Mataafa orra Lewi 25
25
Atta akkima para tappatta ulfeessa parpaaccisnitto
ooreta 15:1-11
1Irroota Siina qaraayye Yaahiwwe ka Muuse haasawade ka kide, 2“Samayta Isira'eeliti haasawado ka ishootta kide, ‘Oto piitase an ishina daanno karopa kaltaneeyye, para tappattatiiyyi a aylinin mali piita piita nessisha ka nessuma a Yaahiwwe ulfeessa. 3Para lehi dullaassin aylaada ka dishmaayshin a wayneeta qara quura; ka untaayshin kalsada. 4Para tappatta xoori piita'e, para nessuma'ey, a nessatto; paroose para a nessuma a Yaahiwweey, dullaassina in aylaadan umma dishmayshina a wayneeta qara in quuran. 5Unta a aylinin mali issin dehete ka palite in feradan; umma luukkata dishima wayneeta a qara in quurammin in pohadan; piita a para takka nessatto. 6Para oppa piita nessannittooy, wa palannitta a ke ka karpishshaddaatti a diira ka a tuparraatti ka nama a xaayyannitto isho haptitta ke kiseeta desa ke kapa kalo'e a damta koddito. 7Horeetaayti isho pinanta piitaayti oppa kitto kuli ka damo wa piitoose oppa deena piisa dama i'ettanshan. #sooka 23:10-11
Para diissata
8Parase a Yaahiwwe a nessuma a para tappa oppa takkan deeno tappaan dika; kunda afuri sakali kayniiy; 9ka sekkammaayye leya tappatta oppa kuyyaata kundattati kaasa dawe; ka kuyyaase a hasenta juppoota oppaayye, piita piisa oppa kaasa dawsiise. 10Ka parase a kunda kenatta xawwi reexxitan ka nama piitoppa kalo piisa'e nataan sooketa salissan; ikka para diissata ishina kodda; nama piisa ka piita katamte a toolaayshoti oorsada; karpishsha piisa ka toolaaysho kapopa kala. 11Parose a kunda kenatta a para diissata ishina koddo; parose oppaayye unta a aylaattan umma wa issin deehna ka palina a ferattan; umma luukkata a dishma wayneeta a ishina qara a quurrin a pohattan. 12Qoota para diissata kodde malla, a qulqullaawe ishina kodda ka wa dullaassin oppa issin pale pattaaw dama.
13Parose a diissata oppaayye nama piisa a piita toolaayshoti a turan katamte a oorsado.
14Oton piita innaassin a piitaayshina qara piddatte taaki ishi katteeyye, nama nama in taknin. 15Atti xaysonessumasene a parase a diissata kammaayye, parrada dikamma kapa'e inna piitaayshina qaraayye piisse piddatta; isha ka parrada a oppa unta feratta a para diissata a kamma deeno turan co kapa ke kata. 16Oton parra lekaanniiyyi heraadi ikoopa; oton parra shakkanniiyyi heraadi ishakkada; maana malla heraadi parra oppaayye unta palaysannitanetinni hiilammiiy. 17Nama nama in taknin; Waaqa fuura; anti an Yaahiwwe Waaqaayshinaay.
Rakkoota parose a tappattati deeto
18Ishina taantetiyyo tooytaada ka seeriyyo kodaan akkisha; piisse oppa nakaytanne kallaattaneey. 19Piita a kuttaati'i ishina unta palassa akka damtan ka duttantan ka eyye kara nakaytan kallaattaneey.
20Ishina takka punu ikaassattan ka ikiitane, “Oton untan an aylaannin ka an feranniniiyyi, para tappattati maanan damma?” 21Para lehattatiiyyi anti sakiyyon ishina koopsha; piita ka unta para sessa ishina kayto ishina palassa. 22Para settattatiiyyi oto aylaannitaneeyye unta a turan palitewwe damtan ka para sakalattatiiyyi haka unta kalsannittan kara'e, sede turan paliteew damtan.
Qoota wa katame furattaati desa
23Piita qoota a xayyo koddite malla ishina ka kalayta ka xaykiyya piitiyyoppa kalo kodditen malla, piita kateeta ka asse eeyyendesa haseeta, isheetta parpaaccisni in kitto.
24Piita a lehaanda qapatten piisa oppaayye aappa piita a paayyota akka piitaadi a katamte furatta ettanisho koda. 25Nama piitaayshina takka oto teekooyye ka piitaadi katadooyye, nama sanynyuman isha quda deha deena ka piisse a katade furatta i'ettansha. 26Ma xoori namoose oton nama piitaadi ishi furado in qapniniiyyi, ka isha mattaadi kaaja a ishin furada akkadeeyye, 27haka katade paayyatte parra a piisse harka nama piddade oppa jarte a dikado ka parra a hase kapa'e, namoose piddade'e kaajaadi oorsho ka piitaadi teyyado. 28Ma xoori oton piitaadi furatta malaalliiyyi, haka parase a diissata a kunda kenatta kaynitto kara'e, piitaadi harka nama piddade oppa'e jarta; ka oto para diissata kaytooyye ishi oorta.
