Mataafa orra Lewi 13
13
Qoota paaqa dakinta qudati desa
1Yaahiwwe ka Muuse isho Arooni kide, 2“Nama takka oton dakintaadi quda'e qappaaja taaki sooka taaki shaarota deetaayye ka deesa a tuullino pahanaattaayye, a qeesittase Arooni taaki hellasene xaadi a diira qeesewwa kodde oppa takka kapopa ishin aanen. 3Qeesitta ka faykitteese xaadi dakinta quda kitto tooyyo; oton nyirfa faykitteese kapa caa'e attaadaayye, faykitteese ka karanxata tawtaayye, sede paaqa a dakinta quda a tuullinooy, qeesitta oto tooyyo kamma namoose akkima nyale a upnaysho. 4Shaarotase oto dakinta quda attaatto ka eeyye akkaannittooyye ka dakinta karanxata irri in kinniniiyyi, nyirfa quda ca ka in attaanniniiyyi, qeesitta a namoose paaqno kuyyaata tappa seero. 5Ka kuyyaata tappattaati paaqolayse tooyyoow; oton faykitteese'e a xatta'ew paha ka in paldaanniniiyy, a kuyyaata tappa kara isha seeroow. 6Kuyyaata a tappattatiiyyi, qeesitta a isha tooyyoow; oton faykitteese'e paldaanni in kinnin ka kokteeyye, qeesitta a namoose akkima nyala in qapnin a upnaysho; faykitteese kaypaataay, namoose a mehaddaadi a kalsanna diipado ka qulqullaawo. 7Ma xoori oton a qeesitta isha tooyye ka akka qulqullaawe upnayshe kammaayye sookase dakintaadi quda paldattaan anniiyyi, a amma qeesitta turopa dehaadoow. 8Qeesitta ka isha tooyyo; oton paaqase paldattaan anniiyyi, paaqa dakinta quda tuullinooy, namoose akkima nyale a upnaysho.
9Nama takka oton qoosha tuullino isha qapaayye, a qeesitta turopa ishin aanen. 10Qeesitta ka isha tooyyo; oton qappaaja ata dakintaadi quda sookeeyye, nyirfa kapandesa ca ka attaadeneeyye, qappaajose kara so'a a tiima ka akkaanniiyyi, 11Sede deesa dakinta quda a neeqaay, qeesitta akkima namoose nyale a upnaysho; namoose qoota akka nyale upnaysamte malla, orroppa xawwi in seerammin. 12Oton deesose a dakinta namoose quda sooke kamante paayyatte haka mattati isha quda pireeyye, qeesitta ka akkaayye, 13a qara ooro ka fayya isha quda tooyo; ka oton dakintaadi piisa attaadeeyye, a akka qulqullaawe upnaysho; qoota dakintaadi piisa attaatte malla, iqulqullaawe. 14Ma xoori, oton faykitteetase malini so'a a tiima ka kara akkaaniiyyi, a nyale kodda. 15Qeesitta oto so'a a tiima akkooyye, namoose akkima nyale a upnaysho; so'a a tiima wa nyale ka paaqa tuullinooy. 16Ma xoori oton so'osen tiima'e konaataayye, namoose a qeesitta kapopa aanoow. 17Qeesitta ka isha tooyyoow; ka oton faykitteese konaateeyye, namoose akka nyala in qapnin a upnaysho, nyala in qapooy.
18Nama takka oton dakintaadi quda'e qappaaja de'a ka dinaayye. 19Porose a qappaaja oppeela qappaaja pila a ata taaki a ishin tiima ka akkaadaayyeew, a qeesitta turopa dehaado; 20qeesitta ka faykitteese tooyyo, ka oton karanxata tawte, nyirfa a kapandesa ca ka attaadeneeyye, porose a qappaaja oppeela deesa neeqa a tuullino de'ey, namoose akkima nayle qeesitta a upnaysho. 21Ma xoori oton a qeesitta isha tooynooyye faykitteese karanxata in tawnin, nyirfa ata ka kapandesa in kinniniyye ikka ruqteeyye, qeesitta a kuyyaata tappa namoose seero. 22Ma xoori oton dakintaadi piisa quda'e sookteeyye ka paldaattaan anniiyyi, namoose akkima nyale qeesitta a upnaysho, paaqa a tuullinooy. 23Ma xoori oton sookase pora takka oppa tawni ka paldaanni in kinniniiyi, konaata a qappaajoseeti diisheey wa pila'enneey, namoose akka qulqullaawe qeesitta a upnaysho.
