Bhaloma 1

1Nenga Apaulo, antumichi bha Akilisito Ayesu, andundame ndekuhagulikwa na kukemwa ligongo lya kutangacha Ngani Jammbone. 2Pena lolo, Annoongo akatandubha kwaakongolela apakwapekeanga Ngani Jammbone kupetela malobhe ga akaalondoi bhabhe mu Majaandiko Gakwe. 3Jenje Ngani Jammbone jitendakwaakongolela Mwana jwa Annoongo, Hangwana bhitu Ayesu Kilisito, jwaakabhelekwa handa mundu chaabhelekwa, akibha jwa ubhelei gwa Adaudi, 4kwa ngani ja hikubho ya Annoongo. Akalangikwa kwa uwecho nkolongwa kubhee nga Mwana jwa Annoongo kwa kuyokekwa. 5Kupetela jonojwe Ayesu Kilisito, Annoongo atekumbekea umbone gwabhe kubhee andundame, ili ligongo lyabhe, naatandaange bhandu bhanga Bhayahudi bhapatange kuhobhalelanga na kujeketela. 6Mwangota nga nkati ya bhandu bhenabho, nkemitingwe na Annoongo mme bhandu bhabhe Ayesu Kilisito bhene.

7Bahi, ndenda kunnyandikilanga mwangota mwabhoa bhammilinge ku Loma yakubhee Annoongo atenda kumpalanga muno, akanhagulanga mmee bhandu bhabhe mwene. Ndendakujopa kwa Hangwana Annoongo na Hangwana bhitu Ayesu Kilisito ampekeange mwangota umbone gwabhe.

Apaulo atendakwaachukulu Annoongo

8Henela kwa kujemeka, ndenda kwaachukulu Annoongo jwangu kwa kupetela Ayesu Kilisito ligongo lya mwangota mwabhoa, kwa kubhee kuhobhalela kwinu kutendakumanyikana pachilambo poha. 9Annoongo junantumikila kwa ntima gwangu goa mu kutangacha Ngani Jammbone ja mwana jwabhe, jonojwe nga jwaalola na kuimanya chinankombokelanga machobha goa mu kujopa kwangu. 10Ndendakwaajopa Annoongo handa apalite, ambekee upenyo gwa kuhalala gwa kuntyangilanga. 11Kwa kubhee ndenda kulokolila muno kummonanga na kwajangatilanga mpatange ngwahupa ja mboomo ili mmangange na machili mu kuhobhelela. 12Chinongela pambani, mwangota na nenga tupakujangatilana machobha goa, kuhobhalela kwinu kupakunekela machili nenga, na kuhobhalela kwangu kupakunnekelanga machili mwangota mu kwahobhalela Ayesu Kilisito. 13Akaalongo bhangu bhandu bhamwahobhalela Ayesu, mbala muhimanyange kubhee mala jijingi ngapalikwa kuntyangilanga, nambo kukibha na hilebhe hijingi hitekunhibhila kuhika kwaachinunji. Mbaalite bhandu bhaamanye Ayesu pakati jinunji mwangota handa paahikibha kwa bhandu bhanga Bhayahudi. 14Nenga mbalikwa kwaatangachianga bhandu bhoa Ngani Jammbone, Bhagiliki na bhanga Bhagiliki, kwa bhabhachomitinge na bhangachomanga. 15Henela ndenda kulokolila kabhele kutangacha Ngani Jammbone kwaachinunji mwangota mmilinge konokwe ku Loma.

Machili ga Ngani Jammbone

16Ngalola oni kutangacha Ngani Jammbone, ligongo Ngani Jammbone jibhii na machili ga Annoongo gagaaokoanga bhoa bhabhahobhalelanga Ayesu, kujemekela na Bhayahudi na bhanga Bhayahudi. 17Henela Ngani Jammbone jilangia namuna Annoongo chitupalikwa tubhee ili tukondekwe nnoongo jabhe, chikubho heche chitendeka kwa kuhobhalela, kujemeka kandahi mpaka kupela, handa chijijaandikwe mu Majaandiko ga Annoongo, “Mundu jwakondekwa nnoongi ja Annoongo apakutama kwa kutandaikwa mu kuhobhalela.”

