Mataafa orra Lewi 16
16
Kuyyaata hasenta juppoota
1Hellaa Arooni a diira lakki awta apitta a dawrame qapaden ka fuula Yaahiwwe turopa dehaaden ka le'en kammaayye, Yaahiwwe Muuse'e haasawade; 2ka ishi kide, “Anti porase a diissata qareelan urrattan akkaadaay, innaassin Arooni akka eta ishi aaka oppaayye kaatasene akata qulqullaawe kaaranta kara ca, a karaayye dufanasene a diisata a taapota qaraayye co kara ca kelopa tupa desa in kullinin ka in toonin'i ishi lele. #Ip 6:19 3Umma haka paayyota xorma takka hasenta juppootati dehaysho ka laha takka kalisoota kupannitto dehaysho maliiyyi, kaata akata qulqullaawe karopa in kullinin. #Ip 9:7
4Ka a in kullinin turanne dakintaadi pishaan jaqado; ka mehaddasene qulqullaawe, qamiseetase isho konfase xaynaata qora talpa oppa dawame kalsado ka saappatase qora talpa oppa dawame hiddado; ka parrootase qora talpa oppa dawamte marado.
5Ka samayta Isira'eeli qaraayye, kalisoota hasenta juppootaati'i nyalqa qolpaya lakki ka kalisoota kupannitto'e laaha takka qeedo; 6Arooni qoota mattaadi isho a toolaaditi desa a xormase a kalisoota haseenta juppootaati dehaanno dehaysho; ka akka juppootaadi isho a toolaadi hasto kodo. 7Ka qolpaya lakki qeedoow ka fuula Yaahiwwe tura'e xarra tukkana Waaqa turopa dehaaysho. 8Ka qolpayasene lakki qara qoyritta kato; ka takka akka kalisoota a Yaahiwweti dehaado kodo ka takka akka koommaytoppanxata diisammo kodo. 9Ka qolpaytase Yaahiwwe qa'e qeedo ka kalisoota hasenta juppootati kodo ka dehaaysho. 10Ka qolpaytase akka juppoota samayta qapado ka koommayta oppanxata diisamo qoyritta qara pi'e qeedo ka a co fuula Yaahiwwe turopa dehaaysho.
11Ka qeetaadi desaaw xormase dehaaysho ka qoota mattadi isho a toolaaditi desa kalisoota hasenta juppootati kodo ka qalo. 12Ka fuula Yaahiwwe turaayye porase a kalissota qaraayye tinna kara porooda hooddo ka kara immako ka tankarta alaawnitto ka yooqamte harraamaappa immako ka kaatasene akata qulqullaawe kelopan kullo. 13Ka akka in toonini'i fuula Yaahiwwe tura'e tankartase yooqamte poroodase qara tuqo; qayyaadi ka dufanasene a diissata taapota a maakkuma qara ca tura deko. 14Ka diikase a xorma qudaayye shakkayta qeedo ka porase a diisata qara'e qinda piirtotatinni qupittaadin fifiddo; ka porase a diisata turandesa qupittaadin tappaan fiddoow.
15Ka kalisoota hasenta juppoota a samaytati'i, qolpaytase qeedo ka qaloow; ka diikaadi qeedoow ka qulqullitteeta qulqullowwa kelopan kullo ka akka diikase a xormasetin kode mina'e porase a diissata qarandesa ka turandesa fifiddo. #Ip 9:12 16Nyala ka ishin dapayta samayta a Isira'eeli isho juppootaaysho malla kaatosene akata qulqullaawe jaqqo; ka tukkanase xayyo ishootta a nyale otante co kuli asseew jaqqa. 17Arooni oto juppootaadi ka a toolaadi isho a samayta Isira'eeli piisa akka ishootta hasso koda'e kaatasene akata qulqullaawe kelopa kullooyye, haka sooko maliiyyi nama takka nefo tukkanose a Waaqa kelaayye in kinnaannin. 18Ka kammadesa porase a kalisoota fuula Yaahiwwe tura co kapopaxata sooka; ka diikase a xorma isho a qolpayta quda shakkayta qeeda ka kaassasene a porase a kalisoota qudan daato ka jaqqaysuma ishi koda. 19Ka diikase quda shakkayta qeedoow ka porase a kalisoota qarandesa qupittaadin tappan fifidda; ka porase a kalisoota xawwi reexo ka nyala samayta Isira'eeli kelaayye jaqqe.
