirreeta takkan de'en ka ishi akkishen.
20Isha ka ishootta kaassade ka kide, “pahanoosen are qara ca isho maxxose are qara taafame, a ayno?”
21Ishootta ka ishi oorshen ka kidene, “A nuqusase kutta a piita Roomiti.” Isha ka oori ishootta oorshe ka kide, “Ka asseeyye, a nuqusa Roomi nuqusa Roomiti daasha ka a Waaqa Waaqa daasha.” 22Ishootta ka ete sede dakayeneeye, haasoosen xaadippa qawwaawen ka alle isha kapa tawen.
Tootoppa xaana
Maari 12:18-27; Luqa 20:27-40
23Awsetiiyyiiw, Saatuqaata a kiinitto, “Tootoppa xaana in caan.” Ka isha kapopa deete ka isha kaassatte ka kiite,#koda 23:8 24“Kollissampayto, Muuse ikide, ‘Nama oton a hella in xaaynin mali iskatteetaadi qara to'ayye, innaasso a iskatteetaadi quda ooro ka oppaayye ishi hella xaayo.’ #ooreta 25:5 25Hella diira a toola takka tappa ka inoppa kalan, qarta ka heme ka a in xaaynin mali to'e. Kussitta a isha kamma qato ka iskatteetase quda oore; 26kussitta lammatta isho a sessatta ka haka kussita tappattati tara taran iskatteese quda ooren ka a in xaaynin mali le'en. 27Piraampira qaraayye, iskatteese ka tooteew. 28Semmalla ishootta tappanti isheetta hemeneey, awta tootoppa xaanaatiiyyi, iskatteetose a ayno koddita?”
29Yesuusi ka ishootta oorshe ka kide, “Ishina qoota mataafa qulqulloota isho hupna Waaqa a upnin malla, kamma dapnittan. 30Orra le'e, awta tootoppa xa'oyye, akka erkampattowwa moonta mina'e kodda diisheey, in hemo umma in hemamo. 31Qoota orra le'e tootoppa xaanaati desa Waaqa wa ishina kide, hela ishina a nappapne? 32Ha ikide'e, ‘Anti an Waaqa Aprihaami ka Waaqa Hisaaqi ka Waaqa Yayqoopi.’ Semmalla Waaqa Waaqa orra cooti diisheey, Waaqa orra le'eti'in. #sooka 3:6 ” 33Samayta ete sede dakayeeyye, tamaarese xaadi oppa'e qawwaawe.
Ajaja piisa qara qapo
Maari 12:28-34; Luqa 10:25-28
34Feresaata ete akkima Yesuusi Saatuqaata jaw kiishe ikka wa mina kiita dapte dakayteeyye, ollopa oorete. 35Ishoottoppaayye kollissampayta a seera Muuse ka isha ekkaysatta faden#Luqa 10:25-28 ka isha kaassade ka kide, 36“Kollissampayto, seeroppaayye ajaja a xaame piisa qara qapa?”
37Yesuusi ka ishi oorshe ka kide, “Waaqa Poqallaatti, karittaayti piisan ka isi piisan ka dikattaayti piisan jaalado. #ooreta 6:5 38Ini ajaja paayyota a piisa qara qapo. 39Ajajase a lammatta a se mina paho ikiiniiwwi, ‘Akkama isi jaalannitto mina'e, nama piisa jaalado.’ #Lewi 19:18 40Seera Muuse isho kollissa a xuumampaya piisa ajajaddosen lakki qara'e kiritta kataden.”
Kaassuma a qoota Kiristoosi desa dehaade
Maari 12:35-37; Luqa 20:41-44
41Ete Feresaata ollopa oorteeyye, Yesuusi ishootta kaassade ka kide, 42“Qoota Kiristoosi desa maana kiinittan? Ata isha inna ayno?”
Ishootta ka ishi oorshen ka kidene, “Isha inna a Taawwiti.”
43Yesuusi ka ishootta oorshe ka kide “Ka kuli, Taawwiti awta Hapura Qulqullootatin haasawadeeyye, atta ishi ‘Poqalla’ kide: 44Maana malla ikide ‘Ha Waaqa Poqallaayyo'e kide; hakan paarkaalaatti loqqaatti kelopa oorinno kara'e, qindiyyo a akkittati kuti'e,’ Atta ishi ‘Poqallaayyo’ Kiini ka haleeni#mas 110:1 ? 45Ka kuli oto Taawwiti mattaadi Kiristoosi ‘Poqalla’ kiinooyye, xawwi Kiristoosi ayshanne innaadi koddaaw?” 46Nama isha mina qaaleta takka oorsatta ettanshe ka in kinnin; umma awseti desa paayyatte nama kaassuma isha qara kaassatta nyare takka nefo in co.
