Bhaefeso 1

1Nenga Apaulo, andundame bha Akilisito Yesu kwa upalio gwa Annoongo.

Ndenda kunnyandikilanga mwangota mwa bhandu bha Annoongo bha konokwe ku Efeso, mummilinge mwa bhandu bha kuaminika mu kulondanika na Akilisito Yesu

2Ndenda kuntakianga umbone na kuhengwa kukubhoka kwa Annoongo Atati bhitu na kwa Hangwana bhitu Ayesu Kilisito.

Annoongo atekutuhagula kupetela Akilisito

3Alumbalilwe Annoongo Atati bha Hangwana bhitu Ayesu Kilisito, ligongo kwa kulondanika na Akilisito atutendile gammbone gajingi kupetela Mboomo jwa Annoongo kubhoka kunani kwa Annoongo. 4Kwa kubhee tangu ja kuhalakikwa kwa chilambo, Annoongo akatuagaula tubhee bhandu bhakwe mu kulondanika na Akilisito ili tubhee bhandu bha Annoongo na twangabhee na mabohu nnoongi jabhe.

Ligongo lya upaliho gwabhe, 5Tangu ja kuhalakilwa kwa chilambo, Annoongo akapala kutenda henela tubhee bhabhe kwa ndela ja Ayesu Kilisito, henela nga chibhakabhajilwa na chibhakapala. 6Bahi, twaalaumbalile Annoongo ligongo lya umbone gwabhe nkolo, gwaatupekie hiyoyo kupetela mwana jwabhe jwaampala kubhee handa ngwahupa. 7Kwa kulondekana na Akilisito twenga tutendakukombolewa kupetela miyahi jabhe, ligongo tutekulekelwa mabohu gitu. Henela nga chigubhile ukolo gwa umbone gwabhe, 8gubhatupekie tuumbe!

Kwa malango na kumanya kwabhe koha. 9Annoongo akapangana chenichela chibhakachipala mweene, akatulobholela kwa ngani ja mpango gwabhe gugutekuchiiya, gubhakapala kugupangana kupetela Akilisito. 10Muda gwabhe pagukahika akapangana chenichela chibhakachipala, Akilisito apakutabhala pachilambo na kunani kwa Annoongo.

11Mu kulondika na Akilisito, twenga tutekuhagulikwa kubhee bhandu bhabhe handa chibhakapala Annoongo tangu ja kuhalakikwa kwa chilambo. Annoongo atendakupangana hilebhe handa chibhapala mweene. 12Annoongo akatenda henela, twenga Bhayahudi nga bhatukalongolela kwahobhalela Akilisito, tupalikwa kwaalumbalila Annoongo kwa ukolo gwabhe!

13Hela hela na mwangota mwa bhandu bhanga Bhayahudi, nkajoanga ngani ja kweli nga Ngani Jammbone jijikaaletelanga ukombohi kwa kwaahobhalela Akilisito. Annoongo ili kulangania mwangota nga bhakwe akammekanga chilolelo kwa kumpekea jonijola Mboomo jwakwe jwaakalobhola kubhee apakutepekea. 14Mboomo jonojwe nga jwaapakututenda tupokele genigala goa Annoongo gabhakalobhola kubhee apakwapekea bhandu bhabhe, chikubho hecho chitulangia kubhee Annoongo apakwaakomboanga bhandu bhabhe. Twenga tulumbalile ukolo gwabhe!

Apaulo atendakwaajopa Annoongo

15Kubhokela panakajoa henela chimwahobhalela Hangwana Ayesu na kwaapala bhandu bhoa bha Annoongo, 16nangaleka ng'o kwaachukulu Annoongo ligongo linunji. Ndendakunkombokelanga pandendakwaajopa Annoongo. 17Ndendakuendelea kwaajopa Annoongo jwa Hangwana bhitu Ayesu Kilisito, Atati jwa ukolo, ampekeange mwangota Mboomo jwabhe jwaapakuntendanga mmangange kubhee bhandu bhakwe na kunhunukulilanga ili nkombolange kummanya Annoongo maha. 18Ndendakwaajopa Annoongo ajihunukule mitima jinunji ili nkombolange kugubhona nhana gwabhe, ili mpatange kulupalila kubhatekunkemelanga na ukolo gwabhe nkolo kwa genigala gabhatekwabhekelanga bhandu bhabhe. 19Ndendakwaajopa Annoongo ili kombolange kumanya machili gakwe makolongwa muno ligongo lya twenga bhatuhobhalela. Uwecho gonogwe gugupangana lihengo nkati jitu gulandana na machili genigala makolo muno, 20yakubhee akagatumia pabhakaayoa Akilisito, akaabheka lubhoko lwabhe lwa kunnelo konokwe kunani kwa Annoongo. 21Konokwe kunani kwa Annoongo, Akilisito akibha akolo kwa akaakolo bhoa na bhabhabhilinge na mamulaka bhoa na bhabhabhile na machili na akaamwenye. Kabhele atendita kutabhala kila chichikemwa mu chilambo chenjeni na chilambo chichiika. 22Annoongo ampekie Akilisito mamulaka ya hilebhe yoa, na atekwaatenda Akilisito jwaatawala kila chilebhe, abhee mutwe kwa bhandu bhoa bhabhahobhalela Akilisito. 23Libhoga lya bhandu bhabhahobhalela Akilisito nga mmele gwabhe Akilisito, na akilisito jwaalitenda libhobha lya bhandu lilyaahobhalela jonojwe likamilike.

Currently Selected:

Bhaefeso 1: NTNHBL

Highlight

Copy

Compare