Mataafa Sooketa 29
29
Qoota ukkumeeta qeesumati desa dehaama Arooni isho hellaadi' daasame
Lewi 8:1-36
1“Arooni isho hellaadi a diira akka xawwi reexxaman ka qeesewwa koddan ka ana' koda kodane'e asse ishootta kode; haaritta xorma takka ka laahadda lakki a toobuma in qapnin qeede ka. 2daamma kappa a paxaara qeede ka laaqqota a sayteetan tiqqiiren a in pukessammin ka laaqqota a sayteeta in qapnin a in pukessammin isho laaqqota qaaha a sayteetan quda daaten a in pukessammin laaqqe. 3Ka piisa satara kara xaaye ka haarittase a xorma isho laahaddasene lakki ollin ishin xooye.
4“Ka Arooni isho hellaadi a diira xarra tukkaniyyo oppopa ishootta qeede ka eyye pishaan ishootta jaqqe. 5Ka mehaddasene qeede ka Arooni quda kalshe ka xooteta ka qamiseese efuudi kela kallitto ka efuudi ka akala kessoppa ishi kalshe ka salpatase harmuman kodame ishi hidde. 6Ka parroota matta qara ishi mare ka parroota qara'e kulleeta ulfeena ishi kalshe. 7Ka sayteetase qulqullaawte qeede ka mattoppa ishi tuqe ka isha daate.
8“Ka hellaadi a diiraatin xooyeew ka quda xootewwa kalshe. 9Ka surraappa ishootta salpata hide ka matta qara ishootta kullewwa kalshe; qeesumaaysho haka paraparati'i taanteta ishootta kodda; pora asse pahonne Arooni isho hellaadi a diira qeesewwa koota.
10“Ka sekkammaawe tukkanase xayyo turopa xormaseetin deeta; Arooni isho hellaadi a diira ka mattaadi qara harkaasso qapadan. 11Akka xarra tukkana Waaqa kapa'e fuuliyyo a Yaahiwwe tura'e, xormase qalta. 12Ka diika xormaseti quda qeede ka kaassa a pora kalisoota qara'e, qupittaaytin daate ka a kela hase pora kalisoota kelandesa tuqe. 13Ka moora karitta ka a tira quda deke ka xallada lakki isho moora a quda co qeede ka pora kalisoota qara kupe. 14Ka so'asene a xormaseti ka kollattaadi ka marqinaadi piisa qeede ka safareeyye laka tula kupe; ini kalisoota juppoota'e kodditaay.
15“Ka laahaddasene lakkippa takka qeedeew; Arooni isho hellaadi a diira ka matta qara ishi harka qapaden. 16Atti laahose qale ka diikaadi qeede ka kamaara porase a kalisoota kapandesa fide. 17Ka laahase meele ka meella a karanxata isho loqqaadi quda jaqe ka meellaadi a ata hase isho mattaadi qudopaaw xaaye. 18Ka so'a laahaseti piisa pora kalisoota qara kupe; sede ana Yaahiwwe'e kalisoota a kupannitto kodditaay ka kalisoota a ana Yaahiwwe dehaatte a apittoppa kupnaan a aluma paxaara qapto ana kodditaay. #Efe 5:2; Fili 4:18
19“Ka laahase a lammatta qeedew; Arooni isho hellaadi a diira ka matta qara ishi harka qapaden. 20Ka laahase qale ka diikaadi quda qeede ka Arooni isho hellaadi a diiraati'i kuuta napahawwaasso a akkitta qaran qaqappado ka ampukkuttayaasso a harka a akkitta ka a loqqa qaran qaqappado; ka a kela hase kamaara porase a kalisoota kapandesa fide. 21Ka diikase a pora kalisoota qara fiite quda shakkayta qeedeew ka sayteese qulqullaawte qeedew ka ollin Arooni isho mehaddaadi a kalsade qara fide; ka hellaadi a diira a isha olli ca isho mehaddaasso a kalsadene qara fide; Arooni isho hellaadi a diira a isha olli ca isho mehaddaasso oori sitiiyyi a xawwi ana reexxame koddaneey.
22“Sede laaha qeesumissa'ey, hallaakaadi ka masartaadi ka mooraadi a karitta ka a tira tura dekno ka xallaadi lakki isho moora a quda co ka kaytoota mokoleeta a loqta a akkitta ollin qeede, 23Ka satarasene a laaqqota oppa haddaya in qapnini a ana Yaahiwwe kalisoota kalissene karaayye, laaqqota a sayteetan koden takka ka a sayteeta mali laaqqamte takka ka laaqqota qaaha takka ollopa qeede. 24Ka sene piisa harka Arooni isho a hellaadi a diira oppa xaaye; ishootta ka akka damtose ana Yaahiwwe kalisoota lellehinnaaneti kalte akkissa'e damtose lellehshen. 25A sekkammaayye harkaasso oppa qeede ka kalisootase kupannitto olinni pora kalisoota qara'e, kalisoota ana Yaahiwwe alaawnitto kode ka kupe; sede ana Yaahiwwe'e kalisoota apittoppa kupeetan kallitto kodditaay.
