Mataafa Sooketa 40
40
Akkima tukkanase a Waaqa daapame koda ka kela paayyade
1Yaahiwwe ka Muuse kide, 2“Leya paayyota oppaayye kuyyaata a paayyotatiiyyi tukkanase xayyo an kara ana isho samayta oli akkino daape. 3Ka kara'e taapotase a maakkuma xaaye ka kaarantan taapotase tura deke. 4Ka tukkanase kelopa tarabbeesa kullishe ka meehaadi qara xaxxaaye ka meehase qara ipsa opannaan kullishe ka qara ipsa xaxxaaye. 5Ka meehase a kalisoota a warqeeta a qara tankarta qayyannaan qeede ka taapotase a maakkumati fuule desa xaaye ka tukkanase a Waaqa kara kallaanno qulqullaawe turopa kaaranta oorshe. 6Ka porase qara kalisoota kupnaan, xarra tukkanase a Waaqa tura xaaye. 7Ka saahina oppa pisha jaqannaan arta tukkanase a Waaqa isho pora kalisoota kara xaaye ka kara pisha piishe. 8Ka paapahase kapandesa qora oxinta dishe ka xarraadi tura kaaranta rakke.
9“Ka sayteese qulqullaawte qeede ka tukkanase a Waaqa isho mehadda a kara ca piisan daate ka xawwi Waaqa reexe; a qulqullaawe'e koddaneey. 10Ka porase a kalisoota kupannitto isho meehaadi piisa daateew ka porose a kalisoota xawwi Waaqa reexxe, harmmo'e qulqullaawaay. 11Ka saahinase kara pisha jaqannan isho meeha a kara isha xaaynaan daateew ka qulqullayshe.
12“Arooni isho hellaadi a diira xarra tukkanase a Waaqa turopa ishootta qeede ka pishaan ishootta jaqe. 13Ka Arooni quda mehaddasene qulqullaawe kalshe ka akka qeesitta koddo ka ana koda kodo'e isha daate ka xawwi reexxe. 14Ka hellaadi a diira qeede ka quda xootewwa kalshe. 15Ka akka qeesewwa koddan ka ana koda kodane'e akkimase a aappaaysho daatite mina ishootta daateew; daatamayshotinni xeltada a itturopa deena piisa kara'e akka qeesewwa koddane'e ishootta kootaay.”
16Muuse ka akkimase a Yaahiwwe isha ajaje qara'e we piisa kode. 17Para lammatta oppa leya a paayyotatiiyyi kuyyaata paayyota oppa tukkanase qulqullaawe ka daapame. 18Muuse ka tukkanase daape ka kela kiriyya kate ka qara qapaya qa'e ka tarkowwa dakke ka tuudda qa'e. 19Ka akka Yaahiwwe isha ajaje qara'e qorasene qara'e tukkana uwwishe ka tukkanase qara'e qeppa uwwisheew. 20Ka dakaddasene qaqqaaha a maakkuma qeede ka taapota kara xaaye ka molookaddasene taapota quda qaqqapsiise ka dufana dissata qeede ka taapotase qara xaaye. 21Ka akka Yaahiwwe isha ajaje qara'e taapotase tukkana Waaqa kelopa qeede ka tura'e kaaranta rake ka taapotase a maakkuma tura deke.
22Ka tukkanase a Waaqa kelopa tarabbeesa kullisheew ka tarabbeesase qinda qutattatin laka tulan xaaye. 23Ka akka Yaahiwwe isha ajaje mina'e tarabbeesase qara'e laaqqotase qulqullaawte fuula Yaahiwwe tura qune. 24Ka tukkanase a Waaqa kelopa meeha ipsa qara xaynaane kullisheew ka tarabbeesa mina desa qinda tupattatin xaaye. 25Ka akka Yaahiwwe isha ajaje qara'e fuula Yaahiwwe tura'e ipsaasene qara apitta qapsiise. #sooka 30:11-16 26Muuse ka porase a kalisoota a warqeetoppa kodame tukkanase a Waaqa kelopa kullishe ka kaaranta mina desa xaaye. #Maati 17:24 27Ka akka Yaahiwwe isha ajaje qara'e tankarta alaawnitto qara qayyayshe. 28Ka xarrase a tukkana Waaqa tura'e kaaranta ra'ishe. 29Ka xarrase a tukkana Waaqa a oppa Waaqa isho samayata oli akkino tura'e porase a kalisoota a qara kalisoota a kupannitto dehannitto xaaye ka akka Yaahiwwe isha ajaje qara'e kalisoota a kupannitto isho a unta kalshe. 30Ka otanta tukkanase a Waaqa isho porase a kalisoota kara'e, saahinase oppa pisha jaqannaan xaaye ka oppa'e pisha a jaqatta piishe. 31Muuse ka Arooni isho hella Arooni a diira ka oppa'e harkaasso ka loqqaasso jaqanni. 32Ishootta ka akka Yaahiwwe Muuse ajaje qara, oto tukkana a Waaqa kelopa kullinaaneeyye isho porase a kalisoota kapopa dehannaaneeyye oppa jaqanni. 33Muuse ka tukkanase a Waaqa isho porase a kalisoota kapandesa oxinta qorre ka xarra paapaha oppa'e kaaranta hidde. Pora asse pahonne, Muusi ka kodase dikkishe.
Ulfeena Yaahiwwe
dikoota 9:15-23
34Sekkammaayye urratta ka tukkanase a Waaqa qara uwwishe; ulfeena Yaahiwwe ka tukkanase kela immake. #nuqu a 1ta 8:10-11; Issa 6:4; His 43:4-5; kele 15:8 35Qoota urratta tukkanase a Waaqa qara lekkade, ulfeena Yaahiwwe ka tukkanase kela immake malla, Muuse ka tukkanase kelopa kulla malaale. 36Eta Isira'eeleta anta qara kitto piisa kara'e, oton urratta tukkana qara xa'ayye, patta xaani ka anni. 37Ma xoori oton urratta tukkanase qara in xaaniiniiyyi, haka xa'o mali ishootta anta xaani in caan. 38Eta Isira'eeleta anta qara kitto pisaayye fuula samayta Isira'eeli piisa tura, kuyyaateeyye tukkanase qaraayye urratta a Yaahiwwe ka kinnaanni; halkeetteeyyeew apitta ka urrattoppa kinnaanni.
Currently Selected:
Mataafa Sooketa 40: MaQu
Highlight
Copy
Compare
Share
Want to have your highlights saved across all your devices? Sign up or sign in
