Mataafa orra Lewi 17
17
Pora oppa kalisoota horeeta a qalammitto dehassa parpaaccisnitto
1Yaahiwwe ka Muuse haasawade ka kide, 2“Arooni ka hellaadi a diira isho samayta Isira'eeli piisa haasawado ka kide, ‘Yaahiwwe sede ajaje’: 3Samayta Isira'eeli oppa nama takka oton safara kara taaki safareeyye laka tula'e xorma taaki laha taaki qolpayta kalisoota qalliiyyi, 4ka Yaahiwwe kalisoota koda'e xarra tukkana a Waaqa turopa Yaahiwwe turopan in deeniniiyyi ishin dapayta a patta diika tuqeeta'e isha qara dikama, diikoose a patta tuqe malla, a samaytaadippa alle seeramo.
5Semmalla samayta Isira'eeli horeeta a kalisoota a lakoppanxata qallan piisa alle diishan ka xarrase a tukkana a Waaqa tura'e Yaahiwwe turopa qeesitta kapopan de'an; qeesitta ka fuula a Yaahiwwe tura'e kalisoota takkumtati koda ka dehaysha. 6Qeesitta ka xarra tukkanase a Waaqa kelaayye Yaahiwwe tura'e porase a kalisoota qara'e diikoose fido; ka hallakaadi qeedaaw ka kalisoota Yaahiwwe alaawnitto ka isha xasannitto kodo ka kupo. 7Umma arepadesa samayta Isira'eeli Waaqa alle diissatanne orriyyasene#17:7 taaki “killannasene pahana qolpaya qapa.” a kamma hirraaneti'i lammatta kalisoota in kalshan; sede xeltada a itturopa deena piisa kara'e a taanteta parapara ishina koddito.’
8Ka ishootta kideewwe, ‘Samayta Isira'eeli oppaayye taaki kalayta ishin oppa kalo oppaayye nama a kalisoota kupannitto taaki a kalisoota pila dehanno piisa, 9oton Yaahiwwe kalissa'e tukkana a Waaqa turopan in deeniniiyyi, namoose a samaytaadippa alle seeramo.’
Akkima diika ikeeta taaki dameeta dawrame
10Sanynyeeta Isira'eeli oppa taaki kalayta ishin oppa kalo oppaayye, nama a diika damo piisa qara'en miirooda ka samaytaadippa alle isha seera. #uuma 9:4; Lewi 7:26-29; 19:26; ooreta 12:16, 23; 15:23 11Wa so'a uwwisade piisa caattaaysho diika kara ca; anti ka akka ishin pora kalisoota qara haseenta juppoota akkattane'e, diika ishina daashe; maana malla nama diikanne haseenta juppoota akkanniiy. #Ip 9:22 12Semmallan kiini, ‘Samayta Isira'eeli taaki kalayta a ishin oppa kalo oppaayye nama takka nefo diika in dammin.’
13Samayta Isira'eeli oppa taaki kalayta a ishin oppa kalo oppaayye, nama pinaana a damamma taaki xampira damamma xemado ka qapo, a diika kara piitopa tuqo ka qaropa piita oorsho. 14Wa so'a uwwisade piisa caattaaysho diikaay, semmallan Isira'eeleta piisa kide, ‘Diikase wa so'a uwwisade piisa kara caatta kodde in daman; nama damo piisa a alle seeramo.’
15Isira'eeli karaaye nama haptitta kode taaki a kalayta kodde oton wa issin to'e taaki wa a pinanta qapte damooyye, a mehaddaadi a kalsanna diipado ka dakintaadi pishaan jaqado; ma haka kalaakalati a nyale kodda ka kammaayye a nyala in qapnin kodda. 16Ma xoori oton mehaddaadi a kalsanna'e in diipanniniiyyi ka dakintaadi in jaqanniniiyyi, dapaadi isha qaraaw caada.”
Currently Selected:
Mataafa orra Lewi 17: MaQu
Highlight
Copy
Compare
Share
Want to have your highlights saved across all your devices? Sign up or sign in