26“Ka qeesuma Arooni'i aytaraasa a laahoseti qeedew ka akkima ana Yaahiwwe kalisoota lellehinnaane kalisse akkissa'e lellehshew; ini qoottotaaytiiy,
27laahase Arooni isho hellaadi a diira ishin qeesummaan oppaayye, aytaraasa a lellehshen isho kaytootase a xawwi reexxamte koddito; 28Oto samaytiyyo kalisoota takkaytuma dehaysannooyye, laahase a dehannaan oppa aytaraasa ka kaytoota harka akkitta a qerayta Arooni isho a hellaadi a diira koddito; ini taanteta a pursama in qapnini koddita; sede kalisoota a samayta ana Yaahiwwe kalsho.
29“mehaddoosen qulqullaawe a Arooni kalsanna, isha kammaayye a hellaadi a diiraati kodden; ishootta ka oto daatammaan ka qeesummaaneeyye kalsadeneew. 30Inna Arooni a pakkaadippa qeesitta koddina; oto porase qulqullaaweppa koda koda'e tukkanose xayyo kelopa kullinooyye; a kuyyaata tappa mehaddoosen kalsado.
31So'a laahase ishin qeesummaan qeede ka pora a qulqullaaweppa xarshe. 32Arooni isho hellaadi a diira ka so'a a laahaseti isho laaqqose satara kara kitto qeedan ka xarra tukkaniyyo tura daman. 33A siltaana qeesuma teyyannaaneeyye, damtose a ishin juppootaaysho ishootta hasse, a ishootta'ew damen diisheey qoota qulqullaawte malla nama pila in dammin. 34Oton so'a a laahose a qeesuma taaki laaqqose parripa mukaayye; qoota qulqullaawte malla nama takka nefo in dammin, ma apittan alle kupe.
35“Ka Arooni isho hellaadi a diira kuyyaata tappa kara qeesumhse ka akkan ke ajaje qara'e we piisa ishootta dikkishe. 36Kuyyaata mina'e haseenta juppootaati'i xorma takka kalisoota kalshe; sede porase a kalisoota'e jaqqitaay; ka porose a kalisoota sayteetan qara daate; sede porose qulqullassaay. 37Ka a olkamma a mittinin mali kuyyaata tappa kara asse kode, porose a kalisoota oori fayya'e qulqullaawaay; nama taaki wa porose a kalisoota quda kayna piisa ka qulqullaawan.
Kalisoota a kuyyaata piisa kallitto
dikoota 28:1-8
38“Parra itturopa deena piisa kara'e kuyyaata mina poroose a kalisoota qara'e laaha lakki a para takka takka pire'e kalisoota kalissa. 39Laaha takka teykanteeyye kalisoota kalshe; ka takka kalaakalaayye kalshe. 40Ka laaha paayyota olliiyyi daamma kappa a paxaara kiilota takka ka sayteeta ekerta a diipamte ka miilte nitiroota takka daammosetin tiqqiire ka taadeta wayneeta nitiroota takka kalisoota kode ka qara tuttuqe. 41Ka laahase a lamatta kallapteeyye kalisoota dehaysheew; ka akka a teykanta mina'e daamma ka sayteeta isho taadeta wayneeta a asseew kitto qara kode; ini ana Yaahiwwe'e kalisoota a apittan kallitto a aluma fayya qaptooy. 42Kalisoose kupannitto xeltada itturopa deena piisa kara'e xarra tukkaniyyo tura'e ana Yaahiwwe kalissa; anti ka eyye ke akka ka ke haasawada. 43Anka eyye'e samaytiyyo a Isira'eeli akka; poroose ka ulfeeniyyon qulqullaawa. 44Anti ka tukkanose xayyo isho porose a kalisoota qulqullaysha ka Arooni isho hellaadi a diira kuli xawwi reexa ikka qeesewwa ana koda koona kodan. 45Anka otanta samayta Isira'eeli oppa kallaada ka Waaqaaysho kodda. 46Ishootta ka akkan anti Yaahiwwe Waaqaaysho a otantaaysho oppa kallaado malla piita Kipsi kara ishootta sookshe upnaadan. Anti an Yaahiwwe Waaqaaysho.
Currently Selected:
Mataafa Sooketa 29: MaQu
Highlight
Copy
Compare
Share
Want to have your highlights saved across all your devices? Sign up or sign in
