Mataafa orra Lewi 14
14
Jaqqaysuma a nama paaqa dakinta kela dine kodamma
1Yaahiwwe ka Muuse haasawade ka kide, 2“Nama takka oto paaqa neeqa a dakinta quda a tuullino kela dinooyye, taanteta a jaqqaysuma a ishi kodammitto sede; a qeesitta turopa qeedamo; #Maati 8:4; Maari 1:44; Luqa 5:14; 17:14 3qeesitta ka safareeyye laka tulopa sooko ka isha tooyyo; ka oton keeto namoose paaqase neeqa a dakinta quda tuullino kela dineeyye, 4qeesitta a namoose a ishi jaqqaysuma kodamane'e, akka a xampira damamma a ca lakki ka qoyra a talta ka xaynaata a tiima isho hansaabittan de'ane'e a ajajo. 5Ka akka xampirasene oppa takka pisha ela a okta kara ca qara qalamto ajajo; 6ka qoota xampirteeta a kittooti desaaw, qoyra talta ka xaynaata a tiima isho hansaabitta qeedo ka xampirteetase kitto quda qapoow ka ollin diika xampirteese pisha ela qara qalamte karanxata kullisho; 7ka namase jaqqaysuma ishi kodammaan quda tappaan fiddo; ka akkima nyala in qapnin upnaysho; ka xampirteetose kitto lakoppandesa tupadesa diisho. 8Namase jaqqammo akka nyala in qapnaannini'i, a mehaddaadi a kalsanna diipado; ka nyirfa mattaadi isho a dakintaadi quda ca piisa kooshado, ka dakintaadi jaqado; ka sitiiyyi safara karopa kullo; ma xoori a tukkanaadiiyyi laka tula kuyyaata tappa piro. 9Ka kuyyaata tappattatiiyyi, mattaadi ka kawsaadi ka hirribaadi ka nyirfa mattaadi isho a dakintaadi quda ca piisa kooshado; ka mehaddaadi a kalsanna diipado ka dakintaadi jaqado; oori nyala in qapnaadooy.
10Ka kuyyaata settattatiiyyi haariyya laahadda lakki a toobumaan qapnin ka sukeenta a toobuma in qapnin a para takka pirte ka daamma paxaara kiilota sessa, a sayteetan tiqqiiren ka kalisoota untati koden isho sayteeta nitiroota quda harka sessa oppa takka dehaysho. 11Qeesittase nama jaqqino ka namase jaqqammo isho kalisowwaadi xarra tukkana Waaqa kelopa Yaahiwwe turopa dehaysho. 12Qeesitta ka haariyya laahadda oppa takka qeedo ka sayteetase kura looki kara kitto ollin kalisoota ishin dapaytati kodo ka kalsho; ka kalisoota lellehsammitto kodo ka fuula Yaahiwwe tura lelleehsho. 13Ka porase qulqullaawe a oppa kalisoota hasenta juppoota isho a kupannitto qalammitto oppa'e laahose qalo; maana malla, akka kalisoota hasenta juppoota qeesitta daasammitto mina'e a ishin dapayta kuli a qeesitta daasamtoow; sede nefo a akata qulqullaawteey. 14Qeesitta kalisootase a ishin dapayta oppa a diika shakkayta qeedo ka namase jaqqammo'e napahata akitta ka ampukuttaya a harka ka a loqta akkitta qaran qaqappado. 15Sa sayteetase kura looki kara kitto quda kanaataadi a harka pittitta kara shakkayteeta kishshado; 16ka qupittaadi a harka akittatinni sayteetase kanaataadi a harka pittitta kara kitto oppan qappado ka Yaahiwwe tura tappaan fiddo. 17Ka sayteetase kanaata harka kara ishi hasse quda qeedoow ka namase jaqqammooti'i, napahata akkitta ka ampukuttaya a harka isho a loqta akkitta qaran qaqappado ka diikase a kalisoota ishin dapayta qaran qaqappadoow. 18Ka sayteeta a kanaata kara ishi hasse matta namase jaqqammo qara tuqo ka fuula Yaahiww tura'e akka juppootaadi ishi hasso kodo. #14:18 are ka dikoota 20 qaraayye “akka jaqqaysuma akkado kodo” kidama i'ettanissa.
