Kodampaya 25

Akkima Pawloosi nuqusa Roomi qaropa ikipaanynyeta kaassade

1Fistoosi ete Qisaariya piitase xaadi a mukinno opa kale ka kuyyaata sessa pire kammaayye, Yursaalamipa aane. 2Saarra qeesewwa isho kutkuttowwa a Yihuta takka takka ka eyye Pawloosi qara kisseetaaysho dehayshen. 3Ka Fistoosi naappaden ka kidene, “Pawloosi Yursaalamipa dehassanne paxaarumta ino kode.” Wa malla asse kidene nefo, qoota poroppa Pawloosi tura asatta ka isha ikassa faden malla. 4Fistoosi xoori i'ishootta kide, “Pawloosi piita Qeesaariyaati, tika hida kara tooytaama qara ca. Anti nefo amma irra qaran tiitaawa ka eeyyepa aana. 5Ukkumampayaassin a ana olli Qiisaariyaapa de'en ka oton wa Pawloosi ishin dape'e caayye, eyye isha xasasen.”

6Festoosi ete kuyyaata sette taaki kudan mina kitto ishootta kapa pire kammaayye, Qeesaariyapa aane ka ete eeyye kayeeyye parraytaadiiyyi pora a qaraxata firteeta faranno qara kute'e ka akka Pawloosi dehayshane'e ajaje, 7Pawloosi ete dehaadeeyye, Yihutaata a Yursaalami deete isha kapa tiitasse ka qa'atte ka kissewwa a kokkoka lekaya a ishi maakitta teya in ettaninnini qara dehasse. 8Pawloosi ka mina tamaakkade ka kide, “Anti ishin dapayta an seera Yihutaata isho tika qulqulloota taaki nuqusase kutta a Roomi qara kode in co.”

9Fistoosi xoori Yihutaata xasassa fade ka Pawloosi kide, “Yursaalamipa anta ka eyye qootoseti desa ana tura tamaakkatta iheenta?” 10Pawloosi xoori i'orshe ka kide, “Tin anti pora oppa tamakkatta ana parpaaccisno, Porase a nuqusa kutta a Roomi qara xata faranno tura'en qa'ade; atti nefo akka fayya upto mina'e, ishin dapayta an Yihutaata qara kode takka nefo in co. 11Oton ishinnin dapeeyye, taaki dapa an minan to'on kodeeyye, ana toota kela paho an kiini an co. Ma xoori otoon kisseetaaysho'en dartaayye nama ishootta ana tarpissa ka daassatan ettansho. Anti qeesaari nuqusase kutta a Roomi qaropan ikipaanynyeta kaassade.”

12Sitiiyyi Fiistoosi ka orrase isha dehaammo olli haasawade ka Pawloosi kide, “Oton qeesaari nuqusase kutta a Roomi qaropa ikipaanynyeta kaassatteeyye, nuqusase kutta turopa i'anta.”

Pawloosi akkima Akriibba isho Perniiqqe turopa dehaade

13Kuyyawwa lamaya kammaayye, nuqusase Akriibba isho Perniiqqe Fistoosi okaadissa'e ollin Qeesaariyaapa de'en. 14Qoota kuyyawwa lekaya eyye jaren malla, Fiistoosi qoota Pawloosi desa nuqusa Akriibba torre ka kide, “Nama takka a Filiksi hide ka are diishe ca. 15An Yursaalami kara cooyye, saarra qeesewwa isho qimoota Yihuta, ana qare isha xasasen ka akkan isha qara' farato'e, ana naappaden. 16Anti xoori in ishootta oorshe ka kide, ‘Nama takka oto xasasamooyye, haka orrase isha xasase turopa dehaado ka mina malseeta oorsado maliiyyi, namase tarpissa ka daassata taanteta a mankisteeta Roomi'in.’ 17Semmalla, ete orrase isha xasasno oli pohe ka arepa de'eyye, anti an anjarrin malin eennow parraytaadiiyyi pora a qara xata farannaan qara kute'e ka akka Pawloosi ana turopa dehayshane ajaje. 18Orrase isha xasasno ete haasawatta isha kapa qa'adeeyye, wanjala a qara dehayshen an asade mina in co. 19Ma qoota amanteetaaysho isho qoota Yesuusise to'e, Pawloosi ka ‘cattampayta kodde’ kiinooti desa oli shiishni. 20Anti nefo qootan wa asse paha kara qoreeta oppa rakkade mallan Pawloosi kide, ‘Yursaalamipa anta ka qootoseti desa eyye tamaakkatta iheenta?’ 21Isha xoori, akka Qeesaari nuqusase kutta a Roomi deexoose xaadi ishi tooyyo fade ka ‘Qeesaari nuqusase kutta qaropa ikipaanynyeta kaassade.’ Anti ka hakan eeyyepa isha erkino kara'e, akka tika hidaati jaro ajaje.”

22Akriibba ka Fiistoosi kide, “Anti nefo a namoose haasawannooyye dakkayan heena.” Fiistoosi ka ishi kide, “Parri isha dakayta.”

23Semmalla parraytaadiiyyi, Akriibba isho Berniiqqe mehaddaasso a mankisteeta'e kalsaden ka ulfeena kuttan saara a xela oranna isho orra katamaappa matta qapo tura qatten ka de'en ka tika firteeta kelopa kullen. Sekkammaayye Fiistoosi ka “Pawloosi halaciise.” 24Ka kide, “Nuquso Akriibba ka ishina orra ino olli co, piisaayye, namase a Yihutaata ullupnitto ka kiinitto, ‘Namoose arepa desa caatta isha parpaaccisni in co’ Ka akkan isha qara' farato'e Yursaalami isho are ana kaassatte tin sede a are akkinittan. 25Anti xoori dapa a minan to'o, takka nefo an qara an teyne. Isha qoota, ‘Qeesaari nuqusase kutta a Roomi qaropa ikipaanynyeta kaassade’ mallan, eeyyepa isha erka piisade. 26a koddito ma, dapa isha qara te'ade an poqallaayyo taafo in co. Semmalla oto isha qortan kammaayye, akka an wa an taafa akkado mallan kide ka fuulaayshin turopa ka laaddi nuquso Akriibba fuulaayti turopa isha dehayshe. 27Oto nama hidame taanynya opeela ca opa erkammooyye, wa ishin xasasame lela diissata, likkeeta ana in pahanaanne.”

Currently Selected:

Kodampaya 25: MaQu

Highlight

Copy