Mataafa Sooketa 6
6
1Sekammaayye Yaahiwwe ka Muuse' kide, “Waan Feri'ooni qara' koda amma akkita. Harkase' xayyo kokkoka qaran xaate'e akka aanane'e ishootta diisha ka laadi harkase' xayyo kokkoka minan alle piitaadippa ishootta daana.
Akkima Muuse a lammattati' halaame
2Waaqa ka Muuse' kideewwe, “Ha anti an Yaahiwwe; 3Akkan Waaqa a we' piisa ettaninno koddennen Aprihaami ka Hisaaqi isho Yayiqoopi tura' akkaade. Ma xoori, maxxose xayyo Yaahiwwe kidamenne, an ishootta'en akkaanne. #uuma 17:1; 28:3; 35:11; sooka 3:13-15 4Ka piisse a Kene'aani a oppa xaykiyya kodden ka kallaannaan akkan ishootta' daasho'e, ishootta olli kodayteeta kodade. 5Semaliiyyiiw, quujattase a samaytiyyo a Isira'eeli isase a Kipseeta karpishshadda ishootta kodatte in dakaye ka kodayteetase' xayyo matte oorsade. 6Semmalla samayta Isira'eeliti' kide, ‘Anti an Yaahiwwe ka qampara Kipsi kela ishin sooksha; ka karpishshuma kela nata ishin sooksha ka harkase' xayyo deraade isho hupnase' xayyo kokkokan ishinan pahada. 7Samaytiyyo'en ishin kodada ka Waaqaayshin kodda; ishina ka a karpishshuma piita Kipsi kela ishin sookshe akkan anti Yaahiwwe Waaqaayshin kodde upnaattan. 8Ka piitase an xaxade ka kide, ‘Aprihaami ka Hisaaqi isho Yayiqoopi'in daasha’ oppopa ishin kalsha; ka akka' lehattane ishina' daasha; anti an Yaahiwwe.’” 9Muuse ka samayta Isira'eeliti sede lele; ishootta' xoori' qoota miiddotase xaaysho a karpishshuma qaran xaate xasa muren malla, isha'en dakayne.
10Sekkammaayye Yaahiwwe ka Muuse' kide, 11“Akka samayta Isira'eeli piitaadi kara alle' sooksho'e, aane ka Feri'ooni nuqusa Kipsiti' lele.”
12Muuse xoori iYaahiwwe' kide, “Ana haasa ettaninni in kinnin ka eten Isira'eeleta' haasawanno ikka ana qara in dakayniniiyyi, attan Feri'ooni' haasawada ikka ana qara dakaya?”
13Ma xoori Yaahiwwe akka Muuse isho Arooni aanan ka akka Feri'ooni Nuqusa Kipsi samayta Isira'eeli piita Kipsi kara sooksho'e, samayta Isira'eeli isho Feri'ooni' lelane'e ishootta ajaje.
Meera Muuse isho a Arooni
14Sene mattiyya kaffa a Yayqoopi. Hellaa diira a Roopeeli a qaarta Yayqoopi, Hanooki ka Faalu ka Hesrooni isho Kaarmi. Sene toolla a kafa Roopeeli. 15Hellaa diira a Simooni, Yimu'eeli ka Yaamini ka Ohaati ka Yaakini ka Sohaari isho Ha'ulise a Kene'aanitteeta ishi' xaayte. Sene kan toolla a kafa Simooni. 16Akka meera sanynyeetaayshoti' qara'ew, hellaa diira a Lewi, Kershooni ka qe'ati isho Meraari kidammi. Lewi para dippa ka kunda sessa tappa kallaade. 17Akka meera sanynyeetaaysho' qara'ew, hellaa a Kershooni a diira, Liipini isho Shiimi'i kidammi. 18Hellaa a Qe'ati a diira, Amraami ka Yisihaari ka Keprooni isho Usi'eeli kidammi. Qe'ati para dippa ka kunda sessa' sessa kallaade. 19Hellaa diira a Meraari, Mahiili isho Muushi kidammi. Akka meera sanynyeetaaysho qara'e, sene kaffa Lewi. #dikoota 3:17-20; 26:57-58; otoo a 1ta 6:16-19
20Amra ka Yokepeeti alawta aappaayshoti' heme; isheetta ka Arooni isho Muuse ishi' xaayte. Amraami para dippa ka kunda sessa tappa kallaade. 21Hellaa Yisihaari a diira, Qore ka Nefeki isho Sikiiri kidammi. 22Hellaa Usi'eeli a diira, Misha'eeli ka Elisaafani isho Sitiiri kidammi.
23Arooni ka Eliishepani Enenta Aminataapi alawtase a Ne'asooni heme. Ikka Nataapi ka Appihu ka Ali'asaari isho Itamaari ishi' xaayte. 24Hellaa a Qore a diira, Asiiri ka Eliqaana isho Apiyasaafi kidammi. Sene toolla a kafa Qore. 25Inna Arooni Alaasaari, tuparra Puti'eelippa Enenta takka heme; ikka Finihaasi ishi' xaayte. Sene piisa kan saarra isho toolla a kafa Lewi.
26Seneppaayye, a Yaahiwwe Muuse isho Arooni' kide, “Samayta Isira'eeli isho kaffaasso piita Kipsi kara sooksha.” 27Qoota Isira'eeleta Kipsi kara sookissaati desa a Feri'ooni Nuqusa Kipsi olli haasawade, Muuse isho Arooni.
Ajaja a Waaqa Muuse isho Arooni' daashe
28Kuyyaata oppaayye Yaahiwwe piita Kipsi kara Muuse olli haasawadeeyye, 29I'ishi' kide, “Anti an Yaahiwwe, waan ke' lele piisa Feri'ooni Nuqusa Kipsiti' lele.”
30Muuse' xoori Yaahiwwe'e kide, “Anti an jamareetaay, Feri'ooni atta ana dakaya ettansha?”
Currently Selected:
Mataafa Sooketa 6: MaQu
Highlight
Copy
Compare
Share
Want to have your highlights saved across all your devices? Sign up or sign in
