Ayohana 14
14
Ayesu nga ndela ja kujaula kwa Atati
1Ayesu akaalobholelanga, “Nkotokuhechuka mumitima jinunji, mwahobhalele Annoongo, hela hela nhobhalelange na nenga. 2Nyuumba ja Atati bhangu mubhile mwa kutama mujingi. Handa nga henela, ngannobholilinge. Ndendakujaula kumpanganikianga pakutama. 3Nanenga ananyawile na kunhalakianga pakutama, mbakubhuja kabhele kuntolanga ntamange pamo nanenga, ili mwangota mmangange penipala pamile nenga. 4Na konikola kunyaula mwangota mujimanyi jene ndela.”
5Atomasi akaakonya, “Hangwana, twenga ngakumanya kunyaula, bholi tupakujimanyabholi jene ndela.”
6Ayesu akaajangula, “Nenga namwene nga ndela, ndendakwalobholelanga bhandu ukweli gwa Annoongo na ndendakwapekea umomi gwa machobha goha. Jwakwa mundu jwahika kwa Atati pangali kupetela kwaachangu. 7Handa ntendakumanya nenga, mpakummanya na Atati bhangu. Kubhokela nangocheni, ntendakummanya Atati bhangu, kabhele ntekwabhona.”
8Afilipo akaalobholela, “Hangwana, nangocheni ntulangie jono Atati, jono nga jutumpala.”
9Ayesu akaalobholela, “Afilipo, ndekutama na mwenga machobha gajingi, bholi, nganimanya? Mundu joajola jwamonite nenga, abhonite Atati. Nangocheni nkombolabholi kulongela, ‘Ntulangie Atati?’ 10Bholi, Afilipo ngahobhalela kubhee nenga mile nkati ja Atati, na jono Atati abhile nkati jangu? Ngannobholelanga gagabhile gangu nambo Atati jwabhile nkati jangu atenda mahengo gabhe.” 11Nhobhalelange panannobholelanga kubhee mile nkati ja Atati na Atati abhi nkati jangu nenga. Handa nganhobhalelanga nhobhalelange ligongo lya mahengo gambangana. 12Kweli ndendakunnobholelanga, mundu joajola jwanhobhalela nenga, apakupangana mahengo genigala gambagana, apakutenda mahengo makolongwa kupunda nenga kwa kubhee nyaula kwa Atati bhangu. 13Hana nnyopitinge chilebhe handa chimbala nenga mbakuchitenda, ili Atati atopelwe nkati ja Mwana. 14Hana nnyopitinge chilebhe handa chimbala nenga mbakuchitenda.
Ayesu alongela apakwaleta Mboomo ja Annoongo
15“Handa ntendakupamba, mpakutendanga amuli yangu. 16Mbakwajoopa Atati, na jonojwe apakumpekeanga Ajangatii jongi apakutama na mwangota machobha goa. 17Jonojwe nga Mboomo ja Annoongo jwaalangia ukweli gwa Annoongo. Bhandu bha pachilambo ngakombola kwaapokela ligongo ngakombola kwalola wala kwaamanya. Nambo mwangota ntendakwamanya ligongo abhi pamo na mwangota na atama nkati jinunji.”
18“Pambakubhoka ngannekanga handa akaakebha, mbakubhuja kabhele kutama na mwangota. 19Tangu kachoko bhandu bha pachilambo ngamonanga kabhele, nambo mwangota mpakumonanga, ligongo mbakubhee naamomi kabhele, na mwangota mpakubhee na umomi gwa kweli. 20Lichobha lyalela palipakuhika mpakumanya nenga kubhee mile nkati ja Atati, na mwangota mmilinge nkati jangu, na nenga mile nkati jinunji.”
21“Mundu joajola jwapokela malagilo gangu na kugakamula, mundu jonojwe jwambala nenga. Na Atati atenda kumpala jonijola jwambala nenga, na nenga mbakumpala na kuchilangia kwaachabhe.”
22Ngapena Ayuda, ngabha jonijola Isikalioti, akaalobholela, “Hangwana, ipakubheebholi mwenga kuchilangia kwachitu jika na ngabha kwa bhandu bha pachilambo?”
23Ayesu akaajangula, “Bhandu bhala bhabhambala nenga bhapakutendanga chinaalobholelanga na Atati bhangu apakwaapalanga bhena bhandu, nenga na Atati bhangu tupakuhikanga kwaachinu kutama nabho. 24Mundu joajola jwangambala nenga ngatenda chinaalobholela. Na ngani jimujijoha ngabha jangu, bali jibhoka kwa Annoongo jwandumite.”
25“Ndekunnyigananga hikubho yenjeni mi pamo na mwangota. 26Atati bhangu apakuntumilanga Ajangatii, jonojwe nga Mboomo ja Annoongo kwa lina lyangu, apakunnyigangakila hikubho yoa na kunkomboanga kila chilebhe chingakannobholelanga.”
27“Kuhengwa ndendakunnekelanga, ndendakumpekeanga kuhengwa kwangu, ngampekeanga mwangota handa henela bhandu bha pachilambo chibhatendakumpekeanga. Nkotokubhee na lipamba mu mitima jinunji na nkotokujogopanga. 28Nkanyoanga panakannobholelanga, ‘Ndendakujaula, na mbakubhuja kabhele.’ Handa nkambalanga, nkahachukilinge kujoa ndendakujaula kwa Atati, ligongo Atati nga akolo kupunda nenga. 29Ndekunnobholelanga hikubho heye tangu gangapitila, ili pagapakupitila nhobhalelange. 30Ngalongela muno na mwangota, ligongo jonijola nkolongwa jwa chilambo heche atendakuika, ligongo kwaachangu nenga ngakombola chilebhe. 31nambo bhandu bha pachilambo bhapalikwa bhaimanyange kubhee ndendakwapala Atati, nga kwa maana ndenda kila chilebhe Atati chibhangulumikie.”
“Nangocheni nnyimukange, tubhokange pambani.”
Currently Selected:
Ayohana 14: NTNHBL
Highlight
Copy
Compare
Share
Want to have your highlights saved across all your devices? Sign up or sign in
The New Testament in Ndondehamba Language ©The Word for the World International and Ndondehamba Language Translation, All rights reserved.
