Mataafa Uumata 50
50
1Yoosefi ka pukkase a aappaayshoti qara ittupaxata isi kate ka miintoppa dinkini ka pooyni. 2Ka orxayasene' xaadi qorsa upa akka pukka aappaayshoti shittoota a paxaaratin ropan ka kokshane ajaje. 3Orrase qorsa upo akka aata piitaaysho mina'e pukkase kokissa'e, kuyyaata kunda afuri ishootta qara qeette. Kipseeta ka kuyyaata kunda tappa isha pooyte.
4Ete pooyta dikkatteeyye, Yoosefi orra Feri'ooni olli koda koono kide, “Oton i''ana teyyannittaneeyye, aana Feri'ooni' lela ka kida'e, 5‘Aappinno a in toonin turanne, akkan piita Kene'aani opa pukkaadin kalo ka eyye' hawlase a deyyo'ew harmisade kara isha hawlo'e ana xaxtishe. Semmalla ana aano ka aappinno hawlo ka tiitaawo.’” #uuma 47:29-31
6Feri'ooni ka ete dakayeeyye kide, “Akka isha ke xaxtishe mina'e, aane ka aappaayshin hawlado.”
7Yoosefi ka oori ete aappaaysho hawla annooyye, orxaya a Feri'ooni ka orra isha olli koda koono ka qimoota Kipsi piisa 8ka toolaadi isho toolaaysho piisa ka isha olli aane. Hellaa shashakka isho kaharra ka telalla isho lo'alla patta Kessemi' hase. 9Sarkeelladda isho orra farta kulufsiisno nefo ishootta olli aane. Orra pukkosetin aane akata leki.
10Ete awta /okteeta takka a Taadi kidammitto ka kirra Yurtaanoositi qinda a piirtota opa kitto kayeneeyye, pooyta xaashen ka akata nyarrahen. Yoosefi ka porose oppa'e, torpa takkan pooysade. 11Kene'aaneta ete pooytase awta /okteeta a Taadi oppa akkiteeyye ikiite, “Nama kutta Kipsiiyyi toota in diinnin, pooyta ka ollin koopte.” Ka oori sede malla piita Yurtaanoositiiyyi ise qinda piirtota opa kitto'e, “Apeli misiraayim” kiden. Sede nefo afaa Iprutinni, “Pooyta Kipseeta” kideeta.
12Hellaa Yayqoopi akka aappaaysho ishootta ajaje mina'e koden. 13Ka pukkaadi qeeden ka piita Kene'aani opan aanen. Ka rahanase a hawla Mamireeyye qinda piirtota opa co Maakfeela kara' hawlen. Rahanose nefo dulase a Aprihaami turka malla Efrooni Hittitta qara pidde oppa ca. #koda 7:16 14Yoosefi ete aappaaysho hawladeeyye, hellaasso isho orrase isha olli aane piisa ollinni takka piita Kipsi opa tiitaawen.
Yoosefi akka qaapa kela hellaassotin pahe
15Hellaa opa Yoosefi ete aappaaysho to'e kammaayye, i'olli' kidene, “Hela amma oto Yoosefi dapase an xatta isha qara' koone iskara' qapado ka haalota ino qara qeeda faanooyye, attan koddina maanan koona?” 16Ka qepayta isha kapopa erken ka kidene, “aappinno a cooyye i'ino ajaje ka kide, 17‘Yoosefi kida'e, dapa ka juppoota a hellaassin xatta ke qara' koden ishootta' diishe.” Semmalla ino orxaya a Waaqa aappinno, dapa an ke qara' koone akka ino' diisso'en ke naappanninna.” Yoosefi ete sede dakayeeyye, ipooye.
18Sekkammaayye hellaasso mattaayshoti'i Yoosefi turopa dehaaden ka kaareeta ishi oorshen ka kidene, “Ino piisanti an orxayaattiiw.”
19Ma xoori Yoosefi i'ishootta' kide, “In fuuran, hela anan Waaqa? 20Ishina keeto wa neeqa ana qara' dikattenema, orrose awwe co piisa akka toota kela paho'e Waaqa a paxaaraati oorshe. 21Amma nefo ishin ka hellaassina'en wa' damtane' daashaay, in fuuran.”
Ka haasa fayya ishootta' haaswede ka qaapa kela ishoottan pahe.
Yoosefi ito'e
22Yoosefi toolaaysho ollinni piita Kipsiti' kallaaden. Paraadi ka dippa ka kudan kaye. 23Isha ka oopadda ka opoppa hellaa Efreemi kuli akke. Hellaasene a inna Minaase a Makriini ka isha qara' daladen.
24Sekkammaayye Yoosefi ihellaassoti' kide, “Xayyo amma kuyyaatan oppa to'o ifoolsatte. Ma Waaqa akka dukaatan ishin tooyyado in upa. Isha piisse oppa ishin sooksha ka piitase a xasa' kale ka kide, ‘Aprihaami ka Hisaaqi isho Yayqoopi'in daasha,’ oppopa ishin oorsha. 25Oto Waaqa ishin tooyyado ka piitoose opa ishin oorinnooyye akka' lafaayyo kuli issi olli qeettane'e, ana' xaxada.” Ka ishootta xaxacciise. #sooka 13:19; Iyya 24:32
26Yoosefi ete para dippa ka kudan pire kammaayye ito'e. Ikka akka aata Kipseeta mina akka in japnini'i, shittootan ropen ka kokshen. Ka saatineeta kara' mukshen ka pora kara pukkada xaaynaan kara' xaayen.
Currently Selected:
Mataafa Uumata 50: MaQu
Highlight
Copy
Compare
Share
Want to have your highlights saved across all your devices? Sign up or sign in