19Qeesittaaw namoose nyalaadippa jaqqammo malla a kalisoota hasenta juppoota dehayshoow ka juppootaadi akka ishi hasso kodo; ka kammaayyeew kalisoota a kupannitto qalo. 20Ka kalisootase kupannitto isho a unta porase a kalisoota qara dehaysho; ka seden akka juppootaadi ishi hasso kodo; namoose nefo a nyala in qapnini kodda.
21Ma xoori, namoose oton teekolayta ka sene piisa dehassa ettaninni in kinniniiyi, akka juppootaadi ishi hasso'e kalisoota ishin dapayta a lellehinnaane'e, a laaha takka dehaysho; ka kalisoota untati'i daamma paxaara kiilota sessa ka sayteeta nitiroota quda harka sessa oppa takka dehaaysho. 22Ka elela lakki taaki jiwjiwa a napaala lakki, akka ettaninno qara'e takka kalisoota juppootaati'i ka takka kalisoota kupannitto dehaaysho. 23Ka sene jaqqaysumaadi'i kuyyaata settattatiiyyi tukkana Waaqa kelopa fuula Yaahiwwe tura'e qeesitta kapopa dehaaysho. 24Qeesitta ka kalisootase a ishin dapaytati'i laha takka isho sayteeta kura looki takka qeedo ka kalisoota a lellehinnaane kodo, ka fuula Yaahiwwe tura lelleehsho. 25Ka laahase kalisoota ishin dapaytati dehaade qaloow ka oppa diika shakkayta qeedo; ka namase jaqqammo'e, napahata akkitta ka ampukuttaya a harka isho a loqta akkitta qaran qaqappado. 26Ka sayteese quda kanaataadi a harka pittitta kara shakkayteeta kishshado. 27Ka qupittaadi a harka akittaatin sayteetase kanaataadi a harka pittitta kara kitto oppan qappado ka Yaahiwwe tura tappaan fiddo. 28Ka sayteetase kanaata kara ishi hasse qeedoow ka namase jaqqammooti'i, ampukuttayaadi a harka isho a loqta akitta qaran qaqappade mina'e akkima turan diikase kalisoota ishin dapayta napahataadi a akkitta assew sayteetasetin qaqappado. 29Ka sayteeta kanaata kara ishi hasse matta namoose jaqqammo qara tuqo ka fuula Yaahiwwe tura'e akka juppootaadi ishi hasso kodo. 30Namase jaqqammo ka akka ettaninno qara'e eleellase oppa takka taaki jiwjiwa a napaala oppa takka kalisoota dehaysho. 31Ka takka kalisoota juppootati'i, ka takkaaw kalisoota a kupannitto'e, kodo ka kalisoota unta quda qapo ka dehaysho; qeesitta ka namase jaqqammo'e fuula Yaahiwwe tura'e juppootaadi akka ishi hasso kodo. 32Nama paaqa neeqa a dakinta a tuullino qapo ka kalisoota a jaqqaysuma a parpaaccisnitto dehassa malaale, taantetaadi sede.”
