Mataafa orra Lewi 9
9
Akkima qeesewwa kodaaysho paayyen
1Kuyyaata settattatiiyyi Muuse ka Arooni isho hellaadi a diira ka qimoota a Isira'eeli ollopa hale; 2ka Arooni kide, “Hasenta juppootaaytiti'i haaritta xorma takka; ka kalisoota kupannitto'e, laha takka a toobuma in qapnin qeede ka fuula Yaahiwwe turopa dehayshe. 3Ka Isira'eeleta kideewwe, ‘Hasenta juppootati'i qolpayta takka; ka kalisoota kupannitto'e haaritta xorma ka haaritta laha a para takka takka pire ka toobuma in qapnin dehayshaaw; 4kalisoota takkumtati'i, xorma takka ka laha takka dehaysha; ka kalisoota unta a sayteetan daaten quda qapadaaw ka Yaahiwwe'e kalisoota kalsha; awwe Yaahiwwe ishin tura'e akkaadaay.’”
5Ikka waasene a Muuse ishootta ajaje piisa xarra tukkana a Yaahiwwe turopan de'en; samayta piisa ka dehaade ka fuula Yaahiwwe tura qa'ade. 6Muuse ka ishootta kide, “Akka ulfeena Yaahiwwe ishina akkaado'e, wossene a kootene piisa a Yaahiwwe ajaje.”
7Sekkammaayye Muuse ka Arooni kide, “Pora a kalisoota kapopa dehaado ka kalisootaayti a hasenta juppoota isho a kupannitto kalshe; ka akka ke isho samayta hasenta juppoota akkattane kode; ka akka Yaahiwwe ajaje qara'e, kalisootase a samayta dehaysheew; ka akka hasenta juppoota akkadane kodeew.” #Ip 7:27
8Arooni ka porase a kalisoota kapopa dehaade ka haarittase a xorma a hasenta juppootadi malla dehaade qale. 9Hellaadi a diira ka diikan ishi aanen; isha ka qupittan diikase oppa qappade ka kaassa pora kalisoota qara daate ka diika a kela hase porase a kalisoota kela tuqe. 10Ka akka Yaahiwwe Muuse ajaje qara'e, hallaaka isho moora ka xallada lakki ka nyaala a tira tura dekno qeede ka kalisoota hasenta juppootati dahaatte oppaayye qeede ka porase a kalisoota qara kupe. 11Ka so'adi isho kollattaadi safareeyye laka tula kupe.
12Ka kammadesa kalisootase kupannitto qaleew; hellaadi ka a diira ka diikan ishi aanen ikka porase a kalisoota quda qinda piisan fide. 13Ikka meella kalisootase kupannitto takka takka isho matta kuli ollini ishi daashen ikka porase a kalisoota qara kupe. 14Sekkammaayye ikka hoppattaadi isho loqqaadi pishaan jaqe ka kalisootase kupannitto qeede ka pora kalisoota qara xaaye ka ollin kupe.
15Kammadesa Arooni ka kalisootase a samayta dehayshe; ka a paayyota mina'e, qolpaytase hasenta juppoota samaytaati dehaade qeede ka hasenta juppootati qaleew. 16Ka taantetase turan lelamte qara'e, kalisootase kupannitto qeedeew ka kalsheew. 17Ka kalisootase a unta qeedeew ka qara harka kara kusse; ka kalisootase kupannitto a teykante teykante dehaanitto quda padaawe ka pora kalisoota qara kupe. 18Ka xormase isho laahase kalisoota takkumta samaytati kodda dehaade qaleew; hellaadi a diira ka diikan ishi de'en; ikka pora a kalisoota quda qinda piisan fide. #Lewi 3:1-11 19Hellaa Arooni a diira ka hallaaka isho moora a xormaseti isho a laahaseti, sede nefo masarta ka moora karitta ka xalladaasso isho moora quda dekno ka nyaala a tira tura dekno qeeden; 20ka aytaraassaddaasso qara xaayen; Arooni ka porase a kalisoota qara kupe. 21Ka akka Muuse ajaje qara'e aytaraasaddasene lakki isho kaytoota a akkitta qeede ka kalisoota lellehinnaane kode ka fuula Yaahiwwe tura lelleehshe.
22Arooni ka harkaadi samaytopa xaashe ka ishootta sake; ka ete kalisoose a hasenta juppoota ka a kupannitto isho a takkumta kalshe kammaayye, porase a oppa kalisoota kalshe qara lekkade. #dikoota 6:22-26 23Kammadesa Muuse isho Arooni ka tukkanase a Yaahiwwe kelopa kullen; ka ete sookeneeyye samayta saken; ulfeena Yaahiwwe ka samayta piisa akkaade. 24Apitta ka Yaahiwwe kapa de'e ka kalisootase kupannitto isho moorase qara co kupe; samayta ete sede piisa akkeeyye, xata kide ka fuula piitan kaye ka ililiwe.
Currently Selected:
Mataafa orra Lewi 9: MaQu
Highlight
Copy
Compare
Share
Want to have your highlights saved across all your devices? Sign up or sign in