Kulemwa kwa bhandu

18Lilaka lya Annoongo litekulangikwa pandaa kwa bhenibhala bhoa bhabhaakana yakubhee bhabhakananga ukweli kwa ubohu gwabhenji gukotokumanyikana. 19Hikubho hiikombola kumanyikana kwa ngani ja Annoongo, kwa kubhee Annoongo mwene abhekite pandaa kwabhenji. 20Kubhokela Annoongo pabhakahalakia chilambo uwecho gwabhe gwa machobha goa pangali kupela na unnoongo gwabhe gumanyikana pandaa hata handa ngabhonekana kwa mio. Bhandu bhakombolanga kugumanya kwa hilebhe yakubhee Annoongo akahialakia. Henela bhandu bhoa bhanga ndela joha jela ja kuchitetea! 21Bhena bhandu hata handa bhamanyanga kubhee Annoongo abhile, nambo ngaatopea handa chiipalikwa, wala ngaachukulu. Badala jakwe, kuganikia kwabhenji kutwelilinge mabohu na luunda lwabhenji gumanyahopo chilebhe. 22Bhachitenda kubhee bhakolite malango, nambo bhamanyangahopo chilebhe. 23Bhalekanga kwaachalila Annoongo jwaatama machobha goa pangali kupela, nambo bhachalilanga hidimu hiilandana na mundu jwaajomoka, kulandanikia na hinyama, hijuni na hinyama hiikwabha. 24Henela Annoongo bhatekwaalekanga bhakagulange kulokolila kubohu kwa mitima yabhenji, na kutendelana hikubho ya oni kupetela mimele jabhenji. 25Bhagutendebhua ukweli gwa Annoongo kubhee unami, bhatenda kuchalilanga na kuitumikilanga hilebhe hialakikwe na Annoongo, na kuleka kwaachalila Annoongo mwene jwaatekuhalakia, jwapalikwa kulumbalilwa machobha goa! Na hibhee henela. 26Henela Annoongo akabhalekanga bhakagulange kulokolila kwabhenji kubohu na kwa oni. Hata akahikege bhakatekulekanga kutenda handa chiiyobhalilike ja kulombwa na akanalome nambo bhatendakulombelana akaachinabhenenji. 27Akanalome hiyoyo bhatendakulekanga kutumianga yeega yabhenji handa chiipalikwa kwa mwanalome na mwikege, na akanalome bhatendelananga hikubho ya oni, kwa kutenda henela Annoongo apakwahukumulanga kubhokana na hikubho yabhenji hibohu. 28Bhandu bhakakananga kwaamanya Annoongo, Annoongo atekwaalekanga bhakagulange kuganikia kwabhenji kubohu, bhakatendange genigala gangapalikwa kutenda. 29Bhakibhanga na kila namuna ja ubohu, kwaapokonyola bhandu hilebhe, na kulyee muno, na kukwetela hilebhe. Bhenangota nga bhandu bha bwiu, na kukoma, na abulwa, na akaanami, na kuganikia kubohu, na kung'wenya bhandu, 30bhandu bha kopokeananga, nga bhandu bha kwaachimwa Annoongo, bhandu bha mbwinya na bhakuchipuna, ngajogopanga kutenda mabohu, na ngaatopeanga akaabhelei bhabhenji, 31bhena bhandu nga akaajinga, bhangahobhalelanga, bhanga kiha na bhabhatendelanga mabohu bhangi. 32Bhamanyanga kubhee malagilo ga Annoongo galagia bhandu bhabhatamanga kulandana na henela, bhapalikwa kujomoka. Kupunda ja genago, ngabha bhatendanga hikubho yeneyo akaachinabhene jika, ila bhakondekana na bhenaangota bhabhatendanga hikubho heyo.

Currently Selected:

Bhaloma 1: NTNHBL

Highlight

Copy

Compare