Ayohana 4
4
Ayesu na mwikege Nsamalia
1Mafalisayo bhakajoanga kubhee Ayesu atendita kwatendanga bhandu bhajingi kubhee bhabhachijigana na kwabaticha kupunda Ayohana. 2Hata handa Ayesu, bali bhabhachijigana bhabhe nga bhabhatendita kubaticha. 3Bahi, Ayesu pabhakagajoa genago, akabhoka chilambo cha ku Yudea na kubhuja ku chilambo cha ku Galilaya, 4mu ulendo gwabhe ikapalikwa kupetela ku Samalia.
5Bahi, akahika mu chilambo chimo cha ku Samalia chichikemitwa Sikali, kubhandikila na ng'onda gonigola yakubhee Ayakobo akampekea mwana jwabhe Ayosefu. 6Mahali penapo nga kukukabhee na lilibha lya Ayakobo. Ayesu akatama ngulugulu mwa lilibha helyo ligongo lya kutotokela kwa ulendo gonogwe. Ikibha muhi handa chaa chita.
7Mwikege jumo Ansamalia akahika penapo kuteka machi, Ayesu akaalobholela, “Mbekee machi ng'wee.” 8Muda hogwe bhenibala bhabhachijigana bhabhe bhakibha bhajaulinge kunnyini kuhemela chakulya.
9Nambo mwikege jonojwe akaajangula, “Mwenga nga Ayahudi na nenga nga Nsamalia, kwa niki ntendakunyopa nimpekee machi ga kung'wee?” Akalongela henela ligongo Bhayahudi na Bhasamalia ngakwelekana.
10Ayesu akaajangula, “Handa nkaimanyite ngwaupa jibhabhoa Annoongo nga ganiki jwaannobholela, ‘Mbekee machi ng'wee,’ mwenga nkaajopite bhenabho, na bhenabho akampekie machi gagapakuntenda mee umomi gwa machobha goa.”
11Mwikege jonojwe akaajangula, “Akolo, mwenga mwangali nteko gwa kutekela machi, na lilibha hele nga litandamano, machi genago gagaleta umomi gwa machobha goa mugapatite koji? 12Bholi, mwenga nga mwakolo kupunda atati bhitu Ayakobo jwaatupekie hele lilibha? Bhena mwene pamo na bhana bhabhe na hilangwa yabhe bhakwang'wenganga machi ga hele lilibha.”
13Ayesu akaajangula, “Kila mundu jwaang'wee machi ga hele lilibha, nyoota jipakwaakolela kabhele. 14Nambo jwaajola jwaapakung'wee machi gambakwapekea nenga, nyoota ngaakolela ng'o. Machi gambakwapekea gapakubhee cheembwe nkati jabhe, gagaelela umomi gwa machobha goa gwangapela.”
15Mwikege jonojwe akaalobholela, “Mwe mwakolo, mbekee machi genago ngotokubhona nyoota kabhele, na ngotokuhika kabhele pambani kuteka machi.”
16Ayesu akaalobholela, “Nnyaule nkaakeme hangwana bhinu, nhike nabho pambani.”
17Mwikege jonojwe akaajangula, “Nenga nangali hangwana.”
Ayesu akaalobholela, “Pannongela kubhee mwangali hangwana penapo nnongile maha. 18Ligongo nkalombwa na akanalome nhano, na bhenibhala bhantama nabho ngocheni ngabha hangwana bhinu. Penapo nnongile kweli.”
19Mwikege jonojwe akaalobholela, “Mwe mwakolo, chimmona nenga mwenga mwa alondoi bha Annoongo. 20Akanahota bhitu bha ku Samalia bhakaachalilanga Annoongo pa litombi hele, nambo mwangota Bhayahudi nnobholanga kubhee mahali pa kwaachalila Annoongo nga konokwe kuchilambo cha Yelusalemu.”
21Ayesu akaalobholela, “Mwe mma nhobhalele, machobha gatendakuhika yakubhee ngaachalilanga Atati nnani ja litombi hele, wala konikola ku Yelusalemu. 22Mwangota Bhasamalia ntendakwaachalila mwangaamanya, nambo twenga Bhayahudi twaamanyi bhatwachalila, ligongo kuhokoka kubhoka kwa Bhayahudi. 23Nambo machobha gapakuhika, na ngocheni gabhile pambani, yakubhee bhandu bha kweli bhapakwachalila Annoongo kwa kutandaikwa na Mboomo na kweli. Ligongo bhandu handa abhaangota nga bhabhapala Atati bhanchalile. 24Annoongo nga Mboomo na bhoa bhabhaachalila hipaalikwa kwaajopa mu Mboomo na kweli.”
25Mwikege jonijola akaajangula, “Niimanyi kubhee Amasiha atendakuhika, jwaakemwa Akilisito. Na jonojwe pabhapakuhika apakutukongolela maha kila chilebhe.”
26Ayesu akaalobholela, “Nenga junongela na mwenga, nga jonojwe.”
27Penapo bhenibhala bhabhachijigana bhabhe bhakabhujanga, bhakakangachanga muno kwaabhona Ayesu abhikulongela na mwikege. Nambo jwakwa mundu jwaakonyite, “Mpala chiniki kwaachabhe?” Au “Kwa niki ntendakulongela nabho?”
