Mataafa Uumata 41
41
Yoosefi akka olsa Feri'ooni fure
1A Yoosefi olsa fure para lakki kammaayye, nuqusa Kipsi Feri'ooni ka olsa olsoode. Ka olsoosenetin kirra Appaayi kapa' qa'ade. 2Ka okkaya a kakappa ka papaxxaara tappa a kirra kara sooke ka maanta deenna akke. 3Ka kamma'ew, okkaya a apda qina'a ka kara akkaannaane tappa ka kirrase kara sookeneew ka okkayasene deyyo sooke ka kirra kapa ca kapopa aanen ka kapa' qa'aqaden. 4Okkayasene a'apda ka okkayasene kakappa' loqen. Nuqusase ka oori mukittaappa impase. 5Ka mukeew ka a lammattati olsoodeew ka olsasenetinni unta a matta kukutta ka papaxxaara tappa qapto akke. 6Kamma'ew, unta a atoota dawte ikka qaate ka qaampite a matta tappa qapto akkeew. 7Mattadasene a untase qaampite tappa ka isasene kukutta ka papaxxaara loqen. Nuqusa ete impaseeyye, akka olsa koddite upnaade. 8Teykante ete mukittoppa xaanooyye, dikatta ka isha kara' koope. Ikka so'aya ka ookka a piita Kipsi piisa ollopa halacciise ka olsa olsoode ishootta' torre. Ma xoori olsoosen nama takka nefo fura in ettaninne. #Taani 2:2
9Sitiiyyi saara a orxaya nuqusa taadeta daddaannaati ka nuqusa' kide, “Dapa an kode awwen matte oorsade. 10Ha nuquso, a ana ka saara a orxaya damta koonoti miirotteeyye tika ajajampayta tika hidaati ino hidacciiste. 11An eeyye kinnooyye halkeetta takkaayye, anka lamatti olsa olsoonne. Olsaanno nefo furaasso karkar. 12Sitiiyyi Iprutta takka orxayta ajajampaytase a tika hida'e ino olli tika hidaati ca. Anka olsaanno ishi' torrine ika ino' fure. 13We piisa ka akka isha' kide qara' de'en. Anti ka kodiyyo a deyyo qaropa oore; saarase a orxaya damta koonaati xoori ifannisame.”
14Feri'ooni ka oori Yoosefi kamma orra erke. Ikka aanen ka tika hida kara jarjartan yoosefi qeeden. Yoosefi ka matta kooshade ka mehadda pursade ka nuqusa kapopa kulle. 15Feri'ooni ka ishi' kide, “Olsaan olsoode ka nama olsoosen furo ka dapade. Ma ke olsa fura ettaninni kiini anka dakaye.”
16Yoosefi ka kide, “Ha nuquso, anti olsa fura an ettaninni an co ma, Waaqa patta olsa maana akka koden fura ettaninni.”
17Feri'ooni ka kide, “In olsoode ka kirra Appaay kapa' qa'ade pahata. 18Ka okkaya a kakappa ka papaxxaara tappa a kirra kara sooke ka maanta deenna akke. 19Kamma'ew, okkaya a yarade ka a apdade qina ka kara akkaannaane tappa ka sookeneew. Umma piita Kipsi oppa'e, okkaya asse nenneqa apari an akkine. 20Okkayasene yarade ka apda ka okkayasene kakappa tappa paayyota' sooke' loqen. 21Ete loqen kammaayye, a deyyo mina'ew apdaden, umma a okkaya kakappa loqe in pahan. Anti ka mukittaappa impase. 22Anka mukeew ka a lammatati olsoodeew. Ka olsasenetinni unta a matta kukutta ka papaxxaara tappa qapto akke. 23Kamma'ew, unta a atoota dawte ikka qaate ka qaampite a matta tappa qapto akkeew. 24Mattadasene a unta qaampite tappa ka isasene kukutta ka papaxxaara loqen. Anka olsa an olsoode so'aya' torre. Ma xoori olsoosen maana akka koden nama takka nefo fura in ettaninne.”
25Yoosefi ka Feri'ooni' kide, “Olsadoosen xaayti piisa we takkaneew akkinni. Ha Waaqa, wa ituropa koda heena'e tura desa qattishe ka ke upnayshe. 26Okkayosen papaxxaara tappa para tappa. Mattadosen a unta tappa kuli para tappaaw. Olsoosen lakki piisa we takkaneew akkinni. 27Sene ishootta kamma sooke, okkayosen a'apda ka nenneqa'ew parra loota tappa akkinni. Mattadosen a unta a atoota dawte ikka qaate ka qaampite parroosen a loota tappaaw akkinni. olsoosen lakki we takkaneew akkinni. 28Akkan ke' lele mina'e, Waaqa wa ituropa koda heena'e tura desa qatishe ka ke nuqusa upnayshe. 29Piita Kipsi piisa qara'e parra hiira tappa de'a. 30Kamma'ew parra a loota tappa ka de'aneew. Qoota piita akata loosatto malla, parrasene a hiira iteymaman. 31Lootose piita qara' deeto qoota akata malli neeqnaatto malla, wa parroosene a hiira kela hasa in caadan. 32Sede a olsoosen oppa oorte ka akkite, akka Waaqa irra qara wossen qeeda' piisade akkinni.
