Mataafa Sooketa 28
28
Mehadda a qeesewwa kalsadane
sooka 39:1-7
1“Akka qeesewwa koddan ka ana koda kodane'e, samayta Isira'eeli oppaayye innaassin Arooni isho hellaadi a diira Nataapi ka Appihu ka Alasaari isho Itamaari xawwi ana reexe ka isikapopa qeede. 2Ka innaassin Arooni quda siraa'e ka isha ulfeessa'e, mehadda a qeesuma a kalsada ishi kode. 3Arooni akka koda qeesumati ana xawwi reexxammo ka ana koda kodo'e, akka Arooni mehadda qeesuma a kalsada kodane'e, atti orran ishootta upna a harmuma daashe'e ikka ookuma harmuma qapane lele. 4Mehadda a ishi kodane nefo, akala kessoppa ka oyleeta qeesewwa ka qamiseeta ka xooteta a oppa sira pujen ka parroota isho saappata ka akka qeesewwa koddan ka ana koda kodane'e, Arooni innaassin isho hellaadi a diiraati'i, mehaddoosen qulqullaawe koda. 5Harmootose a rufta warqeeta pahato ka moonta pahato ka a awla ka a tiima isho xaynaata a qora talpa oppa shippinen olloppa dawamto.
6“Ka rufta a warqeeta pahato ka a moonta pahato ka a awla ka a tiima isho xaynaata paxaara a qora talpa oppa shippamte oppaayye efuudi dawen. 7Ka qindaddaadi lakkinni teeppa a ishin xashshiyya quda hiddamta qapnaatto. 8Kurteetase a rufta warqeeta pahato ka a moonta pahato ka a awla ka a tiima isho xaynaata paxaara a qora talpa oppa shippamteppa dawamte ka pujamte akka efuudi ishin hiddamto'e a pora takka quda dawamto. 9Ka dakase heraan kokkoka merkidi kidammo lakki qeede ka qara'e, maxxadasene a hellaa Yayqoopi poje. 10Ka akka olikamma daladen qara'e, maxxadaasso lehi daka paayyota qara poje ka a ata hase daka a lammatta qara poje. 11Akka harmitta kobbeeta pojno mina'e atti asseew dakose lakki qara'e, maxxada a hellaa Yayqoopi poje ka fitallosen a pojte qara warqeeta tuqe ikka kareela akkaatto. 12Ka teepasene a efuudi ishin xashshiyya quda hiddammitta quda'e, dakaddosen lakki kalshe; ikka dakaddaasene a ishin Isira'eeleta matte oorsatammitta kodden ka akka dakadda matte oorsatama ishina koddane'e Arooni ka fuula Yaahiwwe tura'e, dakaddosen xashshiyyaadi lakki qara haadado. 13Ka xoorrawwa a warqeeta lakki kode. 14Ka warqeeta paxaara oppa teeppa a xaaynaata mina soohame kodeew ka mina'e siroosen qaqqapsiise.
Akala kessoppa
sooka 39:8-21
15“Ka akka efuudi koote mina'ew rufta warqeeta pahato ka moonta pahato ka a awla ka a tiima isho xaynaata paxaara a qora talpa oppa shippamtenne qeesittaseti akala kessoppa a ishin fiqaata Waaqa kaassannaan akka harmitta mina dawe. 16Derumta akaloseti nefo, paakkota takka ka paldumtaadi paakkota takka a qindadda afurin olimina kitto ka olqudanxata qeppite koddito. 17ka akalase quda'e, dakadda a heraan kokokkoka jirfa afuri olkamma qune. Ka jirfa a paayyota mina'e, dakadda a heraan kokokkoka serdiyoni ka topasiyyooni isho daka oyno qune. 18Ka jirfa a lammatta mina'e, peluuri ka senperi isho almaasi qune. 19Ka jirfa a sessatta mina'e, yaakinti ka kelqedooni isho ametestosi qune. 20Ka jirfa a afratta mina'e, pirille ka merkidi isho iyyaspiidi qune. Dakaddosen heraan kokokkoka piisa xoorrawwa a warqeeta kara'e kukkuti'an. 21Dakaddosen heraan kokokkoka kudanka lakki piisa qara'e, maxxada a hellaa Yayqoopi kudanka lakki poojama; ikka pakka kaffa a Isira'eeli kudanka lakki oppa halaaman. 22Ka akalose a kessoppati'i, warqeeta paxaara oppa teepa a xaynaata mina soohame kodeew. 23Ka warqeetoppa xoorrawwa lakki kode ka qindaddasene lakkiiyyi qepeelliyya qaraxata akalase a kessoppa quda kakkalshe. 24Ka warqeetase teepa xaynaata mina soohamte lakki qeede ka xoorrawwasene qindadda akala kessoppa mina ca quda qaqqapsiise. 25Ka kuuta teeppasene lakki qeede ka siraasene a warqeeta quda qaqqapsiise ka pora asse pahonne rakkumayasene a efuudi kessexata deena mina qaqqapsiise. 26Ka xoorrawwa awarqeeta lakki kodeew ka akalase a kessoppatiiyyi paka efuudi quda qatenne qeppeelliyya a xata qate quda qaqqapsiise. 27Ka warqeetoppa xoorrawwa lakki kodeew ka saalpatase a efuudi harmuman dawame qareela teeppasene a efuudi fuuleeyye xashshiyya xata deena ollin kammeela qaqqapsiise. 28Akka akalase a kessoppa efuudi qara jaqqalo ka qara in poqqinini'i, rufta a moonta pahatonne xoorrawwa akala kessoppa isho a efuudi olqudopa hide.
