Mataafa Sooketa 31
31
Paasili'eli isho oholi'api
sooka 35:30—36:1
1Yaahiwwe ka Muuse kide, 2“Tin anti kafa Yihuta oppaayye oopaase a Huuri innasene a Uuri Paasili'eelin reexade. 3Koda harmuma ika lekayta'e akka ettanissa ka ookuma isho upna qapnaado'e hapuriyyon isha immake. 4Isha sira warqeeta ka dakara pirreeta isho sipla a poora oppa kodammaati'i akeeka sooksha. 5Akka koda harmuma ika lekayta kodamo'e dakadda sira xefa ka qora laaja. 6Ka tin kafa Taanippaayye inna a Hisamaaki Oholi'api isha quda reexeew. Ka ishootta akka waan ke ajaje piisa kodane'e, harmuma piisa'e ookuma ishi daashe. 7Ikka tukkanase xayyo ka taapotase a maakkuma ka dufanasene a diissata isheetta qara co ka mehadda a tukkaniyyo piisa 8ka tarabbeesa isho meehaadi ka porase qara ipsa xaaynaan warqeetoppa kodame ka meehaadi piisa ka meehase a kalisoota a tankarta; 9ka porase qara kalisoota kupannitto kalinnaan ka meehaadi piisa ka saahinase kara pisha jaqannaan ka meeha a kara isha xaaynaan, 10Ka mehaddasene qanqannissa dawene ka quda sirene isaasene qulqullaawe a qeesittase Arooni kalsanna ka a hellaadi a diira a qeesewwa kodde oto koda koonaaneeyye kalsadane 11ka sayteetase a daateta isho porase qulqullaawe'e tankarta alaawnito kodan. Sene piisa ishootta akkan ke ajaje qara koda.”
Kuyyaata nessuma a Waaqa
12Yaahiwwe ka Muuse kide, 13“Isira'eeleta lele ka kide, ‘Kuyyaata a nessumaayyo ulfeessa, xeltadaassin a itturopa deena piisa kara'e sede ana isho ishin arta kara'e milikkita koddita. Sede nefo akkan anti Yaahiwwe ishin qulqullanno upnaattan malla.’ 14Kuyyaase a nessuma qoota ishina a qulqullaawte koddite malla ulfeessa; nama qulqullumaadi ulfeessini in kinnin a alle ishshamo. Nama kuyyaase oppa koda kodanno piisa samayta Isira'eeli oppa alle pashsha. 15Kuyyaata lehi kara'e koda kodattan; kuyyaata a tappatta xoori Yaahiwwe'e kuyyaata qulqullaawte a nessuma'ey, nama oppaayye koda kodanno a alle ishshamo. #sooka 20:8-11; 23:12; 34:21; 35:2; Lewi 23:3; ooreta 5:12-14 16Semmalla samayta Isira'eeli xeltadaasso a itturopa deena piisa karaayye kuyyaase a nessuma Waaqa ulfeessa, a kodyteeta paraparati kodaden ka tooyten. 17Anti Yaahiwwe qootan kuyyaata lehi kara piita ka moonta uume ka kuyyaata tappattatiiyyi koda qaatishe ka nessade malla; sede ana isho samayta Isira'eeli arta kara'e milikkita a parapara'e koddita.” #sooka 20:11
18Yaahiwwe ete irrootase a Siina qara Muuse haasawatta dikkishe kammaayye, dakaddasene qaqqaaha lakki a maakkuma isasene a qara qupittaadin taafe'e ishi daashe.
Currently Selected:
Mataafa Sooketa 31: MaQu
Highlight
Copy
Compare
Share
Want to have your highlights saved across all your devices? Sign up or sign in
