Kodampaya 24

Yihutaata akka Pawloosi xasaste

1Kuyyaata ken kammaayye qeesittase kutta Hanaaniya, qimoota takka takka isho tapaqa takkan Terteluusi kidamma olli Qiisaariyaapa aane ka Fiilkiisi mukissampaytase a piita turopa dehaaden ka Pawloosi xasasen. 2Ete Pawloosi halaame ka dehaadeeyye, Terteluusi xasasaadi paayye ka kide, “Ke a ulfeessame Filiksi ke qudanne, nakayta kuttan akkannen, mukissaayti a paxaara minan samaytinno'e harmisama teyade. 3Ke akata ulfeessame filiksi, kodoose xaayti paxaara pora pisa oppaayye ka etaa piisaayye kalata kuttanen teyyanninna. 4Amma xoori an kiseetaayti ke qara an pirrin maliiyyi pora kumma'anne, waan ke' lela, akka karitta nukkullan ino qara dakayto'en ke naappani. 5namoose paaqa neeqa ino qara kodde; Yihutaata a piita qara kitto piisa qara'e horayta xa'inni. Parkase a darta Naasiraata kidammo qara isha saaraysho a kutta. 6Anka a tika qulqulloota nyalissa ekkaysannoyye, isha qapne. [ka allu seeraaynon isha qara' farata dikanne. 7Ma xoori Lusiyuusise saara xela oranna kodde idee ka hupna kuttan ino qara isha poqqishe. 8Ka inoosene isha xasasna ke qaropa tarpishe.] Kisseese an isha qara dehanninno piisa akka dukaata koddite, atti mattaayti isha qoreeta ka upnaatta i'ettanissa.” 9Yihutaata ka xasasoose qara olli kalte ka kiite, “sede piisa dukaata.”

Pawloosi akka Filiksi tura'e malseeta isi qara oorsade

10Mukissampaytase a piita Filiksi ka harkan akkishe ka akka Pawloosi haasawado ishi' faqqate. Pawloosi ka malseeta oorsade ka kide,

“Akka parra leka mukissampayta piisseti koddite qootan upo malla, kisseese ana qara dehaatte mina otoon ke tura malseeta oorsannooyye xasa ana dakaanni. 11An Yursaalamipa sakatatta aane kammaayye, akka kuyyaata kudanka lakki qaran qapnin, atti mattaayti upnaatta i'ettanissa. 12Sene are ana xasassna an tika qulqulloota taaki tikase a qinseeta a orra Yihuta taaki katamaappa an nama oli shiishno, taaki samayta horinno an in qapne. 13Kisseese a amma ana qara dehayshen oppaayye ana ratta'an in ettanshan. 14Ma xoori sede ke' leleetan heena kitasene a amanteeta a ishootta kiinaane <parka darta oppanne Waaqa aappadaanno Waaqaysanni;’ Ka wa mataaffa a seera isho a xuumampaya kara taafame piisa amanni. 15Ka akka ishootta kippannaan mina'e, anti kuli akka hanqeellaya isho juppoolaya tootoppa xa'ani'e Waaqa kippanni. 16Ka akkan fuula Waaqa isho a nama tura'e, karitta a ana qootinni in kinnin qapnaado'e, awta piisa japaanni.

17“An Yursaalami kara sookeeyye, a parra lekaya tarpen kammaayye, kaajaa qaarqaarsa a samaytinno pohame isho daassata a Waaqa kallitton qapade ka de'e. 18An kodoose koonooyyeew, ikka tika qulqulloota kela ana teyen. Anti sitiiyyin taanteta jaqqaysuma dikkishe. Ana olliiyyi samayta kuttayta in co; umma horayta in xaane. #koda 21:17-28 19Ma xoori sitiiyyi Yihutaata, a Issiyaayye deete eyye ca; ishootta otoon wa minan ana xasasnaane'e qapaneeyye, a ake turopa dehaden ka hasawaden. 20Taaki an firtishoonkota turopa dehaadeeyye, oton wa an ishin dape'e caayye, orroose dehaade a haasawado. 21Keeton otantaaysho oppa qa'ade ka nessa kuttishe ka kide, ‘Qootan kide, tootoppa xaana a orra le'eti icaan mallan awwe ishin turopa firteeta dehaade,’ se mali waan kode a pila in caan#koda 23:6 .”

22Filiksi xoori, amanteeta kiristinnaati desa qoota fayya upo malla, “Awta ajajampaytase a oranna Lusiyuusi de'oyyen haasaassin mitta” Kide ka orrase isi qara xaashe. 23Ka motolaqasene Pawloosi tooytinaati kide, “Isha tooyte ma, hakaseti qara an kokkonnaadan. Ka oto moottadaadi wa ishi parpaaccisnaatin ishi deenaaneeyye, qara in dawran.”

Pawloosi akkima Filiksi isho Dirusilla turopa dehaade

24Kuyyawwa lamaya kammaayye Filiksi iskatteetase xaadi Dirusilla kidammitto Yihutitteeta koddite olli de'e ka Pawloosi halacciise ka a Pawloosi qoota Yesuusi Kiristoosi amaneetati desa haasawanno dakaye. 25Ka ete Pawloosi qoota hanqeelluma ka qoota isi tooytaatta isho qoota firteetase deenittooti desa haasawadeeyye, tammaqe ka ishi kide, “Amma aane ka oto ana ettantooyyen eta pilaati ke halacciisaay.” 26Ka Pawloosi qara nooddota teyyatta kippanni ka lekayteetan Pawloosi halacciisni ka isha olli torraanni.

27Para lakki kammaayye Porkiyosi Fistoosi ka pakka Filiksi oppa shuumame. Filiksi Yihutaata xasassa fade ka Pawloosi hidappa eyye diishe.

Currently Selected:

Kodampaya 24: MaQu

Highlight

Copy