Mataafa Sooketa 39
39
Akka mehadda a qeesewwa kalsannaane koonaan
sooka 28:1-14
1Akka Yaahiwwe Muuse ajaje qara'e koda porose qulqullaawe'e, ikka rufta a moonta pahato ka a awla ka a tiima oppaayye ohawwa sirene dawen ka mehaddasene qulqullaawe a kalsada kuli Arooni daweneew.
2Ka xaynaata a warqeeta ka rufta a moonta pahato ka a awla ka a tiima isho xaynaata paxaara a qora talpa oppa shippamte oppaayye efuudi dawen. 3Ka warqeeta tumen ka qahanayshen ka akka xaynaata mina harmishen ka rufta a moonta pahato ka a awla ka a tiima isho xaynaata paxaara a qora talpa oppa shippamteppa harmuman oppa xaynaata jejeehen. 4Ka efuudese quda'e rakkuma lakki a xashshiyya qara kalla koden ka akka qannito'e qindaddaan quda qaqqapsiisen. 5Akka Yaahiwwe Muuse ajaje qara'e kurteetase efuudin hiddannan efuudi ollin pora takka'e rufta a moonta pahato ka a awla ka a tiima isho xaynaata paxaara a qora talpa oppa shippamte oppaayye harmuman dawamte. 6Ka dakaddasene heraan kokkoka merkidi kidamma harmishen ka jifewwa warqeeta qara kukkutiishen ka qara maxxadasene a hellaa Yayqoopi kudanka lakki akka kobbeeta mina qara pojen. 7Ka akka Waaqa Muuse ajaje qara'e, akka hella Isira'eeli matte ishin oorsatamane'e, rakkumayasene a efuudi qudanxata dakaddasene jajaqqalshe.
Akka akala kessoppa kodame
sooka 28:15-30
8Ka akalase a kessoppa, akkima efuudi dawamte mina'ew xaynaata warqeeta ka rufta a moonta pahato ka a awla ka a tiima ka xaynaata paxaara a qora talpa oppa shippamte oppaayye harmuman daweneew. 9Akalose a kessoppa nefo olqarandesa qeppe ka qindadda afuri qapa; derumaadi paakkota takka ka paldumaadi paakkota takka. 10Ka akalase quda'e dakadda a heraan kokokkoka jirfa afuri olkamma qunen; jirfa a paayyota mina'e dakadda a heraan kokokkoka serdiyooni ka tobbasiyooni isho daka oyno quname 11Jirfa lammatta mina'ew peluuri ka senpeeri isho almaasi quname; 12Jirfa sessatta mina'ew yaakinti ka kelqedooni isho ametestinoosi quname; 13Jirfa afratta mina'ew pireele ka merkidi isho iyyaspiidi quname; sene piisa xoorrawwa a warqeeta qara'ew kukkuti'en. 14Dakaddosen heraan kokokkoka kudanka lakki akka ishin matte oorsatamane'e, maxxada a hella Isira'eeli kudanka lakki mina'e opanka a kobbeeta mina'e ishootta qara'e maxxada a hellaa Isira'eeli takka takka pojen. 15Ka akalose a kessoppati'i warqeeta a paxaara oppa teepa a xaynaata mina soohame koden. 16Ka warqeeta a paxaara oppa qaqqapsiisampaya lakki isho xoorrawwa lakki koden ka akalase a kessatiiyyi qindadda lakkiiyyi qeppeelliyya qara xata kakkalshen. 17Ka teepasene a warqeeta a xaynaata mina soohame lakki, xoorrawwasene kara kakkalshen. 18Ka kuutadda teepasene lakki isho siraasene a warqeeta lakki ollin qaqqapsiisen; ka rakkumayasene a efuudi kessoppa xata lekkanna quda kakkalshen. 19Ikka xoorrawwa a warqeeta lakki kodeneew ka akalase a kessoppatiiyyi paka efuudi quda, paka lakki karanne quda ollin qaqqapsiise. 20Ka warqeetoppa xoorrawwa lakki kodeneew ka kurteeta a efuudi harmuman dawame qareela teepasene a efuudi kesseeyye xata deena mina kakkalshen. 21Ka akka Yaahiwwe Muuse ajaje qara'e akka akalase a kessoppa efuudi qara jaqqalo ka qara in poqqinini'i, rufta a moonta pahatonne xoorrawwa akala kessoppa isho xoorrawwa a efuudi olqudopa hiden.
