Mataafa Sooketa 16
16
Menna isho Purkida
1Samayta Isira'eeli piisa ka Eliimiiyyi xa'e ka a Kipsi xa'eneeyye leya a lammatta ka kuyyaata kudanka kenattatiiyyi koommaytase a Siini otanta Eliimi isho otanta siina karaayye co kayen. 2Samaytase a Isira'eeli piisa ka koommaytose oppaayye Muuse isho Arooni qara qoojqooje. 3Ka ishootta kide'e, “Kipsi karaayye an okta so'a kapa kutiininno ka akka heenattinno mina damminno oppaayye, Yaahiwwe kadi eyye'ew ino pire maana in kinnin? Akka samayse piisa doxan pira'e are koommaytoppopa inon deeten.”
4Yaahiwwe ka Muuse kide, “Tin anti moonte xatan damta ishina roopsha; samayta ka kuyyaata mina sooka ka wa kuyyaatoppa ishi kayna pohada; anti ka akka seeriyyo tooytannaan ka tooytaanni in kinnin seden ishootta ekkaysada! #Yoha 6:31 5Kuyyaata lehattatiiyyi xoori a turan pohannaan qaropa a harka lakki pohaden ka wa pohadane ka ishin kalane piisa damta kodaden.
6Muuse isho Arooni ka samayta Isira'eeli piisa kidene, “Awwe shishshipeeyye a piita Kipsi kara ishin sookshe, akka Yaahiwwe kodde upnaattan. 7Yaahiwwe qoojqooja a isha qara qoojqoojten idakayeey, parri teykanteeyye ulfeena Yaahiwwe akkitan; ino allu an opa ayno akka ino qara qoojqoojnittan.” 8Muuse ka ishootta kideewwe, “Yaahiwwe qoojqooja a isha qara qojqoojten qoota dakaye malla, oto awwe shishshipeeyye so'a ka parri teykanteeyye damta ishina daashooyye, akka isha Yaahiwwe kodde upnaattan; ma allu ata ino an opa ayno, akka ino qara qoojqoojnittan? Ha sede a qoojqoojnittan Yaahiwwe qara qoojqoojnittan diisheey ino qaran”
9Muuse ka Arooni kide, “Samayta Isira'eeli piisa lele ka kide, ‘Yaahiwwe qoojqoojaayshin idakayeey, isha turopa dehaada!” 10Ete Arooni samaytase a Isira'eeli piisa haasawannooyye, ikka koommaytanxata tooyyaden ka ulfeena Yaahiwwe oraaraappa akken. 11Yaahiwwe ka Muuse kide, 12“Qoojqooja samayta Isira'eeli in dakayeey, ishootta lele ka kide, ‘Awwe shishshipeeyye a letta in dummin turanne, so'a damtan ka oto paritooyye damta damtaneew ka paktan; ka akkan anti Yaahiwwe Waaqaayshin kodde upnaattan.’”
13Halkeessetiiyyiiw purkida ka de'e ka safaroppa immake; ete pariteeyyeew tadahata ka safarase kapandesa immakaatte. 14Ete tadahatase tawteeyye koommayse oppaayye wa qaqqaaha ka a''ata ka laaqamen ka piita qara akkaanni. 15Samayta Isira'eeli ete sede akkeeyye, qoota turan in upnin malla i'olli kide, “Ata sene maana?”
Muuse ka ishootta kide, “Ha ini damtase a Yaahiwwe akka damtane'e, ishina daashe. #Qoro 1ta 10:3 16Yaahiwwe ishina ajaje ka kide, ‘Matta mina nama wa dama mina ca pohado. Nama takka orra tukkanaadi kela kalo mina'e, a kura komori takka takka poho.’” #16:16 komori dikoota 18, 32, 33 ka 36 qarae ilelamte, sede nefo nitiroota lakki minae kitta.
