Mataafa Sooketa 17
17
Pisha shila kara qite
ooreta 20:1-13
1Akka Yaahiwwe turan ajaje qara'e, samayta Isira'eeli piisa ka koommayta Siiniti xa'e ka pora takka desa a pila opa antaanne Refitiimi kara safare; ma xoori samayta pisha ikka in qapo. 2Seminan samayta ka Muuse qara xa'e ka ishi kiini, “Pisha an ikkina ino daashe.”
Muuse ka ishootta kide, “Maana'e ana qara xaanittan ka maana malla Yaahiwwe ekkaysannittan?”
3Ma xoori samayta pisha'e deepode ka Muuse qara qoojqooje ka kide, “Akka ino ka hellaanno isho horeetinno deepottan pirto'e, maana malla piita Kipsi kara ino sookisse?”
4Sekkammaayye Muuse ka Yaahiwwepa ullupe ka kide, “Dakaan ana dakka'e harmisadeneey, ata kuli attan samayse koda?”
5Yaahiwwe ka Muuse kide, “Saarra samayta Isira'eeli oppa lamaya isi quda qeede ka uleetase a kirra Appaayi oppan da'isse harkoppa qapado ka samayta tura qate ka aane. 6Tin anti irrootase a Siinaatiiyyin shila qara ke tura qa'ada, akka shilase da'issa, pisha ka kara qitan, samayta ka ika;” Muuse ka fuula saarra Isira'eeli tura'e, asse kode.
7Qoota samayta Isira'eeli peeqqa xaashe ka Yaahiwwe ekkaysade ka kide, “Hela Yaahiwwe ino olli icaam moon in co” malla, Muusi ka porooseti maxxa kode ka kide, “Masaahi isho “Meriipa.”
Isira'eeleta akka Amaleqeeta oli torpite
8Amaleqeeta ka deete ka Rafidiimi kara Isira'eeleta torpite. 9Muusi ka Iyyaasu kide, “Samaytoppaayye orra ino reexxe ka tuule ka Amaaleqeeta torpe; anti parriiyyi uleetase a Waaqa'en harkoppa qapada ka kuuta kunkunnaaseti qara qa'adaay.” 10Iyyaasu ka akka Muuse ishi kide qara kode ka Amaaleqeeta torpe. Muuse ka Arooni isho Huuri ka kuutase a kunkunnaaseti qaropa fayyaden. 11Oto Muuse harkaadi opeela xaasho piisa kapa'e Isira'eeleta ipunni; oton Muuse harkaadi xata oorsadaayye, Amaleeqeta ka punni. 12Harka Muuse ka kakkafaden; Arooni isho Huuri ka daka qeeden ka isha kela xaayen, ikka qara kuti'e; ishootta ka qinda qindan qa'aden ka harkaadi opeela qapen; haka letta dummitto'e harkaadi ka kokkonnaaden. 13Iyyaasu ka koraatetan Amaaleqeeta pire.
14Sekkammayye Yaahiwwe ka Muuse kide, “Akka matte oorsatama tupa tawto'e, putaymoosen mataafa ollopa marrammo kara taafe; ka akka dakayo'e, Iyyaasu nappape; anti sanynyeeta Amaleeqeta'en piita qara alle piraay.” #ooreta 25:17-19; Saamu a 1ta 15:2-9 15Muuse ka poqa kalisoota dawe ka maxxa ishi kode ka kide, “Yaahiwwe paantiraayo.” 16Ka kideewwe, “Ishina fayya paantira Yaahiwwe moontandela qapa! Yaahiwwe xeltada desa xeltadaapa Amaaleqeeta torpa tupaaw caada.”
Currently Selected:
Mataafa Sooketa 17: MaQu
Highlight
Copy
Compare
Share
Want to have your highlights saved across all your devices? Sign up or sign in
