Mataafa Sooketa 30
30
Meeha a qara tankarta qayyannaan
sooka 37:25-28
1“Jeela kolalta oppaayye meeha a qara tankarta qayyannaan kode. 2Derumaadi isho paldumaadi dikla takka takka a qindaddaadi afuri piisa olimina caan; derumaadi a moontandela a dikla lakki kodden. Meehose qara tankarta qayyannaan isho kaassaadi a qoyra takkoppaaw kodamen. 3Ka qarandesa ka qindaddaadi piisa qudandesa ka kaassaadi piisa warqeeta paxaaratin uwwishe ka kamaarra qudandesa warqeeta ishi kode. 4Ka kamaarrosen a warqeeta kelaxata qinda qindanne xoorrowwa a warqeeta lakki a molooka karandesa kulla opanka ishin haadane kodeew. 5Ka jeela kolalta oppaayye molookadda kode ka warqeetan quda uwwishe. 6Ka meehose a kalisoota tankarta qeede ka kaarantase taapotase a maakkitta tura cooyye laka tulan xaaye, anti ka dufanasene a diissata taapotase a maakkitta qaraayye co qaradesa ke akkaado. 7Teykanta piisaayye oto Arooni ipsa harmissa deenooyye, a meehose a kalisoota qara tankarta alaawnitto qayyaysho. 8Ka oto kalaakaayye ipsa opannooyyeew, a asseew tankartase qayyayshoow; sede ka a olkamma in mittammin mali fuula Yaahiwwe tura xeltada itturopa deena piisa kara koddito. 9Umma meehose qara'e tankarta pila a qayyasso, umma kalisoota a kupannitto a pila a kalisso, umma qara'e kalisoota unta a kalisso, umma qara'e kalisoota taadeta wayneeta a tuqto. 10Arooni paroppa takkane diika xormase haseenta juppootati qalammo qeeda ka kaassasene a meeha kalisoota a tankarta qara'e haseenta juppootati koda; sede ka xeltada itturopa deena piisa kara dikkatta; saantosetinni meehoose a kalisoota tankarta Yaahiwwe'e a akata qulqullaawe kodda.”
Kipira tukkana Waaqa
11Yaahiwwe ka Muuse kide, 12“Oto samayta Isira'eeli diknittooyye, akka erkannaata ishootta qara'en kaynini'i, nama oto dikammooyye a matta mina kaaja a issin furada Yaahiwwe daasho. 13Nama samayse dikammo oppopa qeedammo piisa hiilase a tukkana Waaqatinni a dakara pirreeta takka daasho; nama piisa ka sede kalisoota Yaahiwwe kodo ka kalsho. #sooka 38:25-26; Maati 17:24 14Nama samayse dikammo oppopa tarpino aparaadi kunda lakki kaye ka qaropeela co piisa a ana Yaahiwwe kalisoose kalsho. 15Oto diissata juppootaayshina malla Yaahiwwe'e kalisoose kalinnittaneeyye, teyantoolayta dakarose a pirreeta qaropeela in daannin umma teekolayta kelopa xata in daannin. 16Ka samayse a Isira'eeli qaraayye kaajosen a haseenta juppoota pohe ka koda tukkaniyyooti xawwi kite; kaajosen nefo kaaja a issin furannaane'e koddan; anka ishootta tooyta'e fuuliyyo a Yaahiwwe tura ishin matte ishootta oorsada.”
Saahina a silpa poora a oppa pisha jaqannaan
17Yaahiwwe ka Muuse kide, 18“Saahina a oppa pisha jaqannaan isho meeha a saahinoose qara xaayammo, sipla poroppaayye kode ka otanta tukkaniyyo isho a pora kalisoota kara xaaye ka kara pisha kishshe. #sooka 38:8 19Arooni isho hellaadi a diira ka kara harkaasso isho loqqaasso jaqaden. 20Wa malla asse kodane oto tukkanase xayyo kelopa kullinaaneeyye, taaki oto ana Yaahiwwe kalisoota a kupannitto kalissa'e poroose a kalisoota kapopa dehaannaaneeyye, akka in leenini malla. 21Akka in leenini'i a harkaasso ka loqqaasso jaqaden. Sede ka xeltada itturopa deena piisa kara'e Arooni isho sanynyeetaadi'i taanteta parapara koddito.”
Sayteeta daatannaan
22Kammaddesa Yaahiwwe ka Muuse kide, 23“Qimaamewwasene akata alaawna, karpeeta a pisha pahato kiilota lehi ka qerefa a akata alaawno kiilota sessa ka aykitta akata alaawno kiilota sessa, 24ka qimaamese akata alaawnitto ka pirkuuti kidammitto kiilota lehi qeede ka sene piisa akka hiila tukkanase xayyo qulqullaawe qara ekkayshe; ka oppa'e sayteeta nitiroota afuri tuqe. 25Ka akka harmitta qimaameta ollin laahano mina'e ollin lahe ka sayteeta a qulqullaawte a daatinaane kode, ikka sayteeta qulqullaawte koddito. 26Ka ishin tukkanase xayyo ka taapotase a maakkitta. 27ka tarabbeesa ka mehaddaadi piisa ka porase qara ipsa xaaynaan isho meehaadi piisa, ka meehase a kalisoota a qara tankarta qayyannaan, 28ka porose a kalisoota a qara kalisoota kupannitto kalinnaan ka meehaadi piisa ka saahinase kara pisha jaqannaan ka meeha a qara isha xaaynaan piisan daate. 29Ka akka a kuttaati qulqullaawane xawwi ishootta reexxe; nama taaki wa mehaddoosen quda kayna piisa ka qulqullaawan. 30Ka akka qeesewwa koddan ka ana koda kodane'e, Arooni isho hellaadi a diira xawwi reexxe ka ishootta daate ka qulqullayshe. 31Ka hellaa Isira'eeliti lele ka kide, ‘Xeltadaassin a itturopa deena piisa kara'e sede sayteetiyyo a qulqullaawte a daateta'e koddita. 32Sede sayteeta a qulqullaawteey, tupadesa nama heente qara in tuqan, umma sayteeta a isheetta pahato a pila in kodan. Ishina kuli akka qulqullaawte upnaada. 33Nama a sayteeta isheetta pahato kodo ka qeesitta mali tupadesa nama pila qara tuqo piisa a samayta Isira'eeli oppa alle seeramo.’”
Akkima tankarta alaawnitto koonaan
34Yaahiwwe ka Muuse kide, “Qimaamewwa alaawna hiila takkan kure ka diika a qoyra a tajtajno ka oli qapanno ka shittoota elela kara akkaannitto ka diika qoyra alaawnoti isho tankarta alaawno qeede ka 35akka harmitta qimaameta ollin laahano mina'e tankarta alaawnitto kode, ikka tankarta a sookittan lahen a qulqullaawte ka paxaara koddito. 36Ka qudaayye shakkayteeta qeede ka tole ka nukkullayshe ka tukkanase xayyo kelaayye taapotese a maakkitta an qaradesa ke akkino tura xaaye; tankartose ke'e a akata qulqullaawte koddita. 37Umma issi'i tankarta asse pahato a pila in kodadan; tankartose akkima Yaahiwwe'e a qulqullaawte koddito atti nefo upnaado. 38Nama a alumaadin xasootta malla a asse pahto issi koono piisa a samayta Isira'eeli oppa alle seeramo.” #sooka 37:29
Currently Selected:
Mataafa Sooketa 30: MaQu
Highlight
Copy
Compare
Share
Want to have your highlights saved across all your devices? Sign up or sign in
