Mataafa orra Lewi 18
18
Ollin mukitta a dawrame
1Yaahiwwe ka Muuse kide, 2“Isira'eeleta haasawado ka kide, ‘Anti an Yaahiwwe Poqallaassin. 3Akka orra piitase a Kipsi a kara kallaatten koddino taaki orra a piitase a Kene'aani an karopa ishinan kallo koddanno mina'en koddan; ka kollumaasso kamma in aanan. 4Seeriyo ajajama; ka taantetiyyo tooyytada; anti an Yaahiwwe Waaqaayshinaay. 5Anti an Yaahiwwe Waaqa semmalla taantetiyyo ka seeriyyo tooytada; nama ishootta tooytaanno icaanniiy.’ #Nehi 9:29; His 18:9; 20:11-13; Luqa 10:28; Roomi 10:5; Kelaati 3:12
6Nama ollin diika takka kodden olli mukitta'e nama takka nefo in dehaannin, anti an Yaahiwweey Waaqaay. 7Aayyaassin olli mukittaanne, aappaayshinan jeershan; isheetta aayyaassinaay, isheetta olli in mukan. 8Iskatteeta aappaayshina olli in mukan; ini aappaayshin jeerissaay. #Lewi 20:11; ooreta 22:30; 27:20 9Alawtaayti a ollin dalatten olli in mukan umma kadi punu tikoppa dalatte taaki laka dalatteeyye, enenta aappaayshin xaaye taaki aayassin xaayte olli in mukan. #Lewi 20:17; ooreta 27:22 10Ooftaayti a innaatti xaayen taaki a enentaayti xaayte olli in mukan; sede ke jeerissaay. 11Enenta a iskatteeta aappaayshina xaayte olli in mukan alawtaaytiiy. 12Alawta aappaayshina olli in mukan; maammataayshinaay. 13enenta opa aayyaassin olli in mukan aayyaassinaay. 14Iskatteeta inna opa aappaayshina olli in mukan aayyassinaay. #Lewi 20:19-20 15Iskatteeta innaatti olli in mukan; haantota innaatti'iy. #Lewi 20:1 16Iskatteeta a innaassina a ollin dalatene olli in mukan; sede innaassin jeerissaay. #Lewi 20:21 17Iskatteeta takka ka enenta a iskatteese xaayte olli in mukan, umma ooftaadi a innaadi xaayen taaki a enentaadi xaayte olli in mukan; ishootta ollin diika takka; sede manynyeerumaay. #Lewi 20:14; ooreta 27:23 18Haka iskatteetaayti kittooyye enentaaysho lammitteeta qara in heman ka isheetta olli in mukan.
19Iskatteeta oton xoptaadi a leya'e isquda qaptaayye, olli mukitta'e qudopa in aanan. 20Iskatteeta nama pila olli in mukan ka isheetta olli issi in nyalshan. #Lewi 20:10 21Killootase moloki kidammitto'e akka kalisoota a apittoppa kupnaan koddito'e hellaatti oppa takka nefo in daashan ka maxxa poqallaatti in jeerishan, anti an Yaahiwweey. An Waaqaay. #Lewi 20:1-5 22Akka iskatta olli mukinaan mina diirta olli in mukan, wa jippame'ey. #Lewi 20:13 23Horeeta olli in mukan ka olli isi in nyalshan umma iskatteeta horeeta olli in muknin ka isi in nyalinnin; sede wa jippame'ey. #sooka 22:19; Lewi 20:15-16; ooreta 27:21
24Ishina sene oppa takkan nefon issi in nyalshan; samaytase ana amanni in kinnin an ishin tura alle daanno senenne isi nyalshe; 25piita ka nyalte; anka ishin dapaytaadi malla piita qattaani; isheetta ka orra a isheetta oppa kallo alle tufni. 26Ishina xoori taantetiyyo ka seeriyyo tooytaada umma nama piitaayshina taaki kalayta a ishin oppa kalo oppa nama takka nefo wossen jippame oppaayye takkan nefo in koonin. 27Orra ishin turan piisse oppa kalo, qoota nyaloosen piisa kode malla, piita inyalte. 28Ishina oton piisse nyalissaneeyye, piisse akka mankistewwa a ishin turan kara kallaade alle tufte mina'e alle ishin tuftaaw. 29Nama wossen jippame oppa takkan kodeetan ishin dapno piisa, a samaytaadi oppa alle seeramo.
30Semmalla seera an anti ishina daanno tooytaada; umma wossen jippame a orra ishin turan piisse oppa kallaade kode oppaayye takkan nefo in kodan; umma senetin issi in nyalshan; anti an Yaahiwwe Waaqaay.”
Currently Selected:
Mataafa orra Lewi 18: MaQu
Highlight
Copy
Compare
Share
Want to have your highlights saved across all your devices? Sign up or sign in