Mehadda pila a qeesewwa kalsannaane
sooka 28:31-43
22Paasili'eli ka qamiseeta a efuudi rufta a moonta pahato pattoppa dawe. 23Ka poraadi a matta kalsatta akka a qamiseeta mina ishi kode ka akkima in kaamannini'i, qeppishen ka kapandesa kaamare. 24Ka kammandesa rufta moonta pahato ka a tiimuma heente ka a tiima ka xaynaata paxaara a qora talpa oppa shippamtenne, pahana dalta roomaani kamma sire. 25Ka warqeeta paxaara oppaayye tawnanna shashakkaya kode ka arta pahana dalta roomaani kara rarakke. 26Ka akka Yaahiwwe Muuse ajaje qara'e akka qeesewwa ishin koda kodane'e, qamiseese kammandesa tawnannasene kodame isho pahana dalta roomaani olkaranne pujamen.
27Ka Arooni isho hellaadi a diiraati'i xaynaata paxaara a qora talpa oppa shippamteppaayye xootewwa, 28Ka parrowwa ka kullewwa ka konfada dawen. 29Ka akka Yaahiwwe Muuse ajaje qara'e kurtetaad rufta a moonta pahato ka a awla ka a tiima isho xaynaata paxaara a qora talpa oppa shippamte oppaayye harmitta ka oppa sira puje ka dawe. 30Ka warqeeta paxaara oppa sira takkan koden ka qara pojen ka kidene, “A Yaahiwwe xawwa reexxamte.” 31Ka akka Yaahiwwe Muuse ajaje qara'e rufta moonta pahatonne parroota quda fuula tura hidden.
Akkima kodase dikkishen
sooka 35:10-19
32Qupeeta a tukkanase qulqullaawe a karaa Waaqa isho samayta oli akko ka dikkatte; samayta Isira'eeli ka akka Yaahiwwe Muuse ajaje qara'e kodase piisa kode. 33Ka tukkanase isho mehaddoosen a tukkanaseti a are kammopa xata dikame piisa Muuse kapopa haaden; ishootta nefo, rakkumampaya xoorrawwa ka tuudda tukkana ka tarkowwaadi ka tuudda ka kiriyyasso, 34Ka kollaya a laahadda a qalameeta tittimaatin daatene a tukkaneeyye laka tulan deknaane isho koka a tela a pahasame ka kaaranta turan deknaan, 35Ka taapotase a maakkitta ka molookaddaadi isho dufanaadi a diissata, 36ka tarabbeesa ka meehaadi piisa ka laaqqota qulqullaawte a Waaqa dehannaan, 37Ka meeha qara ipsa xaaynaan a warqeeta paxaara oppa kodene ka ipsaadi a olikamma quname isho meehaadi piisa ka sayteeta ipsaa 38ka porase a kalisoota warqeetoppa kodame ka sayteetase qulqullaawte a daatinan ka tankartase alaawnitto ka kaarantase a xarra tukkana, 39ka porase a kalisoota a sipla pooroppa kodame ka kinkilshaadi a sipla poora ka molookaddaadi isho meehaadi piisa ka saahinase kara pisha jaqannan ka meehaadi a kara xaaynaan 40ka kaarantaddasene a paapaha ka tuuddaasso ka kirriyaasso ka kaaranta kullaysuma xarra paapaha, ka shikaalla a tukkana isho a paapaha ka watarowwaasso ka meeha tukkanase qulqullaawe a Waaqa kara kallaanno isho a samayta oli akkinooti piisa, 41Isho mehaddasene a qeesewwa qanqannissa dawame a pora qulqullaawe kara ishin koda koonaane; sene nefo mehaddasene a Arooni qeesitta kalsanna ka a hellaadi a diira oto koda qeesuma koonaane kalsannaane. 42Samayta Isira'eeli ka akka Yaahiwwe Muuse ajaje qara'e kodase piisa kode. 43Muuse ka kodase kodame piisa tooye ka akka Yaahiwwe ajaje qara akka kodde akke; Muuse ka ishootta sake.
Currently Selected:
Mataafa Sooketa 39: MaQu
Highlight
Copy
Compare
Share
Want to have your highlights saved across all your devices? Sign up or sign in