17Samayta Isira'eeli ka sede qara kode; a demo xoori ikoopsade; deemo ka qajisade. 18Ma xoori ete kura komortin kurraaneeyye, a koopsade qara in hasene, umma a shakkisade ishi in qajne; wa nama matta mina pohade ka a damo mina'ew caaden. #Qoro 2ta 8:15 19Muusi ka ishootta kide, “Sede kelaayye nama takka nefo parri in hattisannin!” 20Ma xoori ishootta oppaayye a demo wa Muuse kide in dakayne ka kela hattisaden ka parri muksaden; ikka parraytaadiiyyi punaatootte ka xaccatte; Muuse ka ishootta qara miirode. 21Teykanta teykanta'e, nama ka wa isha kayna mina ca'ew pohanni; oto atoota awditooyye a piita qara haste ka liilli.
22Kuyyaata lehattatiiyyi ikka nama mina'e kura komori lakki lakki#16:22 takka punu nitiroota afuri ka paka kaya i'ettanissa pohaden; saarra samayta ka de'en ka sede Muuse lelen. 23Muuse ka ishootta kide, “Ini wa sene a Yaahiwwe ajaje; parriiyyi kuyyaata qulqullaawte a Yaahiwweey, kuyyaata nessuma. Semmalla awweew a xarsannittan xarsada ka a laaqqannittan laaqqada ka a ishin kela hasse parripa muksada!” #sooka 20:8-11 24Ikka akka Muuse ishootta kide mina'e, a ishootta kela hasse parripa muksaden, umma in xaccanne umma in punaatoonne. 25Muuse ka ishootta kide, “Awweew dama ka pira; awwe kuyyaata nessuma a Yaahiwwe, awwe piita qara we takkan nefo a akkattan. 26Kuyyaata lehi ollopa pohattan; kuyyaata tappatta xoori qoota kuyyaata a nessuma koddite malla, we takkan nefo a akkattan.”
27A kodditoma kuyyaatase a tappattatiiyyi, a deemo pohatta'e sookeneew; umma we takkan nefo in akkanne. 28Yaahiwwe ka Muuse kide, “Haka aytamitti'i ajajiyyo ka seeriyyo tooytaatta tiittan? 29Tooya! ana Yaahiwwe kuyyaata nessuma ishina kode, akka semmalla kuyyaata lehattatiiyyi damta a kuyyaata lakki kayto ishina daashe; kuyyaata tappattatiiyyi nama a pora oppa co oppa tawo ka lakopa in sooknin.” 30Samayta ka kuyyaata tappattatiiyyi nessade.
31Samayta Isira'eeli ka damtaseti “Menna” kide ka ishi maxxa kode. Isheetta nefo a dalta timpilaala mina'e ati ka akka laaqqota a takman laaqqen mina marmaddaawni. #16:31 menna afa iprutinni “sede maana” kideeta. #dikoota 11:7-8 32Muuse ka kide, “Yaahiwwe i'ajaje ka kide, ‘Awtan Kipsi kara ishin sooksheeyye, xeltada itturopa deena akka damtose an koommaytoppa ishin damshe akkane'e, Menna kura komori takkan qeede ka eeyye xaaye.” 33Muuse ka Arooni kide, “Menna kura komori takkan qeede ka okta kara xaaye ka akka xeltada itturopa deenaati eeyye jarto'e, fuula Yaahiwwe tura xaaye.” #Ip 9:4 34Arooni ka akka Yaahiwwe Muuse ajaje qara'e, akka Mennasene tooytamane'e taapotase a maakkitta#16:34 taapose a maakitta, akka taapotase a Waaqase co ka kallaanno'e maakitta koddite akkinni. tura xaaye. 35Samayta Isira'eeli ka haka piitase xaadi a kara kallaado xeelase a Kene'aani kayno kara'e, para kunda afuri Menna dame. 36Kura koomori takkan kura ifi qudaayye kuma kundatta.
Currently Selected:
Mataafa Sooketa 16: MaQu
Highlight
Copy
Compare
Share
Want to have your highlights saved across all your devices? Sign up or sign in
