Ayohana 3

Ayesu na Anikodemo

1Pakibha na akolo bhamo Bhayahudi, bha chibhoga cha Mafalisayo, lina lyabhe Anikodemo. 2Lichobha limo kilo Anikodemo akaajendelela Ayesu, akaalobholelea, “Alabi, tuimanyi kubhee mwenga nga bhannyigana bhantumitwe na Annoongo, kwa kubhee jwakwa mundu jwaakombola kutenda hilolelo hiintendite mwenga, handa Annoongo bhanga pamo na bhena.”

3Ayesu akaajangula, “Ndendakunnobholela kweli, mundu ngakombola kugubhona Umwenye gwa Annoongo handa ngabhelekwa pabhele.” 4Anikodemo akankonya, “Bholi, mundu akombolabholi kubhelekwa pabhele handa abhi anahota? Ngakombola kujiingila pabhele mu lutumbo lya anyongo bhabhe na kubhelekwa pabhele!” 5Ayesu akaajangula, “Ndendakunnobholela kweli, jwakwa mundu joajola jwaapakombola kujiingila mu Umwenye gwa Annoongo handa ngabhelekwa kwa machi na kwa Mboomo ja Annoongo. 6Mundu babhelekwa kwa mmele kwa atati na anyongo bhabhe, nambo mundu bhabhelekwa kwa mboomo kupetela Mboomo ja Annoongo. 7Nkotokangacha panannobholela mpalikwa kubhelekwa pabhele. 8Mboongo kupoga kohakola kujipala. Kupoga kwakwe ntendakujoa nambo ngakombola kumanya kujibhoka na kujijaula. Henela nga chiibhile kwa mundu joajola jwaabhelikwe na Mboomo ja Annoongo.”

9Anikodemo akaakonya, “Bholi, hikubho handa yenjeni hikombolekabholi?” 10Ayesu akaajangula, “Mwenga nga bhannyigana mu chilambo cha ku Isilaeli, nambo tangu ngaelewa hikubho heye? 11Ndendakunnobholela kweli, twenga tutendakunkongolelanga hikubho hiituimanyi na tutendakunkongolelanga hikubho yeniyela hiituibhonite, nambo mwangota ntendakananga ngani jitu. 12Ndekunnobholelanga hikubho ya pachilambo, nambo mwangota mwangahobhalelanga, ngocheni mpakombolabholi kuhobhalela pambakunnobholelanga hikubho ya kunani kwa Annoongo? 13Jwakwa mundu jwaajawile kujaula kunani kwa Annoongo nga Mwana jwa Mundu jikajabhe, jwaatulwike kubhoka kunani kwa Annoongo.”

14“Handa Amusa chibhapakong'ondela nnani chidimu cha lijoka jwa chaba kwa nhimbati kwakola palulemba, hela hela kwa Mwana jwa Mundu chibhapakong'ondelwa nnani, 15ili kila mundu jwanhobhalela apate umomi gwa machobha goa gwangapela. 16Ligongo helyo, Annoongo akaapalanga muno bhandu bha chilambo choa henela akammoa Mwana jwabhe jwa jikajabhe, ili kila mundu jwanhobhalela, bhabhee na umomi kwa machobha goa gwangapela. 17Ligongo Annoongo bhangaatuma Mwana jwabhe pachilambo kwahukunulanga bhandu bha pachilambo, ila kupetela Mwana jwabhe bhandu bhoa bhahokolewange.”

