Mataafa orra Lewi 11
11
Pinaana a damama isho a damammi in kinnini
ooreta 14:3-21
1Yaahiwwe ka Muuse isho Arooni kide, 2“Samayta Isira'eeliti kide, ‘Pinaana piita qara ca oppaayye sene damtan. 3Pinaana a kamajaasso lakki paqqene ikka alalta alallaane piisa dama i''ettanissan. 4Ma xoori a kamajaasso lakki in paqqinini ikka alalta alalli in kinnini in daman; kaala i'alalli ma kamajaadi qoota lakki in paqqnin malla, ishin tura a nyale koddo. 5Muutteta i'alalli ma kamajaadi qoota lakki in paqqinin malla, ishin tura a nyalte a koddito. 6Kupalaata i'alalli ma kamajaadi qoota lakki in paqqnin malla a nyalte a koddito. 7Tuuyyata kamajaadi lakki'i paqqen ma alalta alalli in kittooy, ishin tura a nyalte a koddito. 8Ishina so'asso in daman umma leettetaaysho quda in kayan; ishin tura a nyale'ey.
9Pinaana pakatewwa isho kirrada kara kala oppaayye, a xoolla isho qoffolla qapa dameeta i''ettanissan. 10Ma xoori pinaana pakatewwa isho kirrada kara kala oppaayye, a piitandesa titmanna taaki a caatta qapa ka pisha kara kala oppaayye, a xoolla isho qoffolla in qapnini, a ishin tura a jippame a kodden. 11Qoota ishin tura a jippame kodden malla, so'aasso in daman; leettetaaysho nefo ka ishin tura a jippamte koddito. 12Uumata a pisha kelaayye kalo ka xoolla isho qoffolla in qapnin, a ishin tura a jippame koddo.
13Xampira oppaayyeew sene arepaxata dikame a ishin tura a jippame kodden ka so'aasso in daman. Xooxayta ka kawwaarayta ka kuyso allayitta 14ka seyya ka allitta ika lekayta 15ka qurrupayta ika lekayta 16ka kucceeta ka kulila ka kokorreeta ka karkaaja isho koskorta ika lekayta 17ka punsukkayta ka irikumi ka kakaano 18ka lukkalitta pishaappa ka yipra ka allita wa to'e dammo 19ka seyya ka sapiisa ika lekayta ka junjulaatteta isho shipinshipirraata.
20Pannaattewwa xoolla qapa ka loqqa afurin lelleehna piisa, a ishin tura a jippame a kodden. 21Ma a xoolla qapa ka loqqa afurin lelleehna oppaayye, a kamaja ishin pokkamaane qapa dameeta i''ettanissan. 22Sene nefo, torrayta ka farata ka de'aya ika lekayta. 23Ma xoori pannaattewwa a xoolla qapa ka loqqa afurin lelleehna piisa a ishin tura a jippame kodden.
24Senenne nyaltan; nama a leettetaaysho quda kayno piisa ka haka kalaakalati nyala. 25Nama leettetaaysho alle haano piisa, a mehaddaadi a kalsanna diipado; ma haka kalaakalati'i, a nyale kodda. 26Pinaana kamaja qapa kamajaasso ka lakki in paqqnin ka alalta alalli in kinnini piisa ishin tura a nyale a kodden; a leettetaaysho quda kayno piisa inyala. 27Pinaana piisa oppaayye a loqqa afuri qapa ka kanaatan yatanna piisa ishin tura a nyale a kodden; a leettetaaysho quda kayno piisa haka kalaakalati a nyale kodda. 28Nama a leettetaaysho alle haano piisa a mehaddaadi a kalsanna diipado ma haka kalaakalati a nyale kodda. Pinaanosen kuli ishin tura a nyale a kodden.
29Pinaana a piitandesa lelleehina oppaayye, sene arepaxata dikame ishin tura a nyale a kodden. Tuqa ka tapayta ka masakayta 30ka qanna ka naacca ka kupaata ka massatta ka pohomayta. 31Pinaanosen piita qara lelleehna piisa oppaayye sene a ishin tura a nyale kodden; a leettetaaysho quda kayno piisa haka kalaakalati a nyale kodda. 32Oton leettetaaysho'e meeha qara pi'aayye, meehose ka qoyroppa xefame taaki japaroppa kodame taaki kollattoppa heeddisame taaki qora talpa oppa shippaame piisa a nyale kodda; meehose a pishaappa affaysamo, ma haka kalaakalati a nyale kodda ka kammaayye quqlullaawa. 33Oton leettetaaysho'e meeha piita okta oppa kodame karopa pi'aayye, meehose isho wa meehose kara ca qoota nyalen malla, meehose alle pappaqsha. 34Pisha a meehose kara ca oton damta qara'e pi'aneeyye, damtose kuli a nyalteew; oton ikkayta meehose kara caayye, ikkaytose nefo a nyaleew. 35Meeha a qara leettetaaysho pi'ito, kadi punu okta taaki kisa koddeneeyye, a nyale'ey alle oppa pappaqsha; ishina wa nyale'ey. 36Oton leetteta ela taaki mirka pisha karopa pi'aayye, wa leettese quda kayte piisa nyala; ma eloose taaki mirkose in nyalo. 37Oton xotta a ayla a xaayame qara'e leettese pi'itaayye, xottoosen in nyalan. 38Ma xoori oton xottosene pishaappa affaysheneeyye, leetteta ka qara pi'iteeyye, xottoosen oori inyalan.
39Oton pinaana damta ishina daasama oppaayye takka tootaayye, nama a leettetaadi quda kayno, haka kalaakalati a nyale kodda. 40Nama leettese damo a mehaddaadi a kalsanna diipado, ma xoori haka kalaakalati a nyale kodda; nama a leettese alle ma'innoow a mehaddaadi a kalsanna diipado, ma haka kalaakalati asseew a nyale kodda.
41Wa piitandesa titmanna piisa a nyale'ewweey, in damammin. 42Wa karittaayshotin piitandesa titimanna taaki loqqa afur qapa taaki loqqa lekaya qapa piisa a nyale'ey, in damammin. 43Akka issi a nyalinnini'i wa piitandesa titmannaatinni issi in nyalshan. 44Anti an Yaahiwwe Waaqaayshin akkiman qulqullitta kodde ka xawwayta kodde mina'e, ishina asseew qulqullowwa kodda ka xawwi issi reexa diisheey, wossen piitandesa lelleehinaatinni issi in nyalshan. #Lewi 19:2; Peti 1ta 1:16 45Akkan Waaqaayshin koddo'e a piita Kipsi kara ishin sookshe ana Yaahiwweey, akkan qulqullitta kodde mina'e, ishina qulqullowwa kodda.
46Qoota pinaana a piita qara kala ka xampira moonta ka wa pisha kela kala isho wa piita qarandesa lelleehinaati desa, seerra daasame sede. 47Seerosetinni wa nyale ka a in nyallini; ka pinaana oppa wa damamma ka damammini in kinnini upnaattan.”
Currently Selected:
Mataafa orra Lewi 11: MaQu
Highlight
Copy
Compare
Share
Want to have your highlights saved across all your devices? Sign up or sign in
