Mataafa orra Lewi 23
23
Xaysonessumadda ulfeesseta
1Yaahiwwe ka Muuse kide, 2“Samayta Isira'eeliti haasawado ka kide, ‘Xaysonessumaddasene a Yaahiwwe a xora qulqullaawe kodattane ka salisattane sene. 3Kuyyaata lehi kara'e koda kodattan ma xoori kuyaata tappatta, kuyaata a nessuma a Yaahiwwe, kuyaata xora qulqullaawe'e koddita; umma oppa koda takkan nefo a kodattan; piita oppa kalaannittan piisa karaayye, kuyaata nessuma a Yaahiwwe koddita. #sooka 20:8-10; 23:12; 31:15; 34:21; 35:2; ooreta 5:12-14 4Xaysonessumadda a Yaahiwwe a oppa xora qulqullaawe kodattane ka eta a ishootta qapamte oppa salisattane sene.’”
Xaysonessuma a qarantarpeeta isho a laaqqota kara haddaya in qapnini
dikoota 28:16-25
5Qarantarpeeta a Yaahiwwe leya a paayyota oppa kuyaata kudanka afrattati shishibe paayyani. #sooka 12:1-13; dikoota 16:1-2 6Xaysonessuma a laaqqota a kara haddaya in qapnin a Yaahiwwe, (Yaahiwwe) leyoose oppaayyeew kuyyaata kudanka kenattati paayyanniiw; ishina ka kuyaata tappa kara'e, laaqqota a kara haddaya in qapnin damtan. 7Kuyyaata paayyotatiiyyi xora qulqullaawe kodada diisheey oppaayye koda takka nefo in kodadan. 8Ka kuyyaata tappa kara'e, kuyyaata kuyyaatan ana Yaahiwwe'e kalisoota kupannitto dehaysha ka kuyyaata tappattatiiyyi xora qulqullaawe kodada diisheey, oppaayye kodaayshin takka nefo in kodadan.’” #sooka 12:14-20; 23:15; 34:18; ooreta 16:3-8
9Yaahiwwe ka Muuse kide, 10“Samayta Isira'eeliti haasawado ka kide, ‘Oto piitase an ishina daanno karopa kaltan ka unta ferannittaneeyye, marranta a paayyota qeesitta kalsha. 11Ikka akka ishin qara teyyatamto'e Yaahiwwe tura lelleehsho sede nefo kuyyaatase nessuma a Yaahiwwe kamma deenittooyye lelleehshoow. 12Ka kuyyaatase a oppaayye kalisootaayshin a unta lellehissaan kalinnittaneeyye haaritta laha a para takka pire ka toobuma in qapnini kalisoota kupannitto koda ka ana Yaahiwwe dehaysha. 13Ka olliiyyiiw akka kalisoota unta a kupannitto ka alaawnitto ka Waaqa xasannitto koddito'e, daamma paxaara a sayteetan tiqqiiren kiilota lakki ana Yaahiwwe dehaysha; ka kalisoota ikkaytaati'iw, taadeta wayneeta nitiroota takka dehayshaaw. 14Ka haka kuyyaatase a oppaayye Waaqaayshina kalisootose kalissan kaynitto kara'e unta haaraya oppa laaqqota taaki axaawota taaki maanqa in daman; sede nefo xeltada itturopa deena piisa kara'e piita oppa kallaannittan oppaayye taanteta para para'e ishina koddita.’”
Xaysonessuma a fera
dikoota 28:26-31
15Kuyyaatase a nessuma a Yaahiwwe a oppaayye kalisootase a marranta lelleehinnaane dehassen parraytaadi paayyatte torpa tappa immakkoota dika. 16Ka haka kuyyaatase kuyyaata nessuma a Yaahiwwe a tappatta kamma deenitto kaynitto kara'e kuyyaata kunda keni dika ka kammaayye kalisoota a unta haaraya ana Yaahiwwe dehaysha. 17Ka kalisootase lelleehinaane'ew laaqqota lakki a kara haddaya qapto a daamma paxaara kiilota lakki oppa laaqqamte kalisoota qarpattati koda ka tikkaassin piisa karaayye Yaahiwwe kalshaaw. 18Ka laaqqose quda'ew laahadda a para takka takka pire a toobuma in qapnini tappa ka haaritta xorma takka ka laahadda lakki dehaysha; sene kalisootase a unta isho a ikkayta olliiyyi kalisoota kupannitto koddan ka ana Yaahiwwe dehaadan; sede nefo kalisootase apittan dehaannitto ka ana Yaahiwwe alaawnitto koddita. #sooka 23:16; 34:22; ooreta 16:9-12 19Ka kalisoota hasenta juppootati'i qolpayta takka dehaysha; ka kalisoota takkumtati'iw, laahadda lakki a para takka takka pire dehaysha; 20qeesitta ka laaqqotase a kalisoota qarpatta quda'e, laahaddosen lakki qeedo ka kalisootase lelleehinnaane kodo ka Yaahiwwe kalsho; ishootta qerayta qeesewwa'e koddan ka ana Yaahiwwe kalisoota qulqullaawte kodan. 21Ka awsitiiyyi xora qulqullaawe kodatta'e salisada umma koda takka nefo oppa in kodan; sede xeltada itturopa deena piisa karaayye piitadda oppa kallaannittane piisa oppa taanteta parapara'e ishina koddita.