28Ngapena mwikege jonojwe akachileka chenichela chibhega penipala, akajaula kunnyini na kwalobholelanga bhandu, 29“Nhikange mukannolange mundu jwaanobholile hikubho yoa hiindendite! Bholi, ngakomboleka jonojwe nga Akilisito?” 30Bahi, bhandu bhajingi bhakabhokanga kubhoka kunnyini na kwaajendelela Ayesu.
31Muda hogwe bhenibhala bhabhachijigana bhabhe bhatendita kwaapembelea Ayesu, “Bhannyigana, nlyee choachela.”
32Nambo Ayesu akaajangulanga, “Nenga ngweti chakulya mwangachimanya mwangota.”
33Bahi bhenibhala bhabhachijigana bhabhe bhakajemekanga konyananga, “Bholi, abhi mundu jwaannetile chakulya?”
34Ayesu akaalobholelanga, “Chakulya changu nga chenjeni, kutenda genigala ga jwandumite na kujomola lihengo lyabhe. 35Mwangota nnobholanga, ‘Hiigalile mihei ncheche tuhunange, nambo nnyinulange miho nnolange migonda chigatekubhee tayali kwa kuhunwa.’ 36Jwakuhuna atendakulepwa mbiya na atendakumba mahumo ligongo lya umomi gwa machobha goa ili jwaapanda na jwaahuna bhahangalilange pamo.” 37Henela chilongelo chichilobhola. Jumo kupanda na jongi kuhuna. Nga bha kweli. 38Nenga nakantumanga nkahunange mu migonda mwangapandanga, bhangi bhakatendanga lihengo lya kulimba, nambo mwangota ntendakuchikonjanga ligongo lya lihengo lyabhenji.
39Bhasamalia bhajingi kubhoka mu chilambo chenichela bhakanhobhalela Ayesu ligongo lya malobhe, “Atekunobholela hikubho yoa hiindendite.” 40Henela bhenibhala Bhasamalia bhakaajendelela Ayesu bhakaapembelea kutama nabho, akatama penapo machobha gabhele.
41Bhandu bhajingi muno bhakahobhalelanga Ayesu ligongo lya malobhe gakwe. 42Bhakaalobholela haikege bhenibhala, “Ngocheni tutendakuhobhalela, ngabha kwa chenichela chinnongile mwenga tu, ligongo tutekwaajoa bhene, na tuimanyi kubhee abhabha nga kweli Mwokochi bha chilambo.”
Ayesu atendakunnamia mwana jwa akolo
43Pagakajomoka machobha gabhele, Ayesu akabhoka penapo, akajaula ku chilambo cha Galilaya. 44Kwa kubhee Ayesu bhene akalongela kubhee, “Alondohi ngatopelwa mu chilambo chabhe.” 45Bahi, pabhakahika ku chilambo cha Galilaya, Bhagalilaya bhakampokela. Ligongo na bhenaangota bhakibhanga bhatekuhibhonanga yoa hibhakatenda Ayesu konokwe ku Yelusalemu mu lichobha likolongwa lya Pasaka, ligongo na bhenaangota bhakibha bhajaulinge mu lichobha likolongwa lyenelyo.
46Henela Ayesu akahika kabhele konokwe ku chilambo cha Kana, chilambo cha ku Galilaya, kwakola kubhakagalambua machi kubhee divai. Penapo pakibha na akolo jumo kwaajibha na kakombo jwaakibha na ntamwa konokwe ku Kapelenaumu. 47Akolo bhenabho pabhakajoa kubhee Ayesu abhokite ku chilambo cha Yudea na kuhika chilambo cha Galilaya, akaajendelela na kwaajopa ajaule kunnamia mwana jwabhe jwaakibha ntamwa kubhandikila na kujomoka. 48Ayesu akaalobholela, “Mwenga handa ngabhonanga hilolelo na yakangachika ng'o ngakombola kuhobhalela.”
49Anachilongola jonojwe akaalobholela, “Mwe mwakolo, choonde tujende tangu kakombo jwangu jwangajomoka.”
50Ayesu akaalobholela, “Nnyaule tu, mwana jwinu atekulama.”
Mundu jonojwe akahobhalela malobhe gabhakalobholelwa na Ayesu, akabhoka akajaula. 51Pabhakibha tangu nndela, akakongana na bhatumichi bhabhe bhakaalobholela kubhee, “Kakombo jwinu alamite!”
52Bhakaakonyanga muda niki kakombo jwabhe pabhakalama, na bhenaangota bhakannobholela, “Licho muda gwa saa saba muhi, chitamwa chikaaleka.” 53Ngapena atati jwa jono kakombo akakombokela kubhee gukibha muda gogogo nga pabhakalobholelwa na Ayesu kubhee, “Kakombo jwinu alamite.” Henela akaahobhalela Ayesu bhenabho pamo na bhandu bhoa bha kwaachabhe.
54Heche nga chikibha chilolelo cha bhele chibhakatenda Ayesu pabhatendita kubhoka ku chilambo cha Yudea na kujala Galilaya.
Currently Selected:
Ayohana 4: NTNHBL
Highlight
Copy
Compare
Share
Want to have your highlights saved across all your devices? Sign up or sign in
The New Testament in Ndondehamba Language ©The Word for the World International and Ndondehamba Language Translation, All rights reserved.
