Kodampaya 26

Pawloosi wa Akriibba tura haasawade

1Akriibba ka Pawloosi kide, “Akka qoota mattaaytiti desa haasawatto'e, ike faqqatamte.” Pawloosi ka harkaadi derayshe ka mina haasawade ka kide,

2“Atti nuquso Akriibba, kisseeta a Yihutaata ana qara dehasse piisa mina'e, oton awwe fuulaayti tura malseeta oorsannooyye xasa ana dakaanni. 3xawwa desa, atti taanteta isho shiishsha a Yihutaata qanqannissa upta; semmalla akka opseetan ana dakkaysatto'en ke naappanni.

4An innume co paayyatte atta akkan kallaade Yihutaata i'ana upta. Paayyote paayyatte samaytiiyyo oppa isho Yursaalami kara'e, caatta an kallaade i'upan. 5Oton maakkuma heenaneeyye, amanteetinno oppaayye kitasene a aata kokkonnanna oppaayye akkan Feresitta kodde ka kallaade, paayyote paayyatte i'upan#koda 23:6; Fili 3:5 . 6Amma xoori waan malla firteeta tura areppa qa'ade, kippeetase a kodayteeta a Waaqa aappadaanno daashe malla; 7kippeese oppa kaya'e kaffa sene xanno kudanka lakki halkeetta ka kuyyaata'e, Waaqa waaqaysanni ka asanni; nuquso Yihutaata, kippeese minanneew ana xasaste. 8Waaqa, akkima a orra le'e tootoppa xa'inno kodde, maana malla ishin oppa a amanammi in kinnin koddite?

9Anti mattiyyo'e in piisade ka kide, ‘Hakan ettaninno'e, maxxose a Yesuusi a Naasirati torreeta ana parpaaccisni#koda 8:3; 22:4-5 .’ 10Ka Yursaalami kara sedeew kode; hupna a ukkumeeta an saarra qeesewwa qara teyyadenne, orra amanno oppaayye akka orra lekayta hidamo'en kode. Ka ete ishootta lennaaneeyye, a ishootta lenna olli parkume. 11Ka a lekatin akka tikkasene a qinseeta a orra Yihuta kela qatta'aman ka poqalla qara afa otitta haasawadan; ishootta kitteessini ka ishootta qara a kuttati miirode. Ka katamadda a piita pilaati oppopa anni ka ishootta kamma daanni.”

Pawloosi atta akkima Kiristoosipa tiitawe torre

koda 9:1-19; 22:6-16

12“Ka qootose malla saarra qeesewwa qaraayye, hupna ukkumeeta immakkoota, isho ajaja teyyade ka Tamaasqopa anni. 13Nuquso, eten poroppa cooyye, olliqqootta kuyyaatatiiyyi, anka la'ayta, a pirtota qara qapo akke. La'ayse nefo ana isho orra ana olli anno qara'e moonte xata la'aye. 14Eten piisanti piitopa seheneeyye, nessa afa Iprutin kiino, ‘Sawuli! Sawuli! maana'e ana kamma pora daanni? Oton qaarta koraateta qara diinniiyyi, issiiwwi miiddita.’ Dakaye. 15Anti ka kide, ‘Poqallaay, atti a ayno?’ Poqalla ka ana kide, ‘Anti an Yesuusise a atti pora daannitto. 16Amma xoori xa'e ka qa'ado. Anti waan malla ketura akkaade, wa amma akkite isho waan itturopa kuli ke akkishaatinni akka orxaytiyyo isho maakkittiyyo ana kodditaati'in ke shuumatta fade. 17Samayta Isira'eeli isho orrase Yihutaata in koddinin an oppopa ke erkinoo, kelaan ken paha. 18Akka ishootta ildaasso panta ka tukkantoppa la'aytoppopa ishootta sookisso'e, ka hupna seetana kela Waaqopa ishootta oorisso'en koda. A ishootta ka ana amana minanne, haseenta juppoota akkadan ka orrase ana amane ka qulqllaawe olliiyyi lehanda qoottadan.’”

Pawloosi akkima qoota kodaaditi desa torre

19“Semalla nuquso Akriibba, kelashaatose moonte xata ana daasame an tiinne. 20ma paayyota qaraayye, orra Tamaasqo kara co ka kamma desaaw orra Yerusaalami isho a piita Yihuta piisa oppa co ka Yihutaata in koddini kuli, akka juppootaysho oppa ooro ka Waaqopa tiitaawo ka juppootaaysho oppa ooretaayshoti wa akkinna kodo'en ishootta kollishe#koda 9:20, 28-29. 21Wa malla Yihutaata tika qulqulloota kela ana qapte ka ana ikassa faate sedeew. 22Haka awweti qaarqaarsa a Waaqa ana kapa in mayne; anka seminan a shakka ka a kutta' maakkummi. Ka are qa'anni. Wa xuumampaya isho Muuse turan kidene, ‘Asse koddita’ Haasawatta mali a pila an haasawanne. 23Ishootta nefo wa hasawadene ikidene, ‘Kiristoosi irakkada ka tootoppa xaana'e a paayyota kodda ka la'ayta dina samayta Isira'eeli isho orra a Yihutaata in koddinini akkisha#Issa 42:6; 49:6; Qoro 1ta 15:20 .’”

24Pawloosi ete sede haasawannooyye, Fiistoosi nessa a kuttanne haasawade ka kide, “Pawloosi! amma oori, ittaaroonni; a kutta kollattaayti taarota qaranne ke kayte!”

25Pawloosi xoori i'orshe ka kide, “Ke a kuttati ulfeessame Fistoosi, anti dukaata isho wa qajeele'en haasawanni diisheey, an taaroonni an co. 26Nuqusa an tura la'ayshe ka haasawade wessen i'upa, sede nefo qoota dekandekatti in koddinin malla nuqusa akka upo in qalpeeffanni. 27Atti nuquso Akriibba, xuumampaya i'amanninni? Akkima amannitto in upa.”

28Akriibba ka Pawloosi kide, “Ha atti kiseese shakka kara'e kiristaana ana kooni.” 29Pawloosi ka kide, “Kiseeta a shakka koddite a kutta koddite ke patta a in koddinin maliiyyi, a awwe haasoosen xayyo dakaye piisa, hidosen xayyo maliiyyi akka a xayyo mina koddane'e Waaqan qinsanni.”

30Se kammaayye, nuqusase ka ukkumampaytase a piita isho Perniiqqe ka orrase ishootta olli kute'e piisa ka xa'e. 31Ka ete eyye sooken ka annaaneeyye, olli kidene, “Namoose wa minan to'a taaki minan hidama takkan nefo in koone.” 32Akriibba ka Fistoosi kide, “Namoose katin ‘Qeesaari nuqusasi kutta a Roomi qaropa ana tarpisha’ in kiinini kiiteeyye, nataan sookni heene.”

Currently Selected:

Kodampaya 26: MaQu

Highlight

Copy