Mataafa Sooketa 7
7
1Yaahiwwe ka Muuse' kide, “Tin anti Feri'ooni tura'e, akka Waaqa' mina'en ke kode. Innaassin Arooni ka xuumampaytaayti kodda. 2Waan ke ajaje piisa Arooni' lelta. Innaassin Arooni ka akka samayta Isira'eeli piita Kipsi kara sooksho'e, turaayye Feri'ooni' lela. 3Anti' xoori karitta Feri'oonin kokkonnaysha. Kadan punu piita Kipsi kara milikkitadda isho daxxowwa lekaya kodaayye, #koda 7:36 4Isha ishina'en dakayo; Anka piita kipsi qara' hupniyyo akkisha; ka firteeta a kutta ka qitaateta a kokkokatinni, samaytiyyo hellaasene a Isira'eeli piita Kipsi kara sooksha. 5Oton hupniyyo ishootta qara akkisho ka samaytiyyo hellaasene a Isira'eeli ishootta kara sookshooyye, Kipseeta akkiman anti Yaahiwwe kodde upnaatta.” 6Muuse isho Arooni ka akka Yaahiwwe ishootta ajaje qara' koden. 7A Feri'ooni olli haasawadeneeyye, Muuse paraadi kunda sette, a Arooni kan kunda setteeti' sessa.
Akkima uleeta Arooni maaka koddite
8Yaahiwwe ka Muuse isho Arooni' kide, 9“Oto Feri'ooni ishina' kiino, ‘Wa orra qawwanna' kodeetan isi upnayshaayye’ atti Muuse, Arooni' kide, ‘Uleetaayti qeede ka Feri'ooni tura' kate’ maaka kodditaay.’” 10Muuse isho Arooni ka Feri'ooni turopa aanen ka akka Yaahiwwe ishootta ajaje mina' koden. Arooni ka uleetase' xaadi Feri'ooni isho saarraadi tura' kate; ikka maaka koddite. 11Feri'ooni ka ookka isho tipampaya a Kipsi ollopa hale; so'ayasene a Kipsi ka ookumaaysho a juuttotatinni, asseew kodeneew. 12Ka matta mina ulewwaasso a qapane piitopa dakken ikka maaka kodden; ma xoori, uleeta Arooni ulewwaasso piisa loqte. 13A kodditoma karitta Feri'ooni ammikki'i ikokkonnaade, umma akka Yaahiwwe kide mina'e ishootta in dakayne.
Erkannawwasene kudani a piita Kipsi qara' kodde
A paayyota: akka pisha diikopa pursamen
14Sekkammaayye Yaahiwwe ka Muuse' kide, “Karitta Feri'ooni ikokkonnaade, umma samayse diissata in heeno. 15Waaqa ka Muuse' kide, ‘Paraappan xa'e ka Feri'ooni kapopa aane ka oto isha pisha kapopa keenooyye, atti kirra Appaayi kapa asado ka uleetase maaka koddite harkoppa' qapado.’ 16Ka ishi' kide, ‘Yaahiwwe Waaqa Ipuroota'e ke kapopa ana erke ka kide, samaytiyyo akka aano ka koommaytoppa ana waaqaysado'e, ishootta diishe; tin atti' xoori haka ammati a ajajamme.’ 17Yaahiwwe ikiini, ‘Anti akkan Yaahiwwe kodde, sedenne upnaatta. Tin pishoosen a kirra Appaayi uleese an harkoppa qaponnen daysha; ikka pursaman ka diika koddan. #kele 16:4 18Murkuja a kirroose a Appaayi kara co ka le'a, kirroose a Appaayi ka xaccada; umma Kipseeta pishosen a kirrooseti ika in ettanisso.’”
19Yaahiwwe ka Muuse' kide, “Arooni' kide, ‘Uleetaayti teyyado ka pishadda piita Kipsi a kirrada ka a kabba ka a hartadaasso isho pishadda qaqqa'ade piisa qaropa harkaayti qapado; piita Kipsi karaayye pisha meeha a dakaappa koden isho a qoraappa xefene kara ca piisa diika koddaay. #Luqa 11:20
20Muuse isho Arooni ka akka Yaahiwwe ishootta ajaje qara' koden, Arooni ka fuula Feri'ooni isho a saarraadi tura'e, uleetase' xaadi qeede ka pisha kirra Appaayi kara ca' dayshe. Pisha kirra Appaayi kara ca piisa ka diikopa pursamen. 21Murkuja kirra Appaayi kara co piisa ka le'e. Qoota pisha kirra Appaayi xaccannaan malla, Kipseeta ka pishasene ika malaalte. Piita Kipsi kara diika ka pora piisa oppa caade. 22So'ayasene a Kipsi ka ookumaaysho a juuttotatin assew kodeneew. Karitta Feri'ooni ka kokkonnaade. Akka Yaahiwwe' haasawade qara'e, Muuse isho Arooni'in dakaynin. 23Ka tiitaawe ka tikaadi a mankisteeta opa kale; umma wossen kodde we kapa'en dikne. 24Kipseeta piisa qoota pisha kirra Appaayi ikkeeta malaalte malla, kirra Appaayi kapandesa qaawwa pisha' qotatte.
25A Yaahiwwe kirra Appaayi dayshe kammaayye, kuyyaata tappa ka tarpite.
Currently Selected:
Mataafa Sooketa 7: MaQu
Highlight
Copy
Compare
Share
Want to have your highlights saved across all your devices? Sign up or sign in
