Mataafa Sooketa 4
4
Milikkitadda daxxowwa a Waaqa Muuse' daashe
1Muuse ka ishi' oorshe ka kide, “Oto Isira'eeleta afaayyo dakayni in kinnin ka amanni in kinnin ka ana' kiinitto, ‘Yaahiwwe ke tura'en akkaanneeyye’ honno?”
2Yaahiwwe ka ishi' kide, “Maana' harkoppa qapta?”
isha ka kide, “Uleetan qapa.”
3Yaahiwwe ka ishi' kide, “Piitaxxata kate!” Muuse ka uleetase piitaxxata kate, ikka maaka koddite; Muuse ka alle tura qahe. 4Yaahiwwe ka Muuse' kide, “Harkaayti derayshe ka tupa ekta qape!” Ikka harkaadi derayshe ka tupa ekta qape; ikka harkaadippa uleeta kodditeew. 5Yaahiwwe ka ishi' kide, “Sede tooy akkiman anti Yaahiwwe Waaqa aappadaassoti Waaqa Aprihaami ka Waaqa Hisaaqi isho Waaqa Yayiqoopi ke tura akkaade amanan malla.”
6Yaahiwwe ka ishi' kideewwe, “Harkaayti dunitta kela qapado.” Muuse ka harkaadi dunittaadi kela' qapade. Ete xata sooksheeyye, ikka qooshoode ka a fuuttota mina attaade. 7Waaqa ka kideewwe, “Harkaayti dunitta kelopa oorsheew!” Muuse ka harkase' xaadi dunitta kelopa oorsheew; ete xaate sooksheeyye, ikka dine ka harkaadi a deyyo' pahanaade. 8Yaahiwwe ka ishi' kide, “Oto milikkita a paayyota amanni in kinniniiyyi, a lammatta i'amanan. 9Oton milikkitaddosen lakki amanni in kinnini ka wa' kiinitta teyyanni in kinniniiyyi, kirra Appaayi oppa pisha shakkaya muudde ka piita kokte oppa' tuqe; pishasene a kirra Appaayi oppa muuddite ka piita kokte oppa' tuqte, diika koddaneey.”
10Muuse ka Yaahiwwe' kide, “Oo poqallaayyo! Ha anti xatta ka amma nefo a ana olli haasawwatta paayyite, kammaayye an jamareeta; umma haasa an ettaninni an co.”
11Yaahiwwe ka Muuse' kide, “Ata, a nama' afaa kode ayno? Ayno ka nama tuuta' kooni, taaki dakkayta' kooni? Ayno ka akka nama paata akko' kooni taaki qara ilda patinni? Ana Yaahiwwenne? 12Semmalla amma aane! Ana akka' haasawatto' kodaay ka wa' haasawatta kuli anti ke' lelaay.”
13Muuse' xoori ikide, “Oo poqallaayyo! Nama pila erke.”
14Sitiiyyi Yaahiwwe ka a kuttati Muuse qara' miirode ka kide, “Innaassin Arooni Lewittase are caay? Isha akkima fayya' haasawatta ettansaho in upa; laadi tin amma ke kapopa deeni; oto ke akkooyye akata xasooda. 15Atti isha'e' haasawatta; ka wa a haasawada ishi' la'assa; anti ka akka' haasawattane'e ishin piisa qaarqaara ka wa' kootane ishin kollisha. 16Atti afaayyo a Waaqa'e' koddita ka Arooni' haasawatta. Isha ka afaatti kodda ka pakkaaytippa'e, samayta' haasawada. 17Uleese a milikkitaddasenetin ishootta tura akkisso harkoppa' qapado.”
Akkima Muuse Kipsipa tiitaawe
18Muuse ka sottohase' xaadi Yotoori kapopa tiitaawe ka ishi' kide, “Akkan hellaasene xanno Kipsi kara ca kapopa tiitaawo ka wa oppa caane' kaassado'e ana' faqqate.” Yotoori ka ishi' kide, “Nakaytan aane.”
19Muuse a piita Midiyaami kara cooyye, Yaahiwwe i'ishi' kide, “Orrase ke ikassa faano piisa ile'eey, Kipsipa tiitaawe.” 20Semmalla Muuse ka iskatteetaadi isho hellaadi a diira harreeta qara kukkutiishe ka piita Kipsi opa kalta' xa'e ka uleetase a Waaqa harkoppa' qapa.
21Yaahiwwe ka Muuse' kideewwe, “Oto' Kipsipa tiitawtooyye, wessen orra qawwanna an harkaaytippa' xaaye Feri'ooni tura' koda in teyman. Ma xoori anti akka isha samayse in sookinnini in karittaadi kokkonnaysha.” 22Semmalla Feri'ooni' kide, “Yaahiwwe ikiini, ‘Isira'eeli innaayyo a kuuta. 23Anka ke kide, akka sookan ka ana waaqaysadane'e innaayyo diishe. Atti xoori ittiitteey; semmalla anti innaatti a kuuta'en ishsha.’” #sooka 12:29
24Ete Muuse Kipsipa kallooyye, pora a oppa muke oppaayye, Yaahiwwe isha akke ka ikassa fade. 25Iskatteetaadi Sipoora ka paltitta qarta qapo qeette ka solbatta sooyya innaadi murte ka loqta Muuse qudan kayte ka kiite, “Atti diikoosetinni a' hemampaytiyyo!” 26Yaahiwwe ka alle isha diishe; isheetta ka solbatta sooyya innaadi mureeta minanne ishi' kiite, “Atti diikoosetinni a' hemampaytiyyo.”
27Yaahiwwe ka Arooni' kide, “Muuse turopa koommaytoppopa aane!” Ikka aane ka irroota Waaqa qara isha teye ka dinke. 28Muuse ka afaasene a Yaahiwwe ishin erke ka milikkitaddasene akka kodo isha ajaje piisa Arooni' lele. 29Muuse isho Arooni ka aanen ka qimayasene a samayta Isira'eeli piisa ollopa halen. 30Arooni ka afaasene a Yaahiwwe turan Muuse' haasawade piisa ishootta' lele; ka milikkitaddasene kuli ishootta tura' kode. 31Ishootta ka dukaysaden ka akkima Yaahiwwe ishootta tooyyade ka miiddamaaysho akke dakayeneeyye, ikilpiippaden ka ishi' sakatattaan waaqaysaden.
Currently Selected:
Mataafa Sooketa 4: MaQu
Highlight
Copy
Compare
Share
Want to have your highlights saved across all your devices? Sign up or sign in