22Oto unta ferannittaneeyye, xeella dullaassina piisan feran umma pattewwa in qapsadan; teekolaya isho kalayta eeyye diisha; anti an Yaahiwwe Waaqaashinaay (Yaahiwwe elohim).’” #Lewi 19:9-10; ooreta 24:19-22
Xaysonessuma kaasa daweeta
dikoota 29:1-6
23Yaahiwwe ka Muuse kide, 24“Samayta Isira'eeliti lele ka kide, ‘Leya tappatta oppa kuyyaata paayyotati, kuyyaata nessuma a oppa kaasa dawattan ka xora qulqullaawe kodattan ka ishin matte oorsattan a ishina koddito. 25Ka oppaayye ana Yaahiwwe kalisoota kupannitto kalsha diisheey koda takka nefo in kodan.’”
Kuyyaata a hasenta juppoota
dikoota 29:7-11
26Yaahiwwe ka Muuse kide, 27“Leyoose a tappatta oppaayye kuyyaata kundatta, a kuyyaata hasenta juppoota ishina koddito ka oppaayye xora qulqullaawe kodada ka damta musada ka ana Yaahiwwe'e kalisoota kupannitto dehaysha. 28Ka qoota kuyyaata a hasenta juppoota a oppaayye fuula Yaahiwwe a Waaqaayshina tura'e juppootaayshin ishina hasto koddito malla oppaayye koda takka nefo in kodan. 29Kuyyaasitiiyyi nama damta musanni in kinnin piisa a alle samaytaadi oppa seeramo. 30Nama kuyyaaseti koda kodanno piisa anti alle'en samaytaadippa isha pashsha. 31Semmalla oppaayye koda takka nefo in kodan; xeltada itturopa deena piisa karaayye piitadda a oppa kallaannittane pisa oppaayye sede taanteta parapara a ishina koddito. 32Kuyyaase xawwi desa a kuyyaata nessuma ishina koddito ka oppaayye damta musada ka leyoose oppaayye kuyyaata sakalattaati shishshipeeyye paayyatte haka parraytaadi shishshipaati'i nessumoosen ulfeessa.” #Lewi 16:29-34
Xaysonessuma shaakka
dikoota 29:12-40
33Yaahiwwe ka Muuse kide, 34“Samayta Isira'eeliti lele ka kide, ‘Leyoose a tappatta oppaayye kuyyaata kudanka kenattati paayyatte haka kuyyaata tappa kara'e, xaysonessumasene a shaakka a Yaahiwwe ulfeessama. 35Kuyyaata paayyotatiiyyi xora qulqullaawe kodada diisheey oppaayye koda takka nefo in kodan. 36Kuyyaata tappa kara'e, kuyyaata kuyyaatan ana Yaahiwwe'e kalisoota kupannitto dehassan; ka kuyyaata settattatiiyyi xora qulqullaawe kodattan ka Yaahiwwe'e kalisoota kupannitto dehassan; ka qoota kuyyaata a oppaayye xora qulqullaawe dikkissan koddite malla, oppaayye koda takka nefo a kodattan. #ooreta 16:13-15
37Xaysonessumadda a Yaahiwwe a xooraan qapame a oppaayye xora qulqullaawe kodatta'e salisattene ka kalisoota kupannitto ka a unta ka kalisoota ika lekayta isho kalisoota ikkayta, xoora ishootta qapame oppa'e Yaahiwwe apittan dehassane sene. 38Kalisoowwosen nefo kalisoowwasene kuyyaata a nessuma a Yaahiwweeyye kalinnittane, a xasa daasatta ka daassawwa a jaala maliiyyi daasamma.
39Oto dullaassin oppaayye unta ferattan kammaayye, leya tappatta oppa kuyyaata kudanka kenattaatiiyyi paayyatte kuyyaata tappa kara'e xaysonessumasene a Yaahiwwe ulfeessa, kuyyaata a paayyota ka a settatta a kuyyawwa nessuma ishina kodden. 40Kuyyaata paayyotatiiyyi qora piitaayshina qara luukkata paxaara ka taamma sampaapa ka taamma a qara haashsha qapa isho jaffeeta pisha kapa'e qapattan ka kuyyaata tappa kara'e fuula Yaahiwwe a Waaqaayshina (elohim Waaqa) tura xasoottan. 41Ka sede xaysonessuma a Yaahiwwe kodattan ka paroppa'e kuyyaata tappa ulfeessitan; sede ka xeltada itturopa deena piisa kara'e, taanteta parapara ishina koddita akka leya tappatta oppa ulfeessitan. 42Kuyyaata tappa kara'e shaakkada kela'e tawtan; a Isira'eelitta kodde piisa a shaakka kela tawo. 43Awtan Isira'eeleta Kipsi kara sooksheeyye, akkiman shaakkada kela kallaaccise, xeltadaassin ka seden upnaadan; anti an Yaahiwwe Waaqaashinaay (Yaahiwwe elohim).’”
44Muuse ka xaysonessumaddasene a Yaahiwwe xooran qapame saanta asse pahaton samayta Isira'eeliti upnayshe.
Currently Selected:
Mataafa orra Lewi 23: MaQu
Highlight
Copy
Compare
Share
Want to have your highlights saved across all your devices? Sign up or sign in
