Mataafa Sooketa 5
5
Akkima Muuse isho Arooni Nuqusa Kipsi turopa aanen
1Sekkammaayye Muuse isho Arooni ka Feri'ooni turopa aanen ka ishi' kidene, “Yaahiwwe Waaqa Isira'eeli ikiini, ‘Samaytiyyo akka koommaytoppopa aano ka xaysonessuma ana ulfeesso'e, diishe.’”
2Feri'ooni ka ishootta' kide, “Hela allu Yaahiwwe ayno? Anka afaadi dakaya ka Isira'eeli diisha? Anti Yaahiwwe an upo; umma Isira'eeli an diisho.”
3Muuse isho Arooni ka ishi' kidene, “Waaqa Iproota i'ino tura akkaade; akkan anta kuyyaata sessa koommaytanxata anno ka Yaahiwwe Waaqinno kalisoota kalinno ino faqqate; a taakati paaqa isho orannaane ino piraay.”
4Nuqusa Kipsi xoori i'ishootta kide, “Muuse isho Arooni, maana'e samayta koda qara qaatinnittan? Ishina nefo kodaayshin qaropa tiitaawa.” 5Ka kideewwe, “Samayta a piisseti qaropa orraayshin akata lekuma koope, ishina ka kodaaysho qara ishootta hattinnittan.”
6Kuyyaasetiiyyiiw Feri'ooni ka Kipseese koda karpaatin ishootta kodacciisnitto isho saarrasene a Isira'eeli ishootta qara tooyna ajaje ka kide, 7“A xatta mina'e akka dooqqeta laaqane'e, ishootta jiteetan an aanan. A Ishootta kamma aanaden ka ollopa pohaden. 8Ma xoori, lekuma dooqqeta a turan laaqnaane qaraayye in qajinnin. Koda ishootta' qaje ikka pora ullupni ka kiini, ‘In anna ka Waaqinno' kalisoota kalinna!’ 9Akka haasa darada pora in dakaynini'i, arepa desa a xatta qaran qapto'e koda qara' koopisha ikka yaalen.”
10Sekammaayye Kipseese koda karpaatin ishootta kodacciisnitto isho saarrasene a Isira'eeli kodampaya qara tooyna ka de'en ka samayta' kidene, “Feri'ooni i'ishina' kiini, ‘Arepadesa jiteeta ishina an daasho. 11Mattaayshina aana ka pora oppa jiteeta akkattaneeyye ishina haadada; Ma xoori, dooqqeta a' laaqnittan shakkayteeta nefo qara in qajto.’” 12Semmalla samaytase ka jiteeta faddatta'e, piita Kipsi piisa kara' pase. 13Orrase koda karpaatin ishootta kodacciisno ka kide, “A xatta jiteeta ishootta' dehannaaneeyye wa kuyyaatoppa' koonaane kelopaxata akka in qajinnini'i, ishootta jarjarinni.” 14Kipseese koda karpaatin ishootta kodacciisnitto a Feri'ooni saarrasene a Isira'eeli akka kodampaya qara tooyane qara' shuume ka ishootta karafini ka kaassanni ka kiini, “Maana'e dooqqese laaqqamitto a xala ka a awwe, a xatta mina'e a immakni akkinin?”
15Saarrasene a Isira'eeli kodampaya qara tooyna ka Feri'ooni turopa dehaaden ka isha' kidene, “Maana'e ino orxayaatti asse payyahinni? 16A jiteeta ino orxayaatti in dehannin mali ino' kiini, ‘Dooqqeta laaqqa ka kamma ino karafini; a ishin dape xoori, orraayti diisheey inon.’”
17Feri'ooni ka ishootta' kide, “Iltakkumampayaay! ishina dukaatanne a iltakkumampaya! Semmallanne a' kiinittane, ‘In anna ka Yaahiwwe' kalisoota kalinna.’ 18Amma kodaayshin qaropa tiitaawa! Ofani jiteeta ishina'en dehayshan. Umma dikoota dooqqeta a laaqnittan qara a' qajissan.” 19Saarra sene a Isira'eeli kodampaya qara tooyna ka ete ishootta' kiinaane, “Dikoota dooqqeta a' laaqnittan qara a' qajissaneeyye,” Akka rakkoota qara' pi'ene upnaaden.
20Saarrasene a Isira'eeli kodampaya qara tooyna ka ete Feri'ooni kapa tiitaaweneeyye, Muuse isho Arooni a eeyye ishootta asannaa'e akken. 21Ka ishootta' kidene, “Akka Feri'ooni isho saarraadi ino xaccisadane'e' kooten ka koraateta qeetten ka harkaadippa' daasseneey, a Yaahiwwe sede ishin qara akko ka ishin qara' farato.”
Muuse akka rakkootaadi Waaqopa lelade
22Muuse ka amma Yaahiwwepa tiitaawe ka ishi' kide, “Oo poqallaayyo! Ata maana malla' samayse qara rakkoota qeette? Ka maana malla ana erkite? 23Akkan maxxaaytin ishi' haasawado'e hakan Feri'ooni turopa aane paayyatteeyye isha neequmta samaytose qara' kode; umma atti pakkanna samayse xaaytin a' pahanne.”
Currently Selected:
Mataafa Sooketa 5: MaQu
Highlight
Copy
Compare
Share
Want to have your highlights saved across all your devices? Sign up or sign in