24Nama takka oton dakintaadi apittan kupadaayye, porose kupade ka attaadaayye, taaki attuma a ishin tiima qapaayye, 25qeesitta a porose kupade tooyyo; ka oton karanxata tawte, nyirafa a kapandesa ca ka attaadeneeyye, deesa neeqa a tuullino porose kupade oppa de'eey, qeesitta a namoose akkima nyale upnaysho. 26Ma xoori oton karanxata in tawniniiyyi, nyirfa kapandesa ca ka in attaannin ikka ruqteeyye, qeesitta a kuyyaata tappa kara namoose seero. 27Ka kuyyaata tappattati isha tooyyow; oton paldattaanne anniiyyi, paaqa dakinta a tuullinooy, namoose akkima nyale qeesitta a upnaysho. 28Ma xoori oton porose attaade pora takkoppa tawni ka paldaanni in kinniniiyi ka ruqeeyye, konaata a porose kupade diisheey wa pila'enneey, namoose akka qulqullitta kodde qeesitta a upnaysho.
29Diirta taaki iskatteeta takka oton matta taaki kawkawa quda'e faykitteeta ishi deetaayye, 30qeesitta a faykitteese tooyyo; oton karanxata tawte, nyirfa a kapandesa ca ka qaqalla'i ka puddayaysiiyyi, namoose akkima nyale qeesitta a upnaysho; sede deesa a matta taaki a kawkawa quda a tuullino. 31Ma xoori oto qeesitta tooynooyye, a karanxata tawte in pahanin, nyirfa poora ka kara in kinniniiyi, qeesitta a kuyyaata tappa kara namoose seero. 32Ka kuyyaata tappattaati tooyyoow; ka oton faykitteese mororoqnitto paldaanniiyyi ka karanxata tawniiyyi, nyirfa puddayaysa ka kapandesa in kinniniiyi, 33namoose a porose faykittoode diisho ka nyirfa kapandesa ca kooshado; qeesitta ka kuyyawwa a pila tappa kara isha seeroow. 34Kuyyaata tappattati qeesitta ka faykitteese mororoqnitto tooyyoow; oton ipaldaanni ka karanxata in tawniiyyi, qeesitta akkima namoose nyala in qapnin a upnaysho; namoose ka mehaddaadi a kalsanna diipado ka nyala mali kinnaado. 35Ma xoori oton akkima nyala mali co a upnayshe kammaayye faykitteese mororoqnitto paldaattaan anniiyyi, 36qeesitta a tooyyow ka otoon faykitteese mororoqnitto paldaattaan anniiyyi, kadi punu nyirfaadi puddayaata kodden ka in koddininiiyyi, tooyya isha parpaaccisni in kitto; namoose nama nyaleey. 37Ma xoori, faykitteese mororoqnitto oton para takka oppa'ew in tawniniiyyi ka in paldaanniniiyyi, nyirfa poora ka oppa dehanneeyye, faykitteese mororoqnitto idinteey, qeesitta akka namoose nyala in qapnin a upnaysho.
38Oton diirta taaki iskatteeta takka quda'e shaarta deetaayye, 39qeesitta a tooyyo; oton shaarotase awliiyyi, kaypaata a we in koonini dakintaadi quda de'ey, namoose nyala in qapo. 40Nama takka oto nyirfa qara piraman ikka moolodooyye, nyala in qapo. 41Nama a fuula turan nyirfa qara piraman ikka moolodo, nyala in qapo. 42Ma xoori oton moolotaadi taaki fuulaadi oppaayye faykitteeta ata ka ishin tiima deetaayye, sede deesa a tuullino mattoppa ishi de'e. 43Qeesitta a isha tooyyo; oton qappaajose faykittoode ka moolotoppa taaki fuuloppa ishi de'e ati ka ishin tiimiiyyi, deesa a dakinta quda a tuullino. 44namoose paaqa a dakinta quda'e qapa ka nyale; semmalla namoose akka nyale qeesitta a upnaysho faykitteeta mattoppa qapaay.
