Mataafa orra Lewi 20
20
Ajajamitta diissata minan qitaateta a nama qara kaynitto
1Yaahiwwe ka Muuse kide, 2“Isira'eeleta lele ka kideewwe, ‘Nama a Isira'eelitta kodde taaki kalayta a ishin oppa kalo kodde, oton hellaadi oppa takka killootase molooki kidammitto kalisoota kalshaayye, a alle ishshamo; samayta piita ka dakaan isha dakko. 3Namoose tikiyyo a qulqullaawte nyalissa'e ka maxxase xayyo qulqullaawe jeerissa'e qoota hellaadi oppa takka killootase moloki kidammitto kalisoota kalshe malla, anti isha qara'en xa'a ka samaytaadi oppa alle isha pashsha. 4Oton a namoose hellaadi oppa takka killootase a moloki kidammitto kalisoota kalinnooyye samayta piita akka ka qara ilda tiitayshaayye ka kapa isha in ikanniniiyyi, 5anti ana mattiyyo isha ka toolaadi piisa qara xa'a ka isha isho a ana Waaqa diissatanne moloki sakatatta malla isha quda kodde piisa samaytaaysho oppa alle pashsha.
6Nama orra a kaarayyadda haleeno isho so'aya quda oore ka ishootta soosanno, anti isha qara'en xa'a ka samaytaadi oppa alle isha pashsha. 7Anti an Yaahiwwe Waaqaashinaay, (Yaahiwwe elohim) Isi jaqqa ka qulqullowwa kodda. 8Ana Yaahiwwe ishin qulqullayshaay, taantewwaayyo tooyta ka koda qara nakaysha.
9Nama aappaaysho taaki aayyaasso oto, a'alle ishshamo; qoota aappaaysho taaki aayyaasso ote malla, ishaaw ishin dapadeey. #ooreta 21:17; Maati 15:4; Maari 7:10
10Nama takka oton iskatteeta la'ayyo'e dahalaayye, a dahale ka a dahalsatte ollin leysha. #sooka 20:14; Lewi 18:20; ooreta 5:18 11Nama takka oton iskatteeta aappaayshoti olliiyyi mukaayye, saala aappaayshoti'i laka sooksheey, namoose isho iskatteese alle leysha; ishoottaaw ishin dapadeey. 12Nama takka oton iskatteeta innaadi olliiyyi mukaayye, manynyeeraay ishootta lakki alle leysha; ishoottaaw ishin dapadeey. 13Nama takka oton a iskatta olli muknaan mina'e diirta olli mukaayye, wa jippame'e kodeneey, ishootta lakki alle leysha; ishoottaaw ishin dapadeey. 14Nama takka oton iskatteeta takka ka aayya a iskatteese xaayte ollin hemaayye, manynyeeruma kodeneey, manynyeerumoose akka ishin oppa in kinnaannini'i, namoose isho iskattose lakki alle apittan kupa. #Lewi 18:17; ooreta 27:23 15Nama takka oton horeeta olliiyyi mukaayye, alle isha ka horeese a olli muke kuli alle leysha. 16Iskatteeta takka oton horeeta kele almalumtaayye, isheetta isho horeese alle leysha; ishoottaaw ishin dapadeey. #sooka 22:19; Lewi 18:23; ooreta 27:21
17Nama takka oton alawtaadi taaki enenta a aappaaysho aayya pila oppa xaaye taaki a aayyaasso xaayte aappa pilaati xaayte hema ka ollin mukeneeyye, sede wa neeqa'ey, ilda samaytaaysho tura alle tawsha; isha alawtaadi qara manyeeruma kodeey, ishaaw dapaadi haadada. #Lewi 18:9; ooreta 27:22 18Nama takka oton iskatteeta xoptaadi a leya isquda qapto olli mukaayye, paada jureetaadi'i laka sooksheey, isheetta nefo ka akkisseey, a samaytaaysho oppa alle seeramen. #Lewi 18:19
19Alawta a aappaayshina taaki enenta a aayyaassin olli dalatte olli in mukan; sede daltaytuma nyapalinniiy; Diirtoose isho iskatteese ishin dapaytaaysho'e haadadaneey. 20Nama takka oton iskatteeta inna opa aappaayshoti olli mukaayye, inna opa aappaaysho'e jeersheey, isha isho iskatteese juppootaaysho'e haadadan ka a hella in xaaynin mali le'an. #Lewi 18:12-14 21Nama takka oton iskatteeta innassoti'i hemaayye, innaasso'e jeersheey manyeeruma kode; semmalla hella in qapnaadan. #Lewi 18:16
22Akka kara kallaattane'e piitase an karopa ishinan kallo akka alle ishina in tufnini'i, taantewwaayyo isho seeraddaayyo tooytada ka koda. 23Kollima a samayta piita an alle ishin tura sookinna qara in kallaadan; qoota asse kallaaden minannen ishootta jippeey. 24Ma xoori in ishina kide, “Piitase xaaysho a aanna ka takma kara puren ishina lehanda daasha, ishina ka lehattan; ana Yaahiwwe Waaqaayshina samayta piita oppa xawwi ishin reexadeey. 25Pinaana a nyale isho a in nyallini ka xampira a nyale isho a in yaallini olkela upnaada; pinaana ka xampira ka wa piita qarandesa lellehna an akkima nyalen ishina upnaysheetinni, issi in nyalshan. 26Anti an Yaahiwwe. Qootan qulqullitta kodde malla akka xayyo kodditane'en samayta piita oppa xawwi ishin reexadeey, ana qulqullowwa kodda.
27Diirta taaki iskatteeta oton kaarayya haleeni taaki suuma sooniiyyi, dakaan dakka ka alle leysha; ishoottaaw ishin dapadeey.’”
Currently Selected:
Mataafa orra Lewi 20: MaQu
Highlight
Copy
Compare
Share
Want to have your highlights saved across all your devices? Sign up or sign in