18“Mundu joajola jwanhobhalela Mwana ngahukumulwa, nambo kwa jwajola jwanganhobhalela Mwana atekuhukumulwa, ligongo anganhobhalela Mwana jwa jikajabhe jwa Annoongo. 19Henela nga bhandu chibhapakuhukumulwanga, na jono lumuli atekuhika bhandu bha pachilambo, nambo bhandu bha pachilambo bhatekupalanga lubhendu kupunda jono lumuli, ligongo lya hikubho hibhatendanga nga hibohu. 20Mundu joajola jwaatenda hikubho hibohu atendakuguchimwa lumuli, na wala ngahika palumuli ligongo atendakujogopa yeniyela hikubho yabhe hibohu hibhatenda hipakubhonekana. 21Nambo mundu jonijola jwaatenda gammbone kuhika palumuli, ili hikubho yabhe hibhonekane hiitendikwe kwa kwaakonda Annoongo.”

Ayohana Mbatichaji alongela ngani ya Ayesu

22Pagakapeta genago, Ayesu na bhenibhala bhabhachijigana bhabhe bhakajaulanga ku chilambo cha Yudea, na bhenaangota bhakatamanga konokwe kwa muuda abhikubaticha bhandu. 23Hela hela Ayohana atendita kubhaticha bhandu konokwe ku Ainoni, kubhandikila na ku Selemu, kwa kubhee konokwe kukibha na machi gajingi. Bhandu bhajingi bhatendita kujaula konokwe na kubatichwa. 24Machobha hago Ayohana akibha tangu kwaatabha mu nyuumba ja kutabhila bhandu. 25Ngapena bhangi pakati ja bhabhachijigana bha Ayohana bhakajemaka kutaukana na Bhayahudi bhamo ngani ja kuchijelejea ili kondekwa handa chiiyobhalilike kwaachalila Annoongo. 26Henela bhabhachijigana bhenibhala bhakaajendelela Ayohana bhakaalobholela, “Bhannyigana, mundu jonijola jwaakibha pamo na mwenga kuntundu ja loochi lwa Yolodani, jonijola junakannobholela ngani yabhe, ngocheni atendakubaticha, na kila mundu atendakwaajendelela!” 27Ayohana akaajangulanga, “Jwaka mundu joajola jwaakombola kupata chilebhe choachela handa jwangapata kubhoka kunani kwa Annoongo. 28Mwangota mwabhene ntendakumanyanga kweli panakannobholelanga, ‘Nenga ngabha Akilisito jwahagulikwe na Annoongo, nambo ndumitwe naalongolele!’ 29Hangwana ulombela nga jwaannombela mwikege jwaulombela. Nambo aganja bhabhe hangwana ulombela jwaajema kubhandikila na jonojwe na kwajohanikia, kuhachuka muno penipala pabhalijoa lilobhe lyabhe. Ligongo hele kuhangalala kwangu kukwelite. 30Akilisito jwahagulikwe na Annoongo apaalikwa kujonjokeka kutopelwa muno na nenga mbalikwa kupongoka kutopelwa.”

Ngani ja jonijola jwahika kubhoka kunani kwa Annoongo

31Jwaagulikwa kubhoka kunani kwa Annoongo nga akolo kupunda yoa. Jwaabhoka pachilambo nga bha pachilambo, na kulongela hilebhe ya pachilambo, nambo jwahika kubhoka kunani kwa Annoongo nga akolo kupunda yoa. 32Bhenabho kulongela gaagabhweni na kugajoa, nambo bhakwa amundu bhoabhala bhabhahobhalela malobhe gakwe gabhalongela. 33Mundu joajola jwaakonda ngani jabhe alangia kubhee Annoongo nga bha kweli. 34Jonojwe jwaatumitwe na Annoongo kulongela ngani ya Annoongo, kwa kubhee Annoongo kuntwelea muno Mboomo jabhe pangali chipemo. 35Atati atendakumpala Mwana na ampekie hilebhe yoa mmabhoko gabhe. 36Mundu joajola jwanhobhalela Mwana akweti umomi gwa machobha goa gwangapela, nambo mundu jwakana kunhobhalela Mwana ngapata umomi gwa machobha goa gwangapela, nambo apakuhigalila mu hukumulo ja Annoongo.

Currently Selected:

Ayohana 3: NTNHBL

Highlight

Copy

Compare