Mataafa Uumata 42
42
Hella opa Yoosefi akka Kipsipa aanen
1Yayqoopi ete akka unta piita Kipsiti kitto dakayeeyye ihellaadi'i kide, “Ata hellaayyo maana'e are pora oliiw tooynittan? 2Anti akka unta piita Kipsiti kitton dakayeey, akka loota ino in pirrini'i, aana ka eyyeeyye unta ino' pidda.” #koda 7:12 3Hella opa Yoosefi kudan ka unta pidda piita Kipsi opa aanen. 4Yayqoopi' xoori, akka rakkoota kussittase a Yoseefi Piniyaami qara in kaynini'i, ishootta olliiyyi in erkine. 5Qoota piita Kene'aani kuli loosatte malla, hellaa Yayqoopi unta heratta'e piita Kipsi opa orra olli aanen.
6Sitiiyyi Yoosefi' qoota piita Kipsi mukinno malla, orra piita pisa oppa deeno'e unta kanni. Hellaasso nefo ka isha kapopa de'en ka kaareeta ishi' oorshen. 7Yoosefi ete hellaasso akkeeyye i'ishootta upade. Ma xoori akka nama a ishootta in upnin mina'e miiran ishootta kaassade ka kide, “Ishina ayshaayye' deeten?”
Ishootta ka kidene, “Unta piddatta'en piita Kene'aaniti xata deene.”
8Yoosefi ihellaasso upade ma, ishootta isha in upanne. 9Ikka olsasene a qootaayshoti desa olsoode matte oorsade ka ishootta' kide, “Ishina a' lettissampaya ka saanta ishin piitinno torpitan lettissa' deeten.” #uuma 37:5-10
10Ishootta ka kidene, “Poqallaanno, ha ino an lettissampayaannema, ino orxayaatti unta piddatta patta mallan arepa deene. 11Ino piisanti an hellaa toola takkati'iw. Ino an orra nakayata' disheey an lettissampayaan.”
12Yoosefi ka kide, “Deerta' koonittan! Ishina asu saanta ishin piitinno torpitane lettissa'e' deeten.”
13Ishootta ka kidene, “Ino orxayaatti, an nama kudanka lakki, an hellaa toola takka ka piita Kene'aaniti kalla. Innaanno takkan Ipaten. Qussaqunaashaaw tikoppa'e aappa kapa' hase.”
14Yoosefi ka kideewwe, “Akkan deyyo'ew kide mina'e, ishina dukaatannen lettissampaya. 15Akka' dukaata qaptan waan ishin upnaada, qussaqunashosen xaayshinanne' deetan. A taakati maxxa Feri'ooninnin xaxanniiy, a innoosenen deetan mali an ishina an diisho. 16Oton dukaata' haasawannittane, ishin oppa nama takka a aano ka innoosenetin de'o. Ishina a hase kello are hidaappa'e tawtan. Oton wossen a' kiitene darta koddaayye, maxxa Feri'ooninnin ishina' lelliiy, ishina dukaatanne a lettissampaya.” 17Ka kuyyaata sessa hidaappa ishootta nakayshe.
18Kuyyaata sessattati, Yoosefi ka hellaasene xaayshoti' kide, “Anti an nama Waaqa'ey, oton issin paha' heentaneeyye, waan ishina' kiina dakaya. 19Oton asu keeto'e a orra nakaytatiiyyi, nama takka a ishin oppa are' haso. Ka ishina a kela hase tooloose xaayshin doxe'e, untan kala. 20Akka orra nakayta kodditen waan ishin upnaada, qussuqqunaashasene a' kiinittaneetinni' deetan ka saantosetin toota kela pahatan.”
Ishootta ka oori oppa' salen. 21Ka olli' kidene, “Ha dukaatannen innaanno qara karpa koone. Se a awsetiiyyi ino naappanno ka pora pooyno an ka isha suraysatta diinne malla awwe rakkoose piisa ino qara' kayte.
22Roopeli ka ishootta' kide, “Akka innoosen qara wa neeqa a' koonini'i, an ishina an dehaamme? Ishina' xoori ana'e a' dakayne, diikaadi ka awwe ino kamma faani.” #uuma 37:21-22 23Qoota Yoosefi oto ishootta olli haasawannooyye simapaloota isha afaa oorinnitto malla, akka Yoosefi wa torraannane dakayno in upnaanne. 24Isha ka oori ishootta kapa lakopa sooke ka pooye. Ka desa oore ka ishootta olli haasawade ka ishootta oppaayye Simooni qeede ka iltaaysho oppa desa hidacciise.
Hella opa Yoosefi akka piita Kene'aani opa tiitaawen
25Yoosefi ka orra isha kela koda koono ajaje ka kide, “Akallaasso oppa unta ishootta immaka ka kaajasene a untan piddannaane kuli akallaaso qaropaaw ishootta' xaaya. Ka kalaata kuli ishootta' qa'a.” Ikka akka ajaje mina ishootta' koden. 26Hellaasene a opa Yoosefi ka untase a heraaden harrewwaasso qara fe'aden ka kalta' xa'en.
27Ete poroppa ishootta qara' dumte ikka mukitta' harmisannaaneeyye, Ishootta oppa nama takka harreetaadi'i unta kussa fade ka akala fure. Ete akalase furrooyye kaajaasene a untan pidda' de'e unta qara hiddame ikka akke. 28Ka hellaassoti kide, “Kaajaayyo i'ana ooren. Tin are akala kara'en akke.” Ikka piisani tatammaqen ka xarri ka olli' kidene, “Ata Waaqa maana ino qara' qeede?”
29Ka piita Kene'aani opa Aappaaysho Yayqoopi kapopa tiitaawen. Ka wa ishootta qara' kaye piisa ishi torren. 30Ka kidene, “mukissampaytase a piita Kipsi ilda neeqatinni ino tooye ka kide, ‘Ishina piitiyyo lettissa'e' deeten.’ 31-32Ino ka kiine, ‘Ino an hellaa toola takka an ama kudanka lakki. Innaanno takkan ipaten, qussaqunaashaaw Kene'aani'i Aappa kapa' hase. Ino an orra nakayta diisheey, an lettissampayaan.’ 33Aappaase mukissampayta kodde ka ino' kide, ‘Akka orra nakayta' kodditen upnaata'e, nama takka a ishin oppa a ana kapa tawo ka ishina hase toolaayshina a doxeeti'i untan kala. 34Ka innasene kamma oorshetin de'a, sedennen akka a lettissampaya a' koddinin upnaaday. An ka innasene ishina' daasha, akka fuura mali piisse oppa paata herattan.’”
35Sekkammaayye, ete akallaasso tura furen ka kara unta tuttuqnnaaneeyye, kaaja ishootta piisa ka akallaasso kara akkaaden. Aappaaysho isho ishootta ete kaaja ishootta oore akkeneeyye akata tatammaqen. 36Yayqoopi ka ishootta' kide, “Ha ishina oori hellaappa lullee ana hattinnitan. Yoosefi ipate, Simooni ka dapadeew. Amma akka Piniyaami qeeda faanittaneewwe? Rakkoose piisa ana qara'ew kayteey, xaayshin maana ishina' koota.”
37Roopeli ka aappaayshoti' kide, “Piiniyaami harkiyyo oppa' daashe ka ana ishin tiitaawaay. Oton ishin an tiitaawnin, hellaasene xayyo a diira lakki kapa' leyshe.”
38Yayqoopi ka kide, “Inna! Yoosefi ito'e, isha takka ka aayyaassoti' haseey, ka punu akka heente koddita nefooyye an innaayyo ishin olli an erko. Oto poroppa we qara' kayan, ana are kere, akku nyarrahatannen to'a.”
Currently Selected:
Mataafa Uumata 42: MaQu
Highlight
Copy
Compare
Share
Want to have your highlights saved across all your devices? Sign up or sign in