Qolpaytase juppoota samaytatin koommaytoppopa diisamo
20Arooni oto kaatasene a kata qulqullaawe ka tukkanase a Waaqa isho porase a kalisoota jaqqo ka dikkisho kammaayye, a qolpaytase co qeedoow, 21ka harkaadi lakki matta qolpaytaseeti qara qapado; ka neequmtaaysho ka ishin dapaytaaysho ka juppootaaysho piisa qaropa oorsho ka torro ka nama a tura koden qudanne, qolpaytase koommaytoppopa kamma xata daano. 22Namase ka qolpaytase koommayta oppanxata diisho; qolpaytase ka juppoota samaytase piisa pora oppa nama in kallin oppopa ishin tawo.
23Sekammaayye Arooni ka tukkanase a Yaahiwwe kelopa kullo ka mehaddasene xaynaata qora talpa oppa dawame a kaatasene akata qulqullaawe kelopa kullinooyye kalsade isquda sooksho ka eyye diisho. #His 44:19 24Ka porase xawwi reexxame oppa dakintaadi pishaan jaqado ka mehaddaadi kalsado; ka sooko ka qeetaadi desa kalisoota kupannitto dehaysho ka qoota samaytati desaaw kalisoota kupannitto dehaaysho ka akka juppoota a mattaadi isho a samayta hasto kodo. 25Ka moorase isho hallaakase a kalisoota hasenta juppoota porase a kalisoota qara kupo. 26Nama qolpaytase koommaytoppopa kamma xata daane, a mehaddaadi a kalsade diipado ka dakintaadi pishaan jaqqado; ka kuli safara oppopa kalo. 27Xormase isho qolpaytase a hasenta juppoota malla diikaysho dehaade ka kaatasene akata qulqullaawe kelopa qeedame, so'asso ka kokaaysho isho uusaaysho, a safareeyye laka tula apittan kupamen. #Ip 13:11 28Nama a sene kupno a mehaddaadi diipado ka dakintaadi pishaan jaqado ka kuli safara karopa kullo.
Akkima kuyyaatase a haseenta juppoota ulfeessinaan
29Sede ishina'e itturopa a taanteta para para koddito; oto leya tappatta ooro kuyyaata kundattati ishin isho kalayta ishin oppa kalo piisa damta musada; ka oppa koda takka nefo in kodan. #Lewi 23:26-32; dikoota 29:7-11 30Kuyyaasetiiyyi ishin qulqullassa'e qeesitta akka hasenta juppoota akkattane'e koda, akka fuula Yaahiwwe tura'e juppootaayshin pisa oppa qulqullaawtan; 31kuyyaatase ka kuyyaata a nessuma a Yaahiwwe, a oppa xaysattan ishina koddita; ishina ka damta musattan; ini ka taanteta a para para ishina koddita. 32Qeesitta a xawwi reexammo ka pakka aappaayshoti oppa qeesitta a kutta kodda daatammo, isha mehaddasene qulqullaawe xaynaata qora talpa oppa dawame kalsada ka samayta akka hasenta juppoota akkado koda. 33Ka tukkanase a Waaqa ka kaatasene xaadi akata qulqullaawe isho porase a kalisoota jaqqa; ka akka qeesewwa isho xora samayta piisa hasenta juppoota akkaado koda. 34Sede, a taanteta para para ishina koddito; ka paroppa takkanne akka Isira'eeleta juppootaaysho piisa'e hasenta akkaatto koda.”
Ikka akka Yaahiwwe Muuse ajaje qara kodamte.
Currently Selected:
Mataafa orra Lewi 16: MaQu
Highlight
Copy
Compare
Share
Want to have your highlights saved across all your devices? Sign up or sign in
