Mataafa orra Lewi 21
21
Taanteta a qeesewwa daasamte
1Yaahiwwe ka Muuse kide, “Hellaasene a Arooni a diira qeesewwa koddeeti lele ka kide, ‘Samaytoppaayye oto nama to'oyye, pukkaadi quda qappattaan isi in nyalshan; 2Ma xoori ishin qeesewwaappa nama takka pukka aayyaassoti taaki a aappaayshoti taaki a innaadi taaki a enentaadi taaki a innaassoti, 3taaki a alawtaadi a in hemammini ka isha kapa kaltooti quda qappatta i'ettansha; 4ma xoori pukka a nama a hemittan oli daltaytumene quda qappatta ka nyaleeta isha parpaaccisni in kitto.
5Qeesewwa dapteeta'e matta in kooshannin; umma kawsaaysho in mujannin ka in shashakkisannin umma issi in hajinin. #Lewi 19:27-28; ooreta 14:1 6A Waaqaayshoti qulqullaawen ka maxxa Waaqaayshoti in jeerinnin; qoota damtase a Waaqaayshoti kalisootase Yaahiwwe apittan kupannitto dehannaan malla, a isi qulqullayshen. 7Qeesewwa qoota Waaqaayshoti xawwi reexxamen malla a qulqullaawe'ey, almalitteeta taaki enenta a nama sootade taaki iskatteeta a diirtaadi alle isheetta diishe in heminin; 8qeesitta qoota ana Waaqaayshina kalisoota damta dehanno malla, ishina samayteeyye qulqullitta isha dika ishin faani; maana malla anase ishin qulqullanno Yaahiwwe anti an qulqullittaay, qulqullitta isha dika. 9Oton enenta a qeesitta almaluman isi nyalshaayye, aappaaysho'e jeerinniiy, a alle apittan kupatto.
10Qeesitta kutta a hellaasso oppa xawwi reexxame ka akka mehadda a qeesuma kalsado'e opanka matta qara ishi sayteeta tuqen, dapteeta'e matta in kooshannin, umma isquda mehadda a kalsanna in kakkaaninn. 11Qeesitta pukka kapopa in kullinin umma kadi punu pukka aappaaysho taaki a aayyaasso koddeeyye minan isi in nyalinnin. 12Qeesitta qoota sayteese daatammitto a qulqullaawte a Waaqaadi isha qara kitto malla, tika qulqulloota kara in sookinnin ka tikase qulqullaawte a Waaqaadi in nyalinnin; anti an Yaahiwweey. 13Qeesitta a enenta issin kitto hemo; 14isha iskatteeta a qara diirtaadi to'e taaki a diirtaadi alle isheetta diishe taaki almalitteeta taaki enenta a diirta irreetan sootade in hemininn; ma a samaytaadi oppaayye enenta a issin kitto hemo. 15A taakkati samaytaadi oppa sanynyeetaadi a nyalte koddita; a isha qulqullanno ana Yaahiwwe Waaqaay.’”
16Yaahiwwe ka Muuse kide, 17“Arooni lele ka kide, ‘Xeltada a itturopa deena piisa karaayye sanynyeetaayti oppa nama toobuma qapo, kalisoota damta ana Waaqaayshina in kalinnin. 18Nama ilda qara paten taaki toonnaawe taaki fuuloppa taaki dakinta quda toobuma qapo takka nefo ana turopa in dehaannin; 19umma nama a loqtaadi taaki harkaadi qepe, 20taaki a tultoppa xonnoone taaki a dikke kumma'a taaki a ildaan paaqa quda tawno taaki a deesa dakinta quda ika lekayta qapo taaki diirta qolpame, ana turopa in dehaannin. 21Sanynyeeta a Arooni a qeesitta oppaayye, nama toobuma qapo takka nefo kalisoota kupannitto dehassa'e ana Yaahiwwe turopa dehatta isha parpaaccisni in kitto; umma qoota toobayta kode malla kalisoota damta ana Waaqa in dehannin. 22Ma xoori laaqqotase a Waaqa qulqullaawte isho a akata qulqullaawte dameeta i'ettansha. 23Ma qoota toobuma qapo malla akka tikiyyo a qulqullaawten nyalinnini'i, kaaranta taaki pora kalisoota kapopa in dehaannin; a ishootta qulqullanno ana Yaahiwweey.’”
24Muuse ka Arooni ka hellaadi a diira isho samayta Isira'eeli piisa sede lele.
Currently Selected:
Mataafa orra Lewi 21: MaQu
Highlight
Copy
Compare
Share
Want to have your highlights saved across all your devices? Sign up or sign in
