Mataafa orra Lewi 19
19
Seera qoota wa lekaati desa daasame
1Yaahiwwe ka Muuse kide, 2“Xora samayta Isira'eeli piisa haasawado ka kide, ‘Anti Yaahiwwe Waaqaayshin akkan qulqullitta kodde mina'e, ishina qulqullowwa kodda. #Lewi 11:44-45; Peti 1ta 1:16 3Ishina takka takkaayye aappaayshin ka aayyaassin ulfeessa ka kuyaatiyyo a nessuma tooytaada; anti an Yaahiwwe Waaqaashinaay.’ #sooka 20:8; 12; ooreta 5:12; 16
4Killannaapa in tiitaawan; ka sipla oppa killanna in liilsadan ka issi in tumadan, anti an Yaahiwwe Waaqaayshinaay (Yaahiwwe elohim). #Lewi 20:15-16; ooreta 5:19-20
5Oto ana Yaahiwwe Waaqa kalisoota takkumta dehaannittaneeyye, akka ishin qara teyyatamto koda ka dehaysha. 6Kalisoose a dehannittan kuyyaatase a oppa dehassan isho parraytaadiiyyi dama; oton wa kuyaata sessattati mukna'e ca xoori, apittan kupa. 7Oton kuyyaata sessattaatiiyyi damammiiyyi, inyalteey kalisootose ishin qara an teyyado. 8Nama a damo xoori, qoota kalisootase qulqullaawte a Yaahiwwe nyalshe malla, ishin dapampayta kode. Semmalla namoose a alle samaytaadi oppa tawsha.
9Oto dullaassin oppa unta ferannittaneeyye, a qindadda kela hasse in feradan; umma patteeta oppaayye in qapsadan. 10Dulaayti a dishima wayneeta oppaayye patteeta an qapsadan; umma a piitopa seehte in pohadan; teekolaya isho kalayta diishe, anti an Yaahiwwe Waaqaashinaay.
11In hatan;
darta an kodan;
umma olin sassapadan; 12umma maxxiyyon darta qara in xaxadan ka maxxa a Waaqaayshina in nyalshan; anti an Yaahiwwe. #sooka 20:7; ooreta 5:11; Maati 5:33
13Nama takka nefo qara karpa in kodan, ka in saran; ka nama a ke sookade a ishi a daannin mali xaayyaadi isqara in muksadan. #ooreta 24:14-15 14Nama a dakkaawe in jiijan, umma nama joole tura kehayta in xaayan; Waaqaayti fuure; anti an Yaahiwweey. #ooreta 27:18
15Oto firteeta farannittaneeyye, mure dukaata kamman in dapan; ka hanqeetan nama piisa dukaata mura diisheey teekolayta qara in qatan, umma teyantoolayta in ulfeessan. #sooka 23:6-8; ooreta 16:19 16Samaytaayti oppa pora in aanan ka maxxa nama in pashshan; umma wa a minan nama to'a takka nefo in kodan; anti an Yaahiwweey.
17Iskaranxata innassin an needdan ka akka juppootaadi quda a qoottannini ildaappadesa isha fukke. #Maati 18:15 18Nama piitaayshina qara haalota in pooyyan; umma hellaa a piitaayshina oppa nama takka nefo in tuffadan ka qara xommaata in qapadan; nama piisa akka mattaayti mina jaalado; anti an Yaahiwweey. #Maati 5:43; 19:19; 22:39; Maari 12:31; Luqa 10:2
19Taantewwaayyo tooytaada; horeeta ika karkar akka olqara shorto in kodan; xotta ika lakki dula takka oppa in aylaadan; umma ohaata shaloota a ika lakkippa dawamte in uwwisadan. #ooreta 22:9-11; 13:9; Kelaati 5:14; Yay 2:8
20Enenta shetteeta koddite takka, oto hemitta nama takka daasamtooyye, isheetta ka kaajan in furamminiiyyi taaki nata in sookniniiyyi, nama pila ka arta karan de'o ka isheetta olli mukooyye, aappoose isheetta olli muke isho isheetta qatta'ama ishootta parpaaccisni diisheey qoota isheetta nata in sooknin malla, kapa ishootta lessaata parpaaccisni in kitto. 21Namoose isheetta olli muke xoori a laaha takka kalisoota a ishin dapaytati'e xarra tukkana Waaqa turopa de'o, ka fuula Yaahiwwe tura dehaaysho. 22Qeesitta ka juppootase a namase kode malla laahaseetinni fuula Yaahiwwe tura'e akka juppootaadi ishi hasto kodo ikka ishi diisamto.
23Oto piitase a Kene'aani oppopa kaltan ka qora luukkata dalla ika lekaya dishattaneeyye, akka luukataaysho dameeta dawramte upnaada ka para sessa kara in daman. 24Para afrattati xoori luukkawaasso piisa a qulqullaawe ka ana Yaahiwwe Waaqa'e a xawwi reexxameeti koda ka anan kalataysada. 25Para kenattati xoori luukkawaasso idamtan ikka pora asse pahonne, qara koopan aanan ka ishina palan. Anti an Yaahiwwe Waaqaayshin (Yaahiwwe elohim).
26So'a a kara diika ca in daman; tipa taaki suuma kamma pora in aanan. #uuma 9:4; Lewi 7:26-27; 17:10-14; ooreta 12:16; 23; 15:23; 18:10 27Nyirfaassin a matta kamandesa in mujadan; umma kawsaayshin in mujadan ka in shashakkishan. 28Pooyta nama to'eti malla, isi in hajan; umma hajilewwa in qeehadan, anti an Yaahiwweey. #Lewi 21:5; ooreta 14:1
29Piisse akka sharmuutuma isho nyalaanne in immakannini'i, enentaayti sharmuutuma kelopa in daashan ka isheetta in jeershan. #ooreta 23:17 30Kuyyaatiyyo a nessuma tooytaada ka tikiyyo a qulqulloota ulfeessa, anti an Yaahiwweey. #Lewi 26:2
31Akka ishin a nyallini'i, so'aya kaarayadda isho hapurra haleena in soosadan. Anti an Yaahiwwe Waaqaayshinaay. #ooreta 18:11; Saamu a 1ta 28:3; nuqu a 2ta 23:4; Issa 8:19
32Nama a qime tura xa'e ka qimaya ulfeesse ka ana Waaqaayti tura fuure; anti an Yaahiwweey.
33Kalaytitta a ishin olli piitaayshin oppa kalo qara in kalan; 34piita Kipsi kara ishina xatta asseewwe a kalaytaay, kalaytitta a ishin oppa kalo akka a innassina a piita mina isha dika ka a mattaayshina mina jaalada; maana malla ishina turan Kipsi kara assewwe a kalaytaay. Anti an Yaahiwwe Waaqaayshinaay (Yaahiwwe elohim). #sooka 22:21; ooreta 24:17-18; 27:19
35Muraa dukaata kamman in dapan; oto paata kurritto taaki hiilitto taaki deruma ekkaysannittooyye, sassapan in kodan. #ooreta 25:13-16; phana 20:10; Issa 45:10 36Oto deruma weti ekkaysannittaneeyye taaki paata hiillittan taaki kurrittaneeyye, hiila dukaata qapnaada; anti an Yaahiwwe Waaqaayshin a piita Kipsi kara ishin sooksheey. 37Taantetiyyo isho seeriyo piisa tooytaada ka koda; anti an Yaahiwwe.”
Currently Selected:
Mataafa orra Lewi 19: MaQu
Highlight
Copy
Compare
Share
Want to have your highlights saved across all your devices? Sign up or sign in
