Mataafa orra Lewi 10
10
Akka Nataapi isho Apihu ishin dapen ka le'en
1Hellaasene a Arooni a diira lakki Nataapi isho Apihu kidamma meehaaysho a kara tankarta qayyannaane qapaden ka kara porooda hooddaden ka qara tankarta xaayaden; ka apitta dawrame a Yaahiwwe ishootta in ajajinin fuula Yaahiwwe turopa dehaayshen. 2Seeminan apitta ka Yaahiwwe kapa sooke ka ishootta kupe; ikka Yaahiwwe tura le'en. 3Muuse ka Arooni kide, “Ha sede wa Yaahiwwe turanneew haasawade ka kide, ‘Anti a ana turopa dehaanna piisa oppa'en qulqullumaayyo akkisha ka samaytiyyo piisa tura ulfeena akkada.’”
Arooni ka oori jaw kide.
4Muuse ka hellaa Usi'eeli, aappa opa Arooni a Misha'eeli isho Elsafaani hale ka ishootta kide, “Xooya ka pukkada hellaassina tukkanase a Yaahiwwe tura alle maysha ka safareeyye laka tulopa haada.” 5Ishootta ka akka Muuse ishootta kide mina'e, pukkadasene a qamisewwaasso a qeesuma ishootta qudaayye caanenne haaden ka safareeyye laka tulopa sookshen.
6Sekkammaayye Muuse ka Arooni isho hellaasene a Arooni a diira Ali'asaari isho Itamaari kide, “Akka a leenini'i, miira Yaahiwwe ka samayta qara in kaynini'i, dapteeta'e matta in kooshadan umma mehaddaassin isiquda in kakkaa'an; ma hellaasene xaayshin a Yaahiwwe apittan leyshe malla, samaytase a Isira'eeli hellaassin kodde, ishootta pooya i'ettansha. 7Qoota sayteetase daatinaan a Yaahiwwe ishin qara kitto malla, akka a leenini'i tukkanose a Yaahiwwe kelaayye in sookan.” Ishootta ka akka Muuse ishootta kide mina koden.
Taanteta qeesewwa
8Yaahiwwe ka Arooni kide, 9“Ke isho hellaatti a diira oto tukkaniyyo kelopa kullinittaneeyye akka a leenini'i taadeta wayneeta taaki ikkayta orra maashshanno takka nefo in ikkan; sede nefo xeltada itturopa deena piisa kara'e, a taantetaayshin koddito. 10Sede nefo wa malla asse kootane akka ishina wa qulqullaawe ka a in qulqullaawnini ka wa nyale ka a in nyallini olikela upnaattan; 11ka taantese a Yaahiwwe Muuse qudan hellaa Isira'eeliti haasawade kollissan malla.”
12Muuse ka Arooni isho hellaasene xaadi a diira toota kela pahe Ali'asaari isho Itamaari haasawade ka kide, “Kalisootase a unta a Yaahiwwe apittan dehaatte kelaayye hasse qeeda ka haddaya mali laaqqa ka porase a kalisoota kapa dama, a akata qulqullaawteey. 13Akkan ajajame qara'e, kalisoose a unta Yaahiwwe apittan kalte kelaayye sede hasse, qeraytaayti isho a hellaatti a diira'ey, porase qulqullaawe oppa dama. #Lewi 6:14-18 14Aytaraasase kalisootase lellehinnaan kela hase isho kaytootase kalisoota takkumta kela hasse, qoota Isira'eeleta kalisootase xaaysho a takkumta kelaayye hasse qoottotaayshina koote ka daasse malla, ke isho hellaatti a diira ka a tuparra pora in nyallin oppa dama. 15Aytaraasa kalisoota lellehinaane koden ka dehayshen isho kaytootase kalisoota takkumtati kalte quda'e hallaakase kalisoota a apittati koden ka dehayshen ollin qapa ka kalisootase lellehinnaaneti koda ka Yaahiwwe tura dehaysha. Sede akka Yaahiwwe ajaje qara'e xeltada itturopa deena piisa karaayye qoottotaayti isho a hellaatti'i a diira koddita.”
16Muuse ka qolpaytase kalisoota hasenta juppootati dehaade desa atta akkima koden qanqannissa qorade ka akka kupade upnaade; ka hellaasene a Arooni a diira toota kela hase Itamaari isho Ali'asaari qara miirode ka ishootta kaassade ka kide, 17“Kalisootase hasenta juppootati dehaatte akata qulqullaawteey, Yaahiwwe ka akka ishin juppoota samaytati hasenta kootane ishina daasheey, maana'e porase qulqullaawe oppa dama diissen? #Lewi 6:24-26 18Tooya! Diika qolpaytaseeti qoota pora a qulqullaawe karopa in kalan malla helani akkan ishin ajaje qara'e porase qulqullaawe oppa'e qolpayse dammi heenten.”
19Arooni ka Muuse kide, “Asseeyye tin awwe samayta Yaahiwwe tura'e kalisoota hasenta juppoota isho a kupannitto dehanni; kadin anti awwe kalisoota hasenta juppootati kalte dameeyye, Yaahiwwe ishin in xasoodo; wossen hellaayyo qara kaye ka ana qara kayni heenen.” 20Afoosen a haasawade ka Muuse xasayshen.
Currently Selected:
Mataafa orra Lewi 10: MaQu
Highlight
Copy
Compare
Share
Want to have your highlights saved across all your devices? Sign up or sign in