29“Oto Arooni porose qulqullaawe karopa kullinooyye, a akalose a kessoppa a fiqaata Waaqatin kaassannaan, a qara maxxada kaffa Isira'eeli pojen kalsado; anti Yaahiwwe sedennen samayta Isira'eeli matte oorsatta quda tawa. 30Arooni a akalase a kessoppa karaayye, uriimi isho tuumimi qapnaado; ikka awta Yaahiwwe turopa kullino piisaayye sataata Arooni qara caatto. Seden Arooni ka awta piisa akalose a kessoppa fuuliyyo a Yaahiwwe tura kalsada ka fiqaatiyyo hellaa Isira'eeliti upnaysha. #dikoota 27:21; ooreta 33:8; Isi 2:63; Nehi 7:65
Mehadda a qeesewwa kalsannaane a ata hase
sooka 39:22-31
31“Qamiseetase efuudi kela kalsatammitto a rufta moonta pahato koddito. 32Pora matta kallsatta ishi kode ka akkima minaxata in tiirammini'i, kamaaraadi a xolma qeppishe ka qarandesa qubbaanse. 33Ka kammandesa rufta a moonta pahato ka a awwla ka a tiimatin pahana dalta roomaani sire; ka artaasso karandesa tawnanna a warqeeta shashakkaya rake. 34Qamiseese kammandesa tawnannoosen a warqeeta shashakka isho pahana a dalta roomaani a olkaran pujamen. 35Arooni oto koda koonooyye a qamiseese kalsado ka oto fuula Yaahiwwe turopa tika qulqulloota kelopa kullinooyye ka sooknooyye akka in toonini'i nessa tawnannooseneti ka dakaado. 36“Warqeeta a paxaara oppa sira takkan kode ka qara poje ka kide ‘A Yaahiwwe xawwi reexamte’ 37Ka qeede ka rufta moonta pahatonne parroota quda fuula tura hidde. 38Oto samayta Isira'eeli kalisoota kalinnooyye, kada punu kalissaappaayye ishin dapan, akka Arooni dapaaysho haadado'e, anti Yaahiwwe ka kalisoota ishootta qara teyyado'e, oto Arooni parroota marranno piisaayye a siroosen fuula tura hiddado. 39Kooteta isho parroota xaynaata a qora talpa oppa shippamteppaayye Arooni dawe; ka saappataadi nefo xaynaata a qora talpa oppa shippamteppaayyeew dawe; harmitta ka oppa sira pujo. 40“Ka hellaasene a Arooni a diira sira'e ka ulfeessa'e, xootewwa ka saappatadda isho kullewwa ishootta kode. 41Ka mehaddoosen innaassin Arooni isho hellaade a diiraati kalshe ka akka qeesewwa koddan ka ana koda kodane'e, ishootta daate ka qeesumshe ka xawwi ishootta reexe. 42Ka akka saalaaysho in akkaannini'i, xaynaata a qora talpa oppa shippamteppaayye konfa a kumma'a a surraappa xaano ka kilpalla qara kayno ishootta dawe. 43Oto Arooni isho hellaade a diira tukkanose xayyo kelopa kullinaaneeyye, taaki kalisoota kalissa porase qulqullaawe kelopa kullinaaneeyye akka ishin dapaytannen kullinin ka in toonini'i, a mehaddoosen kalsaden. Sede Arooni isho sanynyeetaadi a isha kamma dalannitto'e a taanteta parapara koddito.
Currently Selected:
Mataafa Sooketa 28: MaQu
Highlight
Copy
Compare
Share
Want to have your highlights saved across all your devices? Sign up or sign in
