Mataafa orra Lewi 22
22
1Yaahiwwe ka Muuse haasawade ka kide, 2“Arooni isho hellaadi a diiraati kide, ‘Akka maxxase xayyo qulqullaawe a nyalinnini'i, kalisoota a samayta Isira'eeli xawwi ana reexxo ka ana kalsho, ulfeenan qara qeeda ka qanqanissa tooyta; anti an Yaahiwweey.’ 3Ka ishootta kideewwe, ‘Xeltada arepadesa deena piisa karaayye, sanynyeetaayti oppaayye nama nyala qapo ka kalisootase qulqullaawte a samayta Isira'eeli ana Yaahiwwe xawwi reexxe a ana kalinno kapopa dehaanno, fuuliyyo turaayye a alle seeramo; anti an Yaahiwweey.
4Sanynyeeta Arooni oppaayye nama paaqa neeqa a dakinta quda a tuullino qapo taaki paaqa minan a saalaadi kara xata wa urqina sooknaan, haka jaqado maliiyyi kalisootiyyo a qulqullaawte in dammin; nama wa pukkaan nyale quda kayo taaki a dawraadi kara xorma urqe quda kayo, 5taaki wa piitandesa titmanna ka orra nyelinna quda kayo taaki nama nyala ika lekaya qapo quda kayo, 6taaki wa asse pappaha quda kayo, haka kalaakalati a nyale kodda; umma haka dakinttaadi pishaan jaqado maliiyyi, kalisootiyyo a qulqullaawte in damo. 7Oto letta dumto kammaayye xoori nyala in qapnaado ka sekkammaayye kalisootase qulqullaawte dama, maana malla sede damtaadiiy. 8Akka ishin in nyallini'i, horeeta a toote taaki a pinanta qape in dammin; anti an Yaahiwweey.
9Qeesewwa taantewwaayyo tuffatta qaran xaate akka juppoota in koonin ka ishin in leenini'i, taantetiyyo piisa tooytatta ishootta faani; a ishootta qulqullanno ana Yaahiwweey.
10Nama toola qeesitta kodde mali a pila kalisootase qulqullaawte oppa in dammin; xaykitta qeesitta kapa kallaanno taaki nama a qeesitta xaayyade kalisootase qulqullaawte oppa in dammin. 11Ma xoori karpishsha a qeesitta kaajan piddade, taaki a tikaadi oppa dalade, damtose dameeta i'ettansha. 12enenta qeesitta takka oton nama sanynyeeta qeesewwa in koddinin opa hemamtaayye, damtoose oppaayye in dammin. 13Ma xoori oton diirtaadi qara to'aye taaki alle diishaayye ikka inna in xaayanniniiyyi ka a enentume kitto mina'e tika aappaayshoti kara kallaatta tiitaawtaayye, damtoose qulqullaawte oppaayye qerayta aappaayshoti dameeta i'ettanissa; nama pila xoori dameeta isha parpaaccisni in kitto.
14Ma xoori nama oton a in upnin maliiyyi kalisootase qulqullaawte damaayye, a harka keni oppaayye takka qara padaawo ka damtose qulqullaawte qeesitta oorsho. 15Qeesewwaaw kalisootase qulqullaawte a samayta Isira'eeli Yaahiwwe dehanno in nyelinnin. 16Taaki akka samayta Isira'eeli kalisoose damo ka ishin dapayta kodo ikka isha qara qitaateta qeetto in koonin; a daassawwosen qulqullanno ana Yaahiwwe.’”
17Yaahiwwe ka Muuse haasawadeew ka kide, 18“Arooni isho hellaadi a diira ka samayta Isira'eeli piisa kide, ‘Samayta a Isira'eeli taaki kalayta ishin opa kalo oppaayye, nama takka oton xasa a daasade taaki daassataadi a jaalala malla Yaahiwwe kalisoota kupannitto dehanniiyyi, 19akka isha qara teyyatamto'e, okkaya oppaayye xorma taaki kahirra oppaayye laaha taaki tela oppaayye qolpayta toobuma in qapnini a dehaysho. 20Ma xoori wa toobuma qapa takkan nefo in dehayshan, ishin qara in teyyatamtooy. #ooreta 17:1 21Nama takka oton xasa daasade taaki daassata a jaalala malla Yaahiwwe kalisoota takkumta kalinniiyyi, akka isha qara teyyatamto'e okkaya oppaayye xorma taaki kahirra oppaayye laaha taaki tela oppaayye qolpayta a qaja taaki toobuma in qapnin a koddo. 22Horeeta a joolte taaki a qepte taaki a toonnaawte taaki a faykitteeta malinitto qapto taaki a qooshootte taaki a luuqqite, Yaahiwwe kalisoota in kalshan; umma kalisoota kupannitto in kodan ka porase a kalisoota qara Yaahiwwe'e in dehayshan. 23Xorma taaki laaha a loqtaadi deraatte taaki kumma'aatte, kalisoota jaalalati dehassa i'ettanissan; ma xoori kalisoota xasa daasattaati'i in koddito. 24Horeeta a kara kula pohamen taaki kela tumamen taaki kaamaden taaki muramen Yaahiwwe kalisoota in kalshan; umma piitaayshin oppa'e kalisoota in kalshan.
25Umma orra hapta qaran sene in qeedan ka kalisoota damtati in kodan ka Waaqaayshina in kalshan; qoota qaja ka toobuma qapan malla, ishin qara in teyyatamtooy.’”
26Yaahiwwe ka Muuse haasawadeew ka kide, 27“Oton nyalqitta xorma taaki a laha taaki a qolpayta'e daladaayye, a kuyyaata tappa aayyaasso kela jaren; kuyyaata settattati ka kammopa xoori Yaahiwwe'e kalisoota kupannitto ka teyyatammitto koddita.
28Okkatta isho nyalqittaadi taaki kaharta isho nuunaadi, kuyyaata takka oppa'ewwe in qalan. 29Oto ana Yaahiwwe'e kalisoota kalata dehannittaneeyye, akka ishin qara teyyatamto koda ka kalsha. 30Ka awsi'iw kalisoose dama umma parripa in mukshan; anti an Yaahiwweey.
31Ajajaddaayyo tooyta ka koda; anti an Yaahiwweey 32maxxase xayyo qulqullaawe in nyalshan; samayta Isira'eeli piisa a qulqullumaayyo upnaado ka ulfeesso; a ishin qulqullanno ana Yaahiwweey. 33Akkan Waaqaayshin koddo'e a piita Kipsi kara ishin sookshe, ana Yaahiwweey.”
Currently Selected:
Mataafa orra Lewi 22: MaQu
Highlight
Copy
Compare
Share
Want to have your highlights saved across all your devices? Sign up or sign in