33“Semmalla, nama ooka ka hayyoota kodde fade ka piita Kipsi piisa qara' shuume. 34Ka orra wa parroosen a hiira tappa oppa palina piisa qara harka keni oppa takka ollopa poho shuumeew. 35Ka akka parroosen a hiira deena oppa unta ollopa pohane ajaje. Ikka katamaddaappa kosadda karopa ollopa kalshen ka tooyten. 36Untoose ollopa xaayammitto, piita Kipsitin parrasene a loota tappa itturopa deena kela ishootta tooytita; piisse ka pora asse pahon doxa kela pahata.”
Yoosefi akka piita Kipsi qara shuumame
37Wossene a Yoosefi lele ka nuqusa isho orra isha olli piita mukinno xasayshen. 38Nuqusa ka orra isha olli piita mukinno kide, “Nama a hapura Waaqa kara co a Yoosefi paho aysha'e akkaada?” 39Ka oori Yoosefi kide, “Waaqa sede piisa ke upnaysheey, ooka ka hayyoota a ke paho in co. 40Semmalla, akka tika nuqusa mukisso'en ke shuumeey orriyyo piisa ke ajajama. Qootan nuqusa kodde malla ana patta ke qara qapnaada. #koda 7:10 41Tin anti amma piisse a Kipsi piisa qara'en ke shuume.” 42Ka jifeetase a kobbeeta nuqusuma qara kitto qupittaadi quda yuke ka qupitta Yoosefi quda' kalshe. Ka kaappa paxaara kuli isha quda' kalshe. Ka xolma kela yaateta warqeeta ishi' kalshe. #Taani 5:29 43Ka sarakella a nuqusa a lammatta qara' kutiishe. Orra nuqusa tooytino ka Yoosefi tura' qatte ka nessa a kuttan kiini, “Isha tura kaareeta oorsha.” Yoosefi pora asse pahonne piita Kipsi qara' mukissampayta kodde ka shuumame. 44Feri'ooni ka Yoosefi' kide, “Anti an nuqusaay, ana maliiyyi, nama takka nefo a atti' kiito maliiyyi, we takkan nefo qappatta in ettansho.” 45Ka maxxa “Saafnaati pa'inahi” kidammo Yoosefi' kode ka enenta a Potifaara takka Asnaati kidammitto a qeesitta a katama Ooni hemitta ishi' daashe.
46Yoosefi a Feri'ooni nuqusa piita Kipsi olli koda koda paayyeeyye, paraadi kunda sessa. Ka tika nuqusa kara sooke ka piita Kipsi piisa oppa tooya'e pora aane. 47Parrasene tappa a hiira oppaayye piita Kipsi oppa'e unta ka akata palite. 48Ikka unta a parroosen a hiira tappa oppa piita Kipsi kara' palite ollopa poote ka katamadda karopa ollopa kalshe. Unta dullaappa palite piisa katamadda a kapa' dedeha karopa kalshe. 49Yoosefi asse kode ka unta a tahayta kirra mina akata mali koopte akka ollopa kalto kode. Untase' qoota akata koopte malla, hiilan ekkassa kuli malaale ka asseew ollopa tuttuqe.
50A parrasene a loota tappa in paayyannin turanne, Yoosefi iskatteetaadi Asnaati enentase a Potifaara a qeesitta katama Ooni ollinni hellaa diira lakki xaayaden. 51Yoosefi ka kide, “Waaqa poqalla toolinno ka rakkoota ana qara' kayte piisa ana teymacciise,” Ka innaadi a kuutati maxxa kode ka kide, “Minaase.” 52Ka kideewwe, “Piisse an oppa' rakkade oppa'e Waaqa hellaa ana' daashe,” Ka kussita maxxa kode ka kide, “Efreemi.”
53Piita Kipsiti parrasene a hiira tappa ka tarpen. 54Ka akka Yoosefi deyyo'ew lele mina'e, parrasene a loota tappa ka paayyaden. Piita apari kitto piisa ka loosatte. Ma xoori piita Kipsi patta kara unta kitta. #koda 7:11 55Piita Kipsi ete loosateeyye, samayta takka'e Feri'ooni kapopa aane ka akka unta ishootta' daasho'e isha naappade. Isha ka ishootta ajaje ka kide, “Aana ka wa Yoosefi ishina' kiina piisa koda.” #Yoha 2:5
56Qoota doxa piita Kipsi piisa qara akata koopaan anno malla, Yoosefi kosaddasene a karopa unta tuqene piisa akka pappanan ka unta ka orra Kipsiti katamto kode. 57Qoota piita piisa dikke loosatte malla, piita a lekatiiyyi orra unta piddatta Yoosefi kapopa de'e.
Currently Selected:
Mataafa Uumata 41: MaQu
Highlight
Copy
Compare
Share
Want to have your highlights saved across all your devices? Sign up or sign in