29Nama takka oton tikaadi a katama kapa kawwattan qorrame kara kitto kataayye, haka kate paayyatte para takka kara furatta i'ettansha; haka para immakkoota kaynitto kara'e furatta i'ettansha. 30Ma xoori oton para takka kara'e furatta malaaleyye, tikase xaadi katama a kawwattan kapa qorrame kara kitto a nama piddade isho a sanynyeetaadi'i koddita; umma parase a diissatati ishi in oorto. 31Tikka palewwa a kapa kawwatta in qapnini kara ca xoori, dulla kapa'e dikaman; ka furaman ka parase a diissatatiiyyi kuli oorsataman. 32Tikka a Lewaata a katamadda kawwatta karaayye ca xoori, Lawaata eta piisa furatta i'ettanissa. 33Lawaata tikka a katamaddaasso kara qupannitta, Isira'eeleta oppaayye qoota xaaysho kodden malla, oton ikatamaneeyye, furama i'ettanshan. Oton Lewitta tika katada ka furatta malaalaayye, parose a diissataatiiyyi i'ishi oorta. 34Ma xoori lakka deetta a katamadda Lawaata kapandesa ca, xaaysho a mattaayshoti'iy in katammin.
Qoota teekolayta kaaja leqeessaati desa
35Oto hellaassina a piitaayshina oppa takka teekooyye ka issi qaarqaara malaalooyye, akka ishin oppa kallaado'e, akka kalayta taaki haptitta qaarqaarittan mina'ew isha qaarqaara. #ooreta 15:7-8 36Innaassina a piitaayshina akka ishin oppa kallaadane'e, dalta taaki tookta isha qara in teyyadan; ka ana Waaqaayshin fuura. 37Kaajaatti daltan ishi in leqeessan umma tookta kela qeedeta'e, damtaayti ishi in katan. #sooka 22:25; ooreta 23:19-20 38Akkan piita Kene'aani ishina daasho'e ka Waaqaayshin koddo'e, a piita Kipsi kara ishin sookshe, ana Yaahiwwe Waaqaayshin.
Qoota karpishshadda natan sookissaati desa
39Hellaa piitaayshina oppaayye takka oto teekooyye ka karpishshuma isi ke katooyye, a karpishsha mina kodaan isha in miiddan. 40Ma akka nama a xaayya ke sookanno taaki haptitta a ke kapa kallaanno kapa isha dike; ikka haka parase a diissata dikkanno'e ke koda kodo. 41Sekkammaayye xoori isha isho hellaadi nataan diishe ikka kafaadi oppopa kalo ka qapna a toolaayshoti qaropa ooro. 42Samayta Isira'eeli qoota orxayaayyo an piita Kipsi kara sookshe kodden malla karpishshuma katama ishootta parpaaccisni in kitto. 43Ishootta miiddeetan; ishootta in ukkuman ma Waaqaayti fuure. 44Karpishshadda a diira isho a iskatta a itturopa qapnaatta heenta, samayse ke kapandesa kalo ka ana amanni in kinnin oppa piddado. 45Ka asseew hellaa a kalayta a ishin oppa kalo xaaye ka a sanynyeetaaysho xaayte piddatta i''ettanissan; ikka kodatteetaayshin koddan. 46Akka kodatteeta lehannaan mina hellaassin kuli'i, lehna daassata i'ettanissan; ikka haka caaneeyye karpishshaddaassin koddan; ma xoori namaayshin a Isira'eeli miiddaan in piddan. #sooka 21:2-6; ooreta 15:12-18
47Kalayta taaki haptitta ishin oppa kalo takka oto teyantoodooyye; inna piitaayshina takkan ka teekaneeyye ka kalaytase ishin oppa kalo taaki toolaaysho a kalayta oppa nama takka kalaytaati'i karpishshuma isi katooyye, 48a isi kate nefo kammaayye furama mapteeta qapa; helaasso a ollin daladene oppa takka isha furatta i'ettanshan. 49Inna opa aappaayshoti taaki a inna opa aappaayshoti xaayene taaki kafaaysho oppa nama a diikan isha quda deha isha fuartta i'ettansha; isha nefo oto teyantoodo isi furatta i'ettansha. 50Isha isho nama isha piddade, para oppa isi kate paayyatte haka parase a diissatati'i a parra pirame diken; kaaja ishin furama nefo parroosen hase kapa'e xaayya a nama takka paroppa akkaannaatinni dikaman. 51Oton parra lekaya ishi hasniiyyi, parroosen hasna kapa'e kaaja a ishan piddame qudaayye kuttaya oorissa isha faani. 52Ma xoori oton parrasene a diisata turanne parra lamayaaw isha hasniiyyi, a aappaase isha pidde olli dikado ka parroosen shakka kapa'e, kaaja a ishin isi fura oorsho. 53Sede nefo aappa isha piddade akka nama a paroppa xaayyadene mina'e a isha muksho diisheey, miiddotan isha mukissa isha parpaaccisni in co. 54Kadi punu saantadosen oppa takkan furama ettaninni in kinnin nefooyye, paroose a diissatatiiyyi isha isho hellaadi a nataan diisamen. 55Samayta Isira'eeli orxayaayyo an piita kipsi kara sookshe; anti kan an Yaahiwwe Waaqaayshin.’”
Currently Selected:
Mataafa orra Lewi 25: MaQu
Highlight
Copy
Compare
Share
Want to have your highlights saved across all your devices? Sign up or sign in
