Ayohana 11
11
Kujomoka kwa Alazalo
1Pakibha na mundu jumo jwa ku Betania jwakemitwa Alazalo akibha ntamwa. Akaalombo bhahe bhakibhanga bhakemitwa Amalia na Amalata. 2Amalia hojo, nga jonijola jwakaapakala Hangwana mahuta gakunungila na kwaahunguta Alazalo makongono kwa majunju gakwe. 3Henela akaalombo bhabhe Alazalo bhakaatumila Ayesu ngani kwaalobholela, “Mwe Hangwana, aganja bhinu jwamumpala nga ntamwa.”
4Ayesu pabhakajoha genago, akalobhola, “Alazalo ngajomoka kwa chitamwa heche, ila gupakulangia ng'anyimo gwa Annoongo, ili Mwana jwa Annoongo akombole kutopelwa kupetela heche chitamwa.”
5Ayesu na Amalata na Amalia na Alazalo bhakibhanga na uganja nkolongwa muno. 6Ayesu pabhakajoa kubhee Alazalo atendakulwala, akajonjokea kutama mahali penapo kwa machobha gabhele. 7Bahi, pagakapeta machobha genago Ayesu akaalobholelanga bhabhachijigana bhabhe, “Nangocheni tubhujange kabhele ku Yudea.”
8Bhabhachijigana bhabhe bhakaalobholela, “Bhannyigana, akachilongola bha Bhayahudi bhapalita kunkoma kwa kumpota maganga, kwa niki mpala kubhuja kabhele konokwe?”
9Ayesu akaajangulanga, “Bholi, muhi gwangali masaa komi na gabhele? Bahi, bhandu handa ajendite muhi ngakombola kobhanduka kwakubhee atendakugubhona nhana gwa heche chilambo. 10Nambo bhandu handa bhajendite kilo bhapakubhanduka ligongo bhangali nhana gwakwatenda kulola” 11Ayesu pabhakajomola kulongela genago, akaalobholelanga, “Aganja bhitu Alazalo agolwike, nambo nenga mbakujaula kwaajimua.”
12Bhabhachijigana bhabhe bhakaalobholela, “Mwe Hangwana, handa agolwike lugono, apakujimuka tu.”
13Ayesu atendita kulongela ngani ja kujomoka kwa Alazalo, nambo bhenaangota bhakaganikianga kubhee atendita kulongela ngani ja lugono. 14Ngapena Ayesu akaalobholelanga pangali kuhiya, “Alazalo ajomwike, 15nambo ndendakuhachukila ligongo linunji kubhee nangabhee konokwe tangu Alazalo abhi tangu kujomoka ili mwangota nhobhalelange. Henela nangocheni tujaulange kwachabhe.”
16Atomasi jwaakemwa Mabhela akaalobholelanga bhabhachijigana akaajabhe, “Na twenga tujaulange tukajomoke pamo na Hangwana.”
Ayesu nga uyoho na umomi
17Ayesu pabhakaika konokwe akagukolela mmele gwa Alazalo gukibha guchikitwe mu likabhuli kwa machobha ncheche. 18Bahi chijiji cha Betania chikibha kubhandikila na Yelusalemu kutalika kwa kubhandikila maili hibhele kubhoka ku Yelusalemu. 19Bhayahudi bhajingi bhakibha bhatekuikanga kwa Amalata na Amalia kwalekelanga ntima kubhokana na malilo ga akaka bhabhenji.
20Bahi, Amalata pabhakajoha Ayesu atendakuhika, akabhoka kujaula kwapokela, nambo Amalia akaigalila kaja. 21Amalata akaalobholela Ayesu, “Mwe Hangwana, handa nkabhile pambani, akaka bhangu akajomwikehopo. 22Nambo niimanyi kubhee hata nangocheni Annoongo apakumpekeha choachela chimpakwajopa.”
23Ayesu akaakongolela, “Akaka jwinu apakuyoka.”
24Amalata akaajangula, “Niimanyi kubhee apakuyoka mu kuyoka kwa bhabhawilinge lichobha lya kupela.”
25Ayesu akaalobholela, “Nenga nga uyoho na umomi. Mundu joajola jwanhobhalela nenga, hata handa apakujomoka apakubhee jwamomi, 26mundu joajola jwatama na kunhobhalela nenga, ngajomoka ng'o. Bholi ntendakulihobhalela hele?”
27Amalata akaajangula, “Helo mwe Hangwana! Nenga ndendakuhobhalela kubhee mwenga nga Akilisito jwaagulikwe na Annoogo, Mwana jwa Annoongo, jonijola jwahika pachilambo.”
Ayesu atendakwagutila Alazalo
28Amalata pabhakajomola kulongela genago, akajaula kwakema Amalia kwa kuchiiya, akaalobholela, “Bhabhajigana abhile pambani atendakunkema,” 29Amalia pabhakajoha henela, akajinuka chindema kwaajendelela kubhakibha Ayesu. 30Ayesu akibha tangu angajingila pa chijiji, ila akibha tangu maali penipala pabhakakongana na Amalata. 31Bhenibhala Bhayahudi bhabhakibhanga nkati bhabhikwalekelanga ntima Amalia, pabhakammona amalia chibhatekujimuka kwa chindema na kupita panja, bhakankagula. Bhakaganikianga kubhee ajaula kulikabuli kuguta.
32Amalia pabhakaika penipala Ayesu pabhakibha, akatindibhala majugwa pamakongono gabhe na kulobhola, “Hangwana, handa nkabhile pambani akaka bhangu angajomwikehopo.”