45namoose paaqose a dakinta quda tuullino qapo, a mehadda kakkaamade kalsado umma matta in filannin ma a afa turan ohaata qeedado ka ullupo ka kido, “Anti an nama nyale! anti an nama nyale.” 46Haka paaqose a dakinta quda tuullino isha quda co kara'e, isha nama nyaleey, qoota nama nyale kodde mallaaw, a safareeyye laka tula xawwi kallaado.
Mehadda a kalsannaane a paaqa tuullinon lahame
47Mehadda a kalsannaane a nyirfa kahirra taaki a xaynaata qora talpa oppa dawame, oton paaqa a tuullinonne lahamaneeyye, 48ka xaynaata taaki shaloota a dawamte taaki nyirfa kahirra taaki kollatta taaki mehadda a kalsannaane a kollatoppa kodame quda akkaaniiyyi 49ka qudaayye ilaawi taaki tiimiiyyi, qoota paaqa dakinta quda a tuullino kodde malla, qeesitta akkisha. 50Ikka tooyyo ka mehaddasene paaqose tuullinon lahame, kuyyaata tappa kara alle juuto; 51ka kuyyaata a tappattati mehaddoosen tooyyoow; paaqose a dakinta tuullino, oton ohaatase taaki shalootase dawamte taaki kollatta taaki mehadda a kalsannaane a kollattoppa kodame quda'e paldattaan aaneeyye, mehaddoosen wa nyale. 52Semmalla ohaase taaki xaynaatase taaki shalootase dawamte taaki ohaatase a nyirfa kahirra taaki xaynaata a qora talpa oppa shippamte taaki mehadda a kalsannaane a kollatoppa kodame, a paaqose a dakinta tuullino quda kaye piisa, wa nyale ka orra piraneey, qeesitta a alle apittoppa kupo.
53Ma xoori oto a qeesitta tooynooyye paaqase a dakinta tuullino ohaatase taaki xaynaatase taaki shalootase dawamte taaki mehaddasene kalsannaane a kollatoppa kodame qara paldaattaan anni in kinniniiyi, 54qeesitta akka mehaddoosen diipamane a ajajo; ka mehaddoosen kuyyaata tappa kara alle juutoow. 55Oto diipaman kamma qeesitta a tooyyow; oton paaqase a dakinta tuullino ishootta quda co pissaadin in purinniniiyyi, kadi punu paaqose a dakinta quda paldattaan in anniniiyyi, mehaddoosen inyaleneey, alle apittoppa kupa. 56Ma xoori, a qeesitta tooyyinooyye, oton paaqose a dakinta tuullino japaroose qara taaki mehaddoosen qara shakkattaan anniiyyi, qeesitta a porose (a ohaata taaki a xaynaata taaki a shalootase dawamte taaki mehaddasene kalsannaan a kollattoppa kodame) patta kareela muro. 57ma xoori, oton paaqose a dakinta tuullino ikki'i ohaase taaki xaynaase taaki shaloose dawamte taaki mehaddasene kalsannaan a kollattoppa kodame qara akkaanniiyyi, ka paldatta qara caayye, apittan alle kupa. 58Ohaatase taaki xaynaatase taaki shalotase dawamte taaki mehaddasene kalsannaan a kollattoppa kodame isasene turan diipame, paaqose a dakinta tuullino ka quda tawe, a lammatta diipameneew ka nyala in qapnaannin.
59Ohaata a nyirfa kahirra taaki xaynaata a qora talpa oppa dawamte taaki xaynaata taaki shalootoppa dawamte taaki a kollatoppa kodamte, oton paaqa a dakinta quda a tuullino quda kayeeyye, saanta ishin akka nyalen ka in nyallin upnaannaan seeradi sedeew.
Currently Selected:
Mataafa orra Lewi 13: MaQu
Highlight
Copy
Compare
Share
Want to have your highlights saved across all your devices? Sign up or sign in