Jaqqaysuma a paarrota tika kelati
33Yaahiwwe ka Muuse isho Arooni'i haasawade ka kide, 34“Oto piitase a Kene'aani an ishina lehaanda daasho oppopa kaltaneeyye, oton piitase an ishina lehaanda daasho karaayye tika takka kara paarrota fidooyye, 35aappa tikoositi a aano ka qeesitta lelo ka kido, ‘wa paarrota paha'en tikiyyo kela akke.’ 36Mehadda a tikoose kela ca piisa akka in nyallini'i a qeesitta tikoose kelopa in kullinin ka paarrose in tooyyinin turanne, akka tikoose kela mehadda ca piisa sookshane'e a ajajo; ka kuli kullo ka tikoose kara tooyyo; 37ka oto tooyyo ka paarrotase kara akkooyye, oton keeto paarrotase qussa tikooseti quda kittaayye ka oppa paqiya urte ka karanxata ilaawi taaki tiimi ka akkaanniiyyi, 38qeesitta a tikoose kara lakoopa sooko ka tikoose kuyyaata tappa kara dufo. 39Ka kuyyaata tappattatiiyyi tiitaawow ka tikoose tooyyo; oton dukaatanne paarrose qussa a tikoositi quda paldattaan anniiyyi, 40qeesitta akka dakaddosen a qara paarrota kitta alle popoqqishan ka katamaayye laka tulan pora nyale oppopa dakkane a ajajo. 41Ka akka tikoose karan qussa piisa quda xooshan ka wossen xooshame katamaayye laka tula pora nyale oppopa tuqane kodo. 42Ishootta ka pakka dakaddosen popoqqishene oppa dakadda pila qeeden ka kara kakkalshen ka qussase piisa dooqqetan liten.
43Oton a tikoose kela deeteeyyeew, dakada pappaqshen ka dussaadi quda xooshen ka liten kammaayye, paarrose lammatta 44qeesitta a aano ka tooyyo; oton keeto paarrose tikoose kela paldatteeyye ikka akkaayye, paarrota tawni in kinnin a akata kokkoka'ey, tikoose inyalte. 45Tikoose alle pootamto dakaddaadi ka qoraadi isho dooqqetaadi piisa a haadamto ka katamaayye laka tula pora nyale oppopa tuqamto. 46A tikoose dufamteeyye, nama a karopa kullo piisa haka kalaakalati a nyale kodda; 47nama tikoose kela damta dammo taaki kela mukno piisa a mehaddaadi diipado.
48Ma xoori tikoose a litamte kammaayye, oto qeesitta de'o ka tooyyooyye, dukaatan tikoose kela paarrose ka paldaatta diisseeyye, qoota paarrose kela tawte malla, qeesitta tikoose akka nyala in qapnin a upnaysho. 49Ka tikoose jaqqa'e xampira lakki ka qoyra talta shakkayta ka xaynaata a tiima isho hansaabitta qeedo. 50Ka xampirasene oppa takka qeedo ka pisha ela a okta kara ca qara qalo. 51Ka qoyrase a talta ka hansaabitta isho xaynaatase tiima qeedo ka xampirteetase kitto quda qapo ka diikase a xampirteetase qalamte isho pishasene a ela karanxata kullisho ka tikase kelandesa tappaan fiddo. 52Ka pora asse pahon tikase diika a xampirteeta ka pishasene a ela ka xampirteetase kitto ka qoyra talta ka hansaabitta isho xaynaata a tiimatin jaqqo. 53Ka kamma'e xampirteetase kitto katamaappa lakanxata diisho; ka saantosetinni tikooseti'i taanteta jaqqaysuma kodo; tikoose ka a nyala in qapnin koddito.
54Seerose tooy taanteta a ishin paaqa dakinta quda a tuullino ka a mororoqno, 55ka paaqa tuullino a mehadda kalsannaane quda deeno isho paarrota a allewwa kela sooknitto, 56ka qappaaja ka sooka ka shaarota daasamte. 57Taanteta a ishin paaqa tuullino a mehadda kalsannaane quda deeno isho paarrota allewwa kela deenitto akka paata nyalisse ka in nyalinnin upnaannaan tooy sede.”
Currently Selected:
Mataafa orra Lewi 14: MaQu
Highlight
Copy
Compare
Share
Want to have your highlights saved across all your devices? Sign up or sign in
