Mataafa orra Lewi 24
24
Ipsada akka in libbinin ka opaya quda tawane qara tooyeta
sooka 27:20-21
1Yaahiwwe ka Muuse kide, 2“Ipsada a in libbinin mali akka opaya quda tawane'e, Isira'eeleta akka sayteeta qoyra ekerta opa diipen ka miilshenen ke deeto'e ishootta ajaje. 3Ipsadasene tukkanase a Waaqa kelaayye kaarrantase taapota maakkuma turaayye kittooyye laka tulan ca, akka shishshipe paayyatte haka parinitto fuula Yaahiwwe tura opaya quda tawane'e, Arooni a qara tooyo; sede nefo ka xeltada itturopa deena piisa kara'e, taanteta a parapara ishina koddito. 4Ipsadasene porase qara ipsa xaynaane a warqeeta paxaara qara ca a in libbinin mali akka fuula Yaahiwwe tura'e opaya quda tawane'e, Arooni a awta piisa qara tooyo.
Laaqqotase qulqullaawte
5Daamma paxaara qeede ka laaqqota kudanka lakki laaqqe, laaqqowwosen matta mina'e, a kiilota lakki lakki kodden ka laaqamen. 6Ka tarabbeesase a warqeeta paxaara fuula Yaahiwwe tura co qara'e jirfa lakki kode ka lehi lehi olkamman desa qune. #sooka 25:30 7Ka akka kalisootase a laaqqota ishin matte oorsatamto ka ana Yaahiwwe kalisoota apittan dehaannitto koddito'e, jirfoose lakki qarandesa tankarta paxaara xaxxaayeew. 8Arooni ka pakka Isira'eeleta oppa'e a olkamma in qaatinnin maliiyyi kuyyaata a nessuma a Yaahiwwe piisa mina'e fuuliyo a Yaahiwwe tura'e laaqqose quno; sede ka samayta Isira'eeliti'i kodeeta a parapara koddita. 9Kalisootose a laaqqota kalisootase ana Yaahiwwe apittan dehaannitto oppaayye, qoota a akata qulqullaawte koddite malla, Arooni isho hellaadi a diiraati qerayta parapara'e koddita; ishootta ka pora xawwi reexxame oppa daman.” #Maati 12:4; Maari 2:26; Luqa 6:4
Qitaateta a Waaqa otitta minanne nama qara kaynitto
10Nama takka a aayyaasso Isira'eelitteeta koddite aappaaysho kan Kipsitta, Isira'eletoppeela sooke ka safaroppaayye Isira'eelitta takka oli pirri. 11Namase a Isira'eelitteeta xaayte ka maxxa Yaahiwwe ote ka jeershe ikka Muuse turopan de'en; maxxa aayyaassoti nefo “Selomiti” kidammi; isheetta nefo enenta Tipiiri isase kafa Taanippa dalade. 12Ikka haka heenna Yaahiwwe upnaannaan kara'e akka xawwi desa tooytamo koden. 13Yaahiwwe ka Muuse kide, 14“Otampaytase safareeyye laka tulopa sookshe; a onnooyye orra isha dakaye piisa ka matta qara ishi harkaasso qapaden; samayta piisa ka dakaan isha dakko ka ishsho. 15Ka Isira'eeleta lele ka kide, ‘Nama oton Waaqaadi otaayye, a juppootaadin kaassatamo. 16Nama maxxa a Yaahiwwe onno piisa a alle ishamo; xora samayta piisa ka dakaan isha dakko; oton kalaytaayye taaki nama piitatiiyyi a maxxa a Yaahiwwe oto piisa a ishshamo.
17Nama nama ishsho, a kapa ishshamo. #sooka 21:12 18Nama horeeta nama ishshe, a horeese pahatoow oppa oorsho; horeeta kapa horeetaay.
19Nama otoon nama miiddaayye a miiddotose'ew isha qara kodamto. 20Qepissa kapa qepissa, ilta kapa ilta, ilkitta kapa ilkitta; nama wa nama qara kode a asseew isha qara koden. #sooka 21:23-25; ooreta 19:21; Maati 5:38 21Nama horeeta ishshe, a horeeta oppa oorsho; a nama ishshe xoori a kapa ishshamo. 22Kalayta isho nama piita, seera takkaaw qapnaaden; anti an Yaahiwwe Waaqaashinaay (Yaahiwwe elohim).’” #dikoota 15:16
23Muuse ka samayta Isira'eeliti sede lele; ikka otampaytase safareeyye laka tulopa sookshen ka dakaan isha dakken; samayta Isira'eeli ka akka Yaahiwwe Muuse ajaje qara kode.
Currently Selected:
Mataafa orra Lewi 24: MaQu
Highlight
Copy
Compare
Share
Want to have your highlights saved across all your devices? Sign up or sign in