33Ayesu pabhakaabhona Amalia abhikuguta na bhenibhala Bhayahudi bhabhakaikanga pamo na Amalia bhatendakugutanga, ikaabhina muntima gwabhe, akahechuka muno. 34Ayesu akaakonyanga, “Munchikite koji?” Bhakaalobholela,
“Hangwana, nhiike mpalole.”
35Ayesu akaguta. 36Ngapena Bhayahudi bhakalobholanga, “Nnolange namuna chibhakampala Alazalo!”
37Nambo bhandu bhangi bhakalobholanga, “Jonjoni jwatekwalamiha jonijola jwangalola, bholi, jwangakombola kwaalamiha Alazalo?”
Ayesu atendakwayoa Alazalo
38Bahi, Ayesu abhi atekuhechuka kabhele muntima gwabhe, akahika palikabuli. Likabuli lyene likibha mbako, na likawekelwa kwa liganga. 39Ayesu akalobhola, “Mmoange liganga hele.”
Amalata alombo jwa jonijola mundu jwajomwike akalobhola, “Hangwana, atendakununga, ligongo tangu achikwe leleni nga lichobha lya ncheche.” 40Ayesu akaalobholela Amalata, “Bholi, nangankongolela kubhee handa nkahobhalile mpakugubhona ng'anyimo gwa Annoongo?” 41Henela bhakalibhoanga liganga lyenilyela. Ayesu akalola nnani kulihunde akaajopa kwa Annoongo, akalobhola, “Atati, ndendakunchukulu kwa kubhee ntendakunyoanikiha. 42Niimanyi yakubhee mwenga ntendakunyoanikia machobha goha, nambo nongile gangani ligongo lya nkutuli hogo gugujemite pambani, ili bhahobhalele yakubhee mwenga nga jwandumite.” 43Pabhakajomola kulongela genago, Ayesu akakwea lilobhe lyabhe akakema, “Mwe Alazalo, nhike kongoni panja!” 44Jonijola jwakibha atekujomoka akapita panja, kongo mabhoko na makongo gabhe gabhigahigililwe chanda na kumiho kwabhe kubhikutabhitwe chitambaa. Ayesu akaalobholelanga, “Munnyogolange, mwaaleke ajende.”
Akachilongola bha Bhayahudi bhapalanga kwakoma Ayesu
Amatayo 26:1-5; Amaluko 14:1-2; Aluka 22:1-2
45Henela Bhayahudi bhajingi bhabhakibha bhaikite na Amalia, pabhakabhonanga genigala gabhatendite Ayesu bhakanhobhalela. 46Nambo bhangi bhakajaulanga kwa Mafalisayo na kwalobholelanga hikubho hibhatendite Ayesu. 47Henela Mafalisayo na akaakung'i akolongwa bhakamekanga balacha lya Bhayahudi, bhakakonyananga, “Tutenda bholi? Hojo mundu atenda hilolelo hijingi muno. 48Handa twalekite apunde kutenda hilolelo yenjeni kila jumo apakunhobhalela, na akaakolo bha ku Loma na bhatabhala bha ku Loma bhapakuikanga na kugabhoanga mamulaka gitu nnani ja Nyuumba ja Annoongo na chilambo chitu.”
49Penapo, jumo jwabhenji, jwakemitwa Akayafa, jwaakibha akung'i akolo chaaka chenecho akalobhola, “Mwangota ngachimanyanga chilebhe chohachela! 50Bholi, ngamanyanga kubhee nga mbaya mundu jumo ajomoke ligongo lya bhandu, kupeta chilambo choa chialibiwe?” 51Akayafa jwangalongela genago kwa kupala mwene, bali ligongo akibha akung'i akolongwa chaka chela, bhakalondola kubhee Ayesu bhakawile ligongo lya chilambo cha Bhayahudi, 52wala ngabha tu apakujomoka kwa bhabhabhilinge Bhayahudi jika, nambo hela hela abhakumbange bhana bha Annoongo bhabhapwilinganike bhabhangange pamo. 53Henela kubhokela bhakajemekanga kuloleanga ndela ja kwaakoma Ayesu. 54Ngapena Ayesu bhangajenda kabhele palugwinjili akibha na Bhayahudi, bali akatama nyenje akajaula palulemba kubhandikila pa chijiji chimo chikemitwa Aefulaimu. Akatama konokwe pamo na bhabhachijigana bhabhe.
55Bahi lichobha likolongwa lya Pasaka lya Bhayahudi likabhandikila, bhandu bhajingi bhakabhoka kuhijiji bhakajendanga ku Yelusalemu kuchijelejeha ili bhakondekwe kwaachalila Annoongo. 56Bhandu bhakibha bhantendakwalolea Ayesu, nabhena bhakajemanga pa Nyuumba ja Annoongo bhakakonyangana, “Bholi, hojo mundu ngahika ng'o palichobha likolongwa?” 57Akaakung'i akolongwa na Mafalisayo bhakibha bhabhoite lilagilo kubhee mundu joajola jwapakuimanya maali pabhabhile Ayesu, abhalobholele na bhaakamule.
Currently Selected:
Ayohana 11: NTNHBL
Highlight
Copy
Compare
Share
Want to have your highlights saved across all your devices? Sign up or sign in
The New Testament in Ndondehamba Language ©The Word for the World International and Ndondehamba Language Translation, All rights reserved.
