Mataafa Uumata 48
48
Yayqoopi akka Efreemi isho Minaase a hellaadi mina kode ka ishootta' sake
1Sekkammaayye erkana kiina'e, “Aappaayshin ipaaqni,” Yoosefi qara kaye. Isha ka hellaadi lakki Efreemi isho Minaase isquda' qeede ka aappaaysho' tooyya aane. 2Yayqoopi ete akka innaadi Yoosefi isha tooyya' de'e dakayeeyye, ikokkonsade ka ela xa'e.
3Ka Yoosefi' kide, “Waaqa we piisa ettaninno piita Kene'aaniti pora Loosa kidammo oppa'e ana akkaade ka ana' sake. 4Ka ana' kide, ‘Sanynyeetaaytin leksha, ikka horta ka samayta a leka koddita, anka piisse are kitto ishootta' daasha; ikka haka paraparati koddayyaataaysho' koddita. #uuma 28:13-14
5Amma innaayyo, hellosen xaayti lakki an anti piita Kipsi opa an deenin turan xaayatte, a xayyo kodden. Akka Roopeeli isho Simooni xayyo kodden mina'e, Efreemi isho Minaase assew hellaayyo kodden. 6Arepa desa hellaa a ishootta kamma xaaynitta'ew, a xaayti kodden ka maxxa a Efreemi isho a Minaasenne hellaayyo olli kodayteetiyyo oppa qootaden; 7an piita Mosoppotaamiyaati piita Kene'aani opa tiitaawno ka Efraata kapa foolsadeeyye, aayyaassin Raaheeli poroppa'e ana qara' toote. Anka porose a Efraata (isase Petelehemi kidamte) opa anno kapa ishetta hawlade.” #uuma 35:16-19
8Ka hellaa Yoosefi akke ka kide, “Ata sene hellaa ayno?”
9Yoosefi ka kide, “Hellosen Waaqa areeyye ana' daashe.”
Yayqoopi ka kide, “Akkan ishootta' sako'e, ana kapopan xooye.” 10Yayqoopi' qoota kere malla ilda qara' lule, ikka paata akkini in kinnin. Semmalla Yoosefi ka hellaadi isha kapopa dehayshe. Ikka ishootta hadduune ka diddinke. 11Ka Yoosefi' kide, “Ha anti an lammata ke akko ana in pahanaanne ma, Waaqa xoori ke pattannema, hellaatti kuli ana akkishe.” 12Yoosefi ka oori kilpalla Yayqoopi qara hellaadi mayshe ka isha mattaadi kapan loqaadi kela kilpiippade.
13Yoosefi ka hellaadi lakki qeede ka Efreemi harkaadi a akittatin qape ka Yayqoopi'i qinda pittitatin qaatishe ka Minaase harkaadi a pittitatin qape ka Yayqoopi'i qinda akkittaatin qaatishe. 14Yayqoopi' xoori harkaadi olqaran tarpishe ka harkaadi akkita matta a kussitta, a Efreemi qara' qapade ka harkaadi a pittitta matta a qaarta, a Minaase qara' qapadeew. 15Ka Yoosefi' sake ka kide, “a Waaqase a aappadaanno Aprihaami isho Hisaaqi ishin kallaaden ka sikimaytiyyo kodde ka innume paayye ka haka awweti ana tooyte, a hellooseneti' sako! 16Erkampattootase rakkoota piissa kela anan pahate a ishootta tooytito. Sanynyeetaaysho a piita qara' horto maxxiyyo ka maxxa aappadaanno a Aprihaami isho a Hisaaqi dakaytisso.”
17Yoosefi ete akka aappaaysho harka akkita Efreemi qara' qapade akkeeyye, ishi'i neeqnaatte. Ikka harkase a aappaayshoti' qape ka matta Efreemi qara qeedeta ka a Minaase qara' xaaya fade. 18Ka kide, “Aappo, harkaayti oorsado ka qarta sede are cooy, qara akkittaayti qapado.”
19Aappaaysho xoori ikide, “In upa, ha innaayyo in upa, sanynyeeta Minaase nefo ilekaatta ma, kussitaadi isha qara qapnaada. Sanynyeetaadi nefo akata lekaatta.” 20Ka kuyyaaseti ishootta' sake ka kide, “Hellaa Isira'eeli oto olli' saknaane maxxaayshina halan ka kidane, ‘Waaqa a akka Efreemi isho a Minaase mina ke' sako.’”
Ka Efreemi Minaase tura' qattishe. #Ip 11:21
21Sekkammaayye Yayqoopi iyoosefi' kide, “Xayyo amma kuyyaata an oppa to'o ifoolsatte ma Waaqa ishin olli caay, isha piita a aappadaassina oppopa ishin oorsha. 22Xawwiddesaaw, piitase a Sekemi an orannaan Amoorata qara qeede, hellaassin qarannen harka takkan jaalshe ka ke' daashe.”
Currently Selected:
Mataafa Uumata 48: MaQu
Highlight
Copy
Compare
Share
Want to have your highlights saved across all your devices? Sign up or sign in
