Mataafa Uumata 49
49
Yayqoopi akka hellaadi' sake
1Yayqoopi ka hellaadi hale ka ishootta' kide, “Wa itturopa ishin qara' kaya'en ishina' lelaay, takka ana kapopa xooya. 2Hellaayyo waan anti aappaayshin Isira'eeli ishina' kiina dakkaysada.
3“Roopeeli, atti a kuutiyyo an innume co ka hupna qapooyye ke xaaye. Ke hupna ka ulfeenan hellaayyo piisa qara qapa. 4Ma qoota a pisha mina haalhaallitto malla, hellaassin qara saara koddeeta ke parpaaccisni in kitto. Atti qoola aappaayshina oppopa kalte ka lammitteetaadi olli mukte.
5Simooni isho Lewi nyiraamumaan, oli pahan ka tiyya koda'e, oranna pootanni. 6Ishootta miiranne hamiyya lekaya piren ka akka heenattaaysho qara lo'alla lekaya qiqqintilen. Semmalla anti wa dikannaane oppa an caado, umma wa olqara oorsannaane karopa an kalo. 7Miiroose xaaysho orra fuurinno ka nyiraamumoosen xaaysho koope a jiijamen. Piita Isira'eeli oppandesan ishootta pasisha ka orroppandesa ishootta fida.
8Yihuta, atti xolmaappa paarkaala qapta, hellaassin ka ke kalataysadan ka kaareeta ke oorshan. 9Innaayyo Yihuta, a' haaritta karma mina; oto wa dama qapadooyye, rahanaadipa tiitaawa ka a karma mina fuura mali mukaay, ata ayno isha xa'issa' nyara?#dikoota 24:9; kele 5:5 10Haka piddampayta a samayta piita piisa isha'ew ajajama' deeno kara'e, nuqusuma harka Yihuta oppa'ew tawa, uleeta a siltaana (a nuqusuma) umma nama a harkaadi oppa poqqisho in caado. 11Qoota wayneeta akata palaysado malla, harreeta quduppatta wayneeta quda hidda,
ka innayya harreeta taama wayneese quda'ew hidda.
Ka taadeta wayneetatin mehadda diipada,
ka wayneeta diipamte ka akata me'aawnitton ohaata diipada. 12Ildaadi taadeta wayneeta ikaanne tittiimnaadan
ilkaadi ka a miilota mina attaadan.
13Saaplooni pakateeta kapan desa kallaada
kamkama pakateetaadi mina'e markapadda ka qaqqa'adan.
Xeelaadi nefo, haka Sidoona'e kaya.
14Yisaakoori akka harreeta a kokkoka mina
ka arta a kalla kara muka,
15ma xoori oto porose a nessuma akka paxaari
piitoose kuli ka ilaawi akkooyye,
fe'isamaa'e tulta kata
ka a karpishsha mina' yaala.
16Taani kafa Isira'eeli oppa takka ka orraadi kuli muksha.
17Isha poroppaayye akka maaka hadda kuure mina.
Ka akka aappa farta kulufsiisno pi'o'e poroppe asada
ka farta tupa kamanta qaniina.
18Oo Yaahiwwe! dinaaytin asada!
19Kaati, tuula isha kamma' tuula
isha ka ishootta kamma xopta dawa ka kamma' tuulaaw.
20Aseeri akata teyantooda
ka damta me'aawnitto nuqussa' koda.
21Niftaalemi akka kuumanta a fuura mali kallaannitto,
ka nyalqa papaxxaara dallitto mina.
22Yoosefi akka qoyra ela pisha qara co,
a taammaadi dedderi mina'e dalta tupaxata dala.
23Paarkaalaadi akata isha torpan
ka paantaan isha pokan ka pora isha daanan,
24ma xoori hupna a Waaqase a Yayqoopi kokkoka
kokkonumtose' xaadi a sikmayta ka tooytampaytase a Isira'eelitinni,
harkaadi a paantaan qapade ikokkonnaada
hupnaadi umma in ettansamo.
25Waaqa aappaayshina'e ke qaarqaara
Waaqa we piisa ettaninno moonte xata roopanne
ka piita Keleela pisha paadissaan ke' saka
ka horeeta ka hellaa kuli ke' daasha.
26Saka a aappaayshin ke' sako,
isase irrowwasene xattaaw eeyye ca ka lellehni in kinnini
ka kunkunnawwasene parapara kallaanna
ka orra xasanna piisa qara jaala.
Sakoose piisa a Yoosefi,
isase saara hellaassoti' kodde qara'e a koopo.
27Piniyaami yoyta pinaana nyifno
pinanta a teykani qapo i'ammayyini
a kalakala qapo xoori iqoonni.”
28Kaffasene a Isira'eeli kudanka lakki sene. A aappaaysho ishootta' saknooyye, akka ishi pahato mina'e ishootta' sake.
Toota Yayqoopi
29Sekkammaayye Yayqoopi hellaadi ajaje ka kide, “Anti toota'en foolsadeey, oton to'ooyye, pukkiyyo qeeda ka dulase a Efrooni a Hiittitta oppa ana hawla. 30Hawloose nefo piita Kene'aani a Mammireeyye qinda piirtota opa Maakfeela kara ca. Dula oppa hawloose co Aprihaami Hiittittase Efrooni kidammo qara pidde. #uuma 23:3-20 31Aprihaami isho iskatteetaadi Saara ka Hisaaqi isho iskatteetaadi Ripiqa eeyye'ew hawlamen. Anti nefo eeyye'ewwen Liyya hawlade. #uuma 25:9-10; 35:29 32Duloose isho rahanose a hawla takka'e Hittaatta qara piddameneey, ana nefo eeyye'ew hawla.”
33Yayqoopi ete hellaadi dehaama dikkisheeyye, porase a oppa' mukke opa'ew loqqaadi ollopa oorsade ka to'e.
Currently Selected:
Mataafa Uumata 49: MaQu
Highlight
Copy
Compare
Share
Want to have your highlights saved across all your devices? Sign up or sign in
